Read East Ambae HIBRU 7 Bible Online

HIBRU 7 - East Ambae bible

HIBRU 7

¹Melkisedek u ratahigi goro na qatui venue Salem. Siu vage ingeie a tangaloi rugurugu noi God ngehi i God u Hahale Garagara. Siu lune i Ebraham mo mule taligu dena vuro ngehi u ue vagamate na ratahigi gaivesi, i Melkisedek mo haqea lo turegi ko mo vai gareaginie.

²Siu siseri ngaha i Ebraham u lei doluegi na vivilakogi ingere hi u haqera lo taroi vuro, mo waheginire qatu hangavulu, mo betea hala gatagale lawe Melkisedek. A hea hi i Melkisedek a iloilogi vena, “A Ratahigi huri na vovohoiana.” Vage huri u ratahigi goro na qatui venue Salem, a hea hi a iloilogi vena, “A Ratahigi huri na tamwata.”

³A valu huri tamana mei ratahine hatie, sige huri retubune u vomai vuine tuei, i hatie. A valu hurigi hatie huri vena veve huri na vorana mena nona mateana. Ingeie u mwerei Netui God, ingeie a tangaloi rugurugu hi u hakobibi na henai tangaloi rugurugu vagi tuei.

⁴Igimiu nen ladolado lo tangaloi hi i Melkisedek, ingeie a tangaloi lawua garagara i tubude tuei i Ebraham ingeie a tangaloi lawua, siu u lei doluegi na vivilakogi hi u haqera lo taroi vuro, mo waheginire qatu hangavulu, siu mo havusie mo betea qatu gatagale lawe Melkisedek.

⁵Siu igide dau iloe ve vataha na higao a sinobu ta Israel rau wahegi na nora gineu doluegi qatu hangavulu. Siu a tamwata mo veve huri ve a duvi Livae ingere hi a tangaloi rugurugu rai leie qatu gatagale denire sinobu ta Israel. A sinobu lo tanoda hi ingere a duvi Ebraham, siu a tangaloi rugurugu ingere hi ram lai gineu denire mwerehi.

⁶I Melkisedek hi he vomai tea den duvi Livae, siu hate huri nge ingeie u lei na vivilakogi qatu gatagale hangavulu den Ebraham, siu ingeie mo vai gareagi Ebraham, ingeie hi u lei na leo waratau den God.

⁷Siu u matamwasara huri mo tau na vaigarea sulo tangaloi, ingeie hi u lawua mo tau na vaigarea sulo tangaloi ngehi u eno hivo denie.

⁸Siu a tangaloi rugurugu hi rau lei na gineu qatu gatagale denire hangavulu, ingere a tangaloi matemate. I Melkisedek hi ngehi u lei na gineu qatu gatagale denire hangavulu, a Reve reve Gogona u veve hurie ve ingeie a tangaloi togatoga.

⁹Siu igide dain veve lai mwerehi, ve lo taro hi tuei i Ebraham u bete na gineu gatagale denire hangavulu lawe Melkisedek, mwerehi i Livae vage u bete hibagataha a duvi Livae ram lai na gineu qatu gatagale mwerehi denire sinobu ta Israel.

¹⁰Siu lo taro hi i Livae he vora tea mosigei. Ingeie a duvi Ebraham gatagale hi u vora lo tagugi vohogi. Nge huri ingeie a duvigi lui Ebraham, lune i Ebraham u ladomavagi Melkisedek, mwerehi vei Livae vage u ladomava ginie.

¹¹Siu i God mo tau na nona tamwata huri na sinobu ta Israel, huri a tangaloi hi rau vomai dena duvi Livae rau labe beno ve rain vei na tabanagi nona tangaloi rugurugu. Siu ve mwere a tabanagi nona tangaloi rugurugu ingere hi den duvi Livae rau vovohoi vurugegi, nase vai a tangaloi rugurugu hala wagineu vin he vomai tea, ingeie a tangaloi rugurugu mo huri lui Melkisedek, ingeie hatie lo duvi Eron.

¹²Siu tare a tangaloi rugurugu mo vomai dena duvigi wagineu, a tamwata hi vin leahi vage.

¹³Ko siseri ngaha a noda Huqe a leo ngerehi ram vevera, ingeie u vomai dena duvi tangaloi wagineu, nge hatie tangaloi gatagale lo duvigi hi ve u tabanagi lo tabana nona tangaloi rugurugu lo ute gogona noi God.

¹⁴Nge huri igide dau iloe beno huri ve ingeie u vomai dena duvi Juda. Nge lune i Mosis mo laqagi huri na tabanagi nona tangaloi rugurugu, he veve na duvigi hi tea vohogi.

¹⁵Siu siseri ngaha mo matamwasara mo vagevage huri a tangaloi rugurugu dolue hi, u vomai beno, ingeie mwerei Melkisedek.

¹⁶Ingeie u voragi na tangaloi rugurugu, he huri na tau leo tea ko a tamwata, nona tangaloi rugurugu, nge gina managi nona mwasoana hi vin he rovo lai tea.

¹⁷Huri a Reve reve Gogona u veve vena “Iniko a tangaloi rugurugu mwere na tangaloi rugurugu hi i Melkisedek tuei, iniko goin labe lo tabana hi vin tuei, a gologi hatie.”

¹⁸A leo hi mo leahi na tamwata ta tuei, huri a tamwata hi hatie huireana lune, siu he vai lei na gineu tea vohogi.

¹⁹Huri a tamwata noi Mosis he vaibagotogi lei na gineu tea vohogi. Siu ngaha i God u bete na turegi wagineu lawe gide u garea garagara, igide dain teu na domide vin siaga lune. A turegi hi vin lei gide dain vomai kakarani lobei God.

²⁰Siu vage, lune i God mo rivu Kraes mo voragi tangaloi rugurugu mo waratau siaga lawea gina leona ve ingeie vin labe aiehi. Nge lo taro hi tuei rau rivu na tangaloi lavasigi ram voragi tangaloi rugurugu, i God he warataugi na leona tea mwerehi.

²¹Siu i Jisas mo voragi tangaloi rugurugu mo huri na leo i God u warataugi teu lawea u reve lo Reve reve Gogona vena, “A huqe u warataugi teu beno ve vin he dori na domine tea. Ingeie u veve vena, ‘Iniko a tangaloi rugurugu ve goin labe lo tabanagi hi vin tuei a gologi hatie.’ ”

²²I Jisas ingeie u lei na waratau hi mo vomai mo dadari mei gide, siu a waratau hi u garea uliu, u siletie hi ta tuei.

²³Ko a gineu dolue vage hi he mwere te hi tuei. Tuei a tangaloi rugurugu rau sao huri ingere a tangaloi ram mate, siu ingere rahe labe tea lo nora tabanagi ve na tuei.

²⁴Siu i Jisas u tino lo nona tabanagi hi, ingeie a tangaloi rugurugu vagi tuei, huri u mwaso ko vin he mate lai tea.

²⁵Giniehi, mo tau vuigi hi bagataha, ko vin he rovo lai tea, ingeie vin vagamwasoire lai hi ram bulu meie ve ran vomai lobei God. Huri ingeie vin toga vagi tuei, ko ingeie vin labe tamwere lo nagoi God, ko mo tataro hurire.

²⁶I Jisas ingeie a noda muei tangaloi rugurugu vovohoi ngehi u tatarise huri ve vin hako mei gide. Ingeie u Gogona, he vai na gineu esi tea, vage a gineu esi he eno lune tea. Ingeie u wegineu vohogi denire tangaloi vaivei esi doluegi, siu i God u tabe hageginie u hahale den eulu.

²⁷Siu ingeie he mwerena muei tangaloi rugurugu tea lavasigi hi ram wehi na rugurugu vataha bongi ve na lai vohogi na bugure gitomue. Siu lo tagugi rabei wehi na rugurugu vage, huri na bugure tangaloi doluegi, i Jisas u vei na gineu hi vagatagale hogosie, lo taro hi u sireginie sibona ve na mate huri ve na riqe na galegaleasi nora tangaloi doluegi.

²⁸A tamwata noi Mosis u rivu na tangaloi ngerehi huri ve rain voragi muei tangaloi rugurugu nge a nora huireana hatie, ram vai na gineu esi hogosie. Siu a leo waratau hi i God u warataugi siaga hurie u vomai lo tagui tamwata hi. A leo hi u rivu Netui God i God u veie u vovohoi beno, huri ve vin toga mwerehi vagi tuei a gologi hatie.