Read East Ambae HIBRU 8 Bible Online

HIBRU 8 - East Ambae bible

HIBRU 8

¹U garea, a vui leo hi gam laqaginire ingere ngaha. A noda muei tangaloi rugurugu hi mo toga eulu lo matuei God hi mo ratahigi goro na gineu doluegi.

²Siu ingeie he vai na nona tabanagi tea lolo vale siusiu hi a tangaloi rau vutue. Nge ingeie mo vai na tabanagi nona muei tangaloi rugurugu lolo ute gogona garagara, lolo a ute hi i God u vagataie huri na hudu-hudugoro ngehi mo ratahigi lolona, a vale siusiu hogo hi i God u vutue lo eulu.

³Siu vataha na muei tangaloi rugurugu hi i God u leo wahera huri ve rain hogohogo lawea ko rain wehi na kakarue huri ve na lai vohogi na galegaleasi nora tangaloi, ko lo doridorigi hi a noda muei tangaloi rugurugu hi vage a nona hogohogo mo eno huri ve vin bete lawe God.

⁴Ko ve mwere huri ve mo toga mosigei tangaha lo ure, ingeie vin he voragi tangaloi rugurugu tea vohogi huri a tangaloi rugurugu ram tino huri ve rain bete hogogi vano lawe God, mwerehi a tamwata noi Mosis mo veve.

⁵Siu a tabana hi a tangaloi rugurugu ram vaie, u mwerena nunu mo haharagi na gineu ingere hi ram eno eulu. Huri lo taro hi i God u veve tuei lawe Mosis huri ve vin vutu na vale siusiu gi valei tataro, ingeie u veve vena, “Goin leo huri vurugegi huri goin vei na gineu ingere hi, vin vovohoi vin huri na gaidumegi hi nau haharaginie lawego beno, lo ului vusi lawua.”

⁶Siu siseri ngaha igide dam lehi na tabanagi nona tanoi rugurugu hi i Jisas mo vaie, u garea u liu, u liu dena tabanagi hi a tanoi rugurugu tatuei hi rau veie. Siu lo doridorigi mwerehi, a leo waratau noi God hi i Jisas u leie mo dadari mei gide, hi vage u garea u liu dena waratau nge hi tatuei, huri a leoi gineu rau garea u liu, huri ve vin veire rain labe.

⁷Siu huri ve a waratau tatomue hi rau garea, sevai a waratau tuegi hi vin hatie.

⁸Nge i God mo lehi na gineu esi u sao lo ului nona sinobu, mwere a Reve reve Gogona mo veve vena, “A Huqe mo veve vena, ‘A rani ram vomai ineu nain teu a waratau garaqa lawera na sinobu a duvi Israel ko lawe na sinobu ta Juda.’ ”

⁹Siu vin he mwerena waratau tea hi nau betea lawe retubure tuei, lo taro nau duleire lo limara, nam tomueginire ram mwalue den Ijib. Ingere rahe hakobibi na waratau tea hi nau betea lawera, giniehi, ineu nam galuveginire.

¹⁰Ineu nain teu na waratau lawera duvi Israel lo taro hi, vin mwere ngaha, ineu nain huhuire gena noku Leo hora ngaha lolo domire. Ineu nain voragi na nora God, ko ingere rain voragi noku sinobu.

¹¹Siu hatie gatagale dein gimiu huri ve vin huhui na tangaloi talo tanona sibona vena, “Goin ilo na Huqe. Huri gatagale vin he vano tea ve na veve na leo hi lawe tuana, huri a tangaloi doluegi ram iloau vin teuvuigi lure hi rau enhivo vuine, vin dadari lure hi a henara rau enhage namawe garagara.

¹²Nain lado vohogi na nora galegaleasi ko nain geluvegi na nora gineu esi. A leoku ngaha, ineu a Huqe nam veve.”

¹³Siu huri na waratau garaqa, i God u vei na waratau tatomue mo malea. A gineu tea ngerehi rau malea ko ram mabobo vin he ribi tea ram salasala.