Read East Ambae HIBRU 9 Bible Online

HIBRU 9 - East Ambae bible

HIBRU 9

¹Lo leo waratau hi God u bete lawe Mosis tuei, a doridorigi lune huri na lengai hudugoro. Ko a tantanoi hudugoro vage ngehi a tangaloi rau tabe huri ve rain hudugoro God aie.

²Lo taro hi tuei ingere rau vutu na vale teniti ram qetu utuhie gairue. Lo qetu utugi tomuegi ram waregi ve a Ute Gogona. A laet u eno aiehi mena tevo gatagale hi a bereti rau bete beno lawe God ram eno aiehi goro na nagoi God.

³Siu ingere rau duletagi na galego lawua mo voragi na qetu utugi. Siu lolo qetu utugi tuegi hi, ram wareginie ve a Ute Gogona Garagara.

⁴Lolo qetu utugi hi a tanoi rugurugu mo eno lolona hi ram hure na gaibuhoru lune, aiehi a tanoi rugurugu rau kea ginie lo gai, siu ram bulugoroe gena kol. A bokis vage mo eno a gigilegi waratau noi God. A bokis hi rau keaginie lo gai ngehi vage rau bulugoroe doluegi gena kol. Lolo bokis hi a botel gatagale mo eno lolona rau keaginie lo kol, lolo botel hi a mavusui hinaga ngehi a mana, i God u betea lawera duvi Israel tuei lo vanue vurogi. Ko a gaitigo noi Eron ngehi tuei i God u veie mo mwaso taligu. Ko vage a vatu tatavola gairue ingere hi a leo waratau noi God rau eno lure.

⁵Namawe lo ului bokis hi a tantanogi huri, God mo lai vohogi na bugure tangaloi, aie. Ko hivoulu taligu a gineu gairue ram waregi ve a Serubim, a gigilegi hi mo haharagi huri ve i God mo toga, a bainhire mo mamalu goro na ute aiehi. Nge hatie tarogi ve nain veve vurugegi na mavusuvusui gineu mwere hi.

⁶Lune a gineu ngerehi rau rarai u rovo ngerehi ira tangaloi rugurugu ram vano vataha bongi lolo qetu utui vale teniti hi a muegi, huri ram vai na nora tabanagi.

⁷Nge a muei tangaloi rugurugu hogosie mo vano lolo qetu utui vale tuegi hi lolona, nge ingeie mo vano lolona vagatagale lo higao gatagale. Lune mo soro lolona, mo lai na dai kakarue huri mo bete lawe God huri na nona galegaleasi, vage huri na galegaleasi nora tangaloi huri ram galegaleasi nge rahe iloe tea sibora.

⁸Lo gineu ingere hi a Vui Gogona u haharagi mata-mwasaraginie vurugegi. Lune a vale teniti hi mo labe mo sigei, hatie turegi ve na waga lawe gide doluegi ve dai vano lolo ute gogona hi u Gogona Garagara.

⁹Ngehi u mwerena gatotavalu mo haharagi na taro ngaha hi gide lolona. A leo hi a iloilogi huri ve a hogogi ngerehi a tangaloi ram bete lawe God, siu a kakarue hi ram wehire huri na nora galegaleasi rahe tatarise tea. A gineu ingere hi rain he vai lei na domire tangaloi tea ve ran vovohoi lo nagoi God.

¹⁰A gineu doluegi ngerehi rau veve na matahalagi, huri na halai hinaga mena inuinugi, siu a matahalagi vage ve rain solo na gineu doluegi rain mwasara lo nagoi God. Ingere hi a tau leo huri na tarabesi hogosie, siu rau eno mo dadari hi i God mo dori na gineu doluegi mo rivu na matahala garaqa.

¹¹Siu i Kraes u vomai beno ingeie a muei tangaloi rugurugu huri na gineu garegarea hi rau vomai beno. Ko a vale teniti hi i Kraes mo vai na nona tabanagi lolona, u vovohoi ko u garea u liu denie hi ta tomue. A vale teniti hi hate gineu huri ve a tangaloi rau vutue, hate gineu talo ure ngaha ngehi i God u teure.

¹²Lune i Kraes u vano lolo vale teniti hi, ingeie mo ahu lolo ute Gogona hi u Gogona Garagara, nge ingeie he vai tea mwerena muei tangaloi rugurugu lavasigi hi rau veie. Ingeie he lai na dai nani tea hi a boegi sige a bulugi hi a boegi vena riqe na galegaleasi nora tangaloi, hate vohogi. Ingeie u lei na daine sibona, siu ingeie u ehu vagatagale hogosie mo vai doluegi na gineu ngerehi, mo voli tuguhi gide dena noda galegaleasi, siu igide dain mwaso vagi tuei vin he rovo lai tea.

¹³A dai boei nani a dai boei bulugi, a qiei natui bulugi, a tabanagi lure mwere ngaha. Ira rugurugu ram teragi na dai ko a qie wuwerigi lo tarabesire tangaloi hi rau galegaleasi lo nagoi God. A gineu ngerehi ram vaire ram mwasara taligu lo nagoi God.

¹⁴Nge a dai Kraes mo vai na tabana u huire taligu denie hi, hageliu dena tabana ngerehi rau vei tuei. Lo huireana nona Vui Gogona hi vin he mate lai tea, Kraes u siregi na mwasoana vano lawe God. Ingeie u mwerena rugurugu hi a gineu he sikelie tea vohogi. Siseri ngaha a daine mo vai gide dam rongo lo tarabeside huri ve dau mwasara dena lalakogi mateana hi dau vaire, huri igide dain vei na tabanagi noi God ngehi a mwaso lune vin he rovo lai tea.

¹⁵Huri na gineu hi i Kraes ingeie a gai gao lawe na tangaloi mo tino lo livugada mei God, mo vai na leo waratau garaqa mo labe. A vevenagi huri u mate, mo voli tuguhi gide dena noda galegaleasi hi dau kalokalo lo leo waratau tatomue vohogi. U veie mwerehi huri gide hi i God mo ware gide, igide dain lei na gineu garegarea hi rain eno vagi tuei ngehi i God u warataugi lawe gide.

¹⁶Tare ve a tangaloi gatagale mo tau na nona waratau, lune ingeie vin mate a nona vivilakogi rain voragi nora tangaloi wagineu, siu ngehi u matamwasara lawera tangaloi huri ve a tangaloi hi vin mate tomue, huri ve a waratau hi vin eno lune.

¹⁷Huri a waratau mwerehi vin he labe lai tea, lune a tangaloi hi mo mwaso tau mosigei. A waratau ngerehi vin labe lai lune a tangaloi hi u waratau u mate beno.

¹⁸Siu lo doridorigi hi, lo taro hi a muei waratau noi God mo labe, a kakarue gatagale vin mate tomue huri a daine vin hale, huri a daine vin hale huri vin vei na waratau hi vin labe lai.

¹⁹Tuei i Mosis u matamwasaragi doluegi na tauleo huri na Leohora noi God lawe na tangaloi u tatarise mwerehi a tamwata mo veve. Siu lo tagugi u lei na dai natui bulugi mena dai nani, mo rogeginire gina wai. Siu mo lai na vului sibsib memea mena rangai gei hi a hisop, a raugi lune, mo dirire lolo dai hi, mo teragi wuweriginie talo buk huri na tamwata hi, siu mo teraginie talure tangaloi doluegi vage.

²⁰Siu ngaha mo veve vena, “A dai ngaha huri vin vei na waratau noi God hi vin labe. A waratau hi, i God u veve beno huri ve igimiu nein ladomava ginie.”

²¹Ko lo doridorigi hi vage, i Mosis mo teragi na dai hi talo vale teniti hi, ko a gineu lavasigi vage hi ram waregareagi God ginire.

²²A hogo, mo huri na tamwata noi Mosis u kakarani huri ve a tangaloi rugurugu rain vei na gineu doluegi ve rain mwasara goro na nagoi God gina dai kakarue. Siu vage, tare ve a dai vin he hale tea i God vin he ladovohogi na bugure tangaloi tea.

²³A gineu ngerehi a tangaloi rugurugu rau vei na hudugoro ginire, rau mwerena nunui gineu doluegi hi ram eno eulu, siu a dai kakarue vin hale huri vin veire rain mwasara. Nge a gineu hogo ngerehi huri na hudugoro, ram eno eulu, siu huri ve a dai gineu tea u garea garagara huri vin veire rain mwasara.

²⁴Siu huri i Kraes he ahu tea lolo Ute Gogona hi a tangaloi rau vutue gina limara, ngehi a nunui Ute Gogona vohogi. Nge ingeie u ehu lo ute ta eulu, siu bagataha mo labe lo nagoi God mo laqagi huri gide.

²⁵A muei tangaloi rugurugu lo duvi Israel, vataha higao ingeie mo ahu lolo ute Gogona Garagara, mo lai na dai kakarue. Siu i Kraes he vano tea vagasao vena hogoginie sibona lawe God.

²⁶Huri ve u veie mwerehi, nase vai vin dule vatu sao lo gai saroutu, vin rong-gagarasi lo tarabesine vatusao, u teuvuigi tuei, lo taro hi i God u teu na ure, mo dadari gaqarigi, nge hatie mwerehi. Ingeie u vomai vagatagale hogosie vena vai vagatagalegi na gineu ngerehi. Lo taro hi mo hogoginie sibona vena riqe na galegaleasi nora tangaloi.

²⁷I God u leowahe na matahala huri na tangaloi doluegi beno. Siu a tangaloi vin mate vagatagale, nge lo tagugi i God vin vevegi wahe na doridorine doluegi.

²⁸Siu lo matahalagi mwerehi i Kraes u hogoginie sibona vagatagale vena riqe na galegaleasi nora tangaloi sao. Nge ingeie vin vomai taligu vagatuegi, hate huri ve vin riqe na galegaleasi, nge ingeie vin vagamwasoire hi ram toga raraie. A doridorigi hi tuei ram wehi na kakarue huri na rugurugu, he tatarise tea ve vin lei vohogi na galegaleasi nora tangaloi