Read East Ambae JEMIS 2 Bible Online

JEMIS 2 - East Ambae bible

JEMIS 2

¹Retueku tare ve igimiu nem ladohogo lo noda Huqe roroa hi i Jisas Kraes igimiu nein he vai na sinobu lavasigi tea ve ran wagineu denire lavasigi.

²Tare ve a tangaloi a mwerai homu hi mo vonai lolo nomiu valei soneana, nge tare ve a tangaloi tuegi mo vonai lolo nomiu bubugi ingeie a mahogi ko a luqana rau buburesige.

³Iniko goin veve lawe na tangaloi hi a luqana rau raka vena, iniko gon toga lo tanoi togatoga hi u eno hage namawe ko lawera tangaloi hi a luqana rau buburesige vena, “Iniko gon labe vantahi, sige gon toga lolo eqie lo vavaku.”

⁴Tare ve igimiu nem vaie mwere ngaha gimiu hi nem veve hi a domire rau asi.

⁵Retueku! Igimiu nen rorongtagieu. I God u leowahe na mahoi tangaloi lolo ureure huri ve rain mwerai homu lo nora ladohogo. I God u leo wahera huri ve rain lei hougi na ute ngehi God mo ratahigi lolona ngehi u warataugi tau lawe rahine hi ram tabea.

⁶Igimiu nehe lado mava tea gina mahoi tangaloi. Nge a tangaloi mwerai homu rain vei asiesigi gimiu. ?Sige hatie? Ingere ram revei gimiu mo vano lo kot. ?Sige hatie?

⁷Koi ingere ram veve asiesigi na henai noda Huqe. ?Sige hatie?

⁸Igimiu nein vei na gineu garea tare ve nem tabe na Leo hora ngehi God u bete lawe gide. A Leo hora hi mo veve lawe gide huri ve dain vui tabetabe gide lo matahalagi mwere hi dam tabe gide siboda.

⁹Siu tare nem vai lawe na tangaloi huri ve ingere rau garea denire tangaloi wagineu, igimiu neu vagasile, a vevenagi a leo mo haharagi huri ve igimiu neu galegaleasi.

¹⁰Tare ve i gimiu nem tabe na Leo hora doluegi, nge neu vai utuhie gatagale, neu vei utuhi na Leo hora doluegi ngerehi.

¹¹I God ingeie hi u veve lawe gide huri ve dain mese bakabaka. Mwerehi vage i God u veve lawe gide ve dain mese vai vagamate na tangaloi. Siu tare ve igimiu nehe bakabaka tea. Nge igimiu nem vai vagamate na tangaloi, neu vei utuhi na leohora doluegi.

¹²Nen laqa ko nen vai nadorimiu mwerena tangaloi ngerehi i God vin vevegi na doridorire vin huri na leohora hi mo vai gide dam mariqe dena garo vauveu.

¹³Nen vai mwere ngaha a vevenagi tare ve nehe haharagi na nomiu hahagavi tea siu lo rani vevegi, vin he hagavi gimiu te vohogi. Nge a hogo i God vin vevegi gide, nge ingeie u hahagavi.

¹⁴Retueku, ?A hava gareana tare ve dam veve vei gimiu a nomiu ladohogo lumiu, nge nehe vai na gineu tea ve na haharagi na nomiu ladohogo? ?Wa a lando hogo mwerehi vin vagamwasoi gimiu?

¹⁵Tare ve i retuemu sige i rehaqemu hatie luqara ko hatie gara hinaga.

¹⁶Tare ve igimiu nem veve lawera vena, “God na vai gareagi gimiu nen toga nam mwamwavi ko nem gagani vurugegi” ?A nom leo ingere hi a hava gareana lure tare ve gohe bete te gineu ngerehi a tarabesire ram tarani garagaragi.

¹⁷Tare ve a ladohogo hi he tomuegi gide tea ve da vai na gineu rau garea a ladohogo hi a mategi.

¹⁸Bataha a tangaloi tea vin veve vena, “A tangaloi lavasigi a nora ladohogo lure ko a tangaloi lavasigi ram vai na gineu rau garea ineu nai duvire vena, gon haharagi na nom ladohogo laweau tare ve gohe vai na gineu garea tea. Ineu nai veina gineu rau garea ko ngehi vin haharagi na noku ladohogo lawego.”

¹⁹Iniko gom veve huri ve gom ladohogo lui God gatagale. Ngehi u garea, nge a vuiesi ram ladohogo mwerehi vage. Ko mo vaire ram matagu ram ruru gina matagute.

²⁰?Wa tangaloi malareragi tea mo tarani huri ve nain haharagi lawea ve a ladohogo tavala varea den lalakogi a mategi?

²¹I tamada Ebraham u vai rarai God gina lalakogi garea lune u siregi netune Aesak ve vin rugurugu ginie. ?Sige hatie?

²²Siu igimiu nen leo. I Ebraham a nona ladohogo ko a nona doridori garea ram tabana bubugi sige hatie? I Ebraham a nona ladohogo mo gigileginie lo leo ko a nona doridori garea.

²³Ngehi a revereve gogona mo matamwasara ginie vena, “I Ebraham u ladohogo lui God, giniehi i God mo lai vurugeginie.” I Ebraham mo voragi na buluana noi God lo matahalagi mwerehi.

²⁴Siu ngahaigimiu nen leo vurugeginie ve dam vai rarai God gina nonda lalakogi nge hatie ve gina nonda ladohogo hogosie.

²⁵A mata leleogi tuegi nge ngaha, i Rehab ingeie u sogagi na tarabesine huri mane. Nge lo tarogi hi u lei vurugegi na tangaloi mataduru gairue a duvi Israel, ko mo hora muleginire lo matahala wagineu. Siu i God lei vurugeginie a vevenagi huri na nona lalakogi garea.

²⁶U mwere tauhi vea tarabesigi a mabuhigi hatie lolona ngehi a mategi, siu a ladohogo he haharaginie tea lo tabana a mategi vage.