Read East Ambae JEMIS 3 Bible Online

JEMIS 3 - East Ambae bible

JEMIS 3

¹Retueku, he garea tea ve lavasigi dein gimiu ve rain huhui. Huri irahine hi ram huhui i God vin veveginire vin huire vin liu dena tangaloi lavasigi.

²Igide doluegi dam vai vagasile lo gineu sao, nge a tangaloi hi mo kokogoro na nona leo nge hi u vovohoi. Ingeie vin kokogoro lai na tarabesine doluegi, mwerena tangaloi hi mo toa lo hosi mo dedeginie.

³Dain tau na garo lolo wuwai hosi mo vaie huri mo ronghuri gide, ko a biti hi mo dedegi na tarabesi hosi doluegi.

⁴Siu igimiu nen lehi na aka lawua hi mo toa lo gabani. A langi huire mo vaie mo toa, nge a kapten mo walaugi na aka lo vohei walaue u biti.

⁵Siu a meada rau biti mwerehi vage, nge ram ngaragi na gineu lalawua gina sagesage. Mwerehi vage a avigeni biti vin gao lai na tamatue lawua.

⁶A meada u mwerena avi. A gineu sao rau esi ram eno lo meada u liu den duvi tarabeside lavasigi.

⁷A gineu mwaso doluegi a turegi, dain vagamwao laire. A tangaloi ram vagamwao na kakarue, a manu ko a gineu takataka ko a ige lolo tahi.

⁸Nge a hogo, a tangaloi rain he vagamwao lai na meara tea. A meada a gineu esi dain he dedegi laie tea. A meada ram horo gina mateana.

⁹Gina meada dam waregareagi tamada God ko gina meanda tauhi dam veve asiesigi na tangaloi hi i God u teure huri ve rain mwereie sibona.

¹⁰A ware garea ko a warawarai rom mwalue lolowuwa gatagale tauhi. Retueku, nge huri ve vin he mwere ngaha tea.

¹¹?Wa a wai mwasara ko a tahi roin mwelue bubugi lai lolo matamata gatagale?

¹²?Wa a baego vin wei lei na mwasi votali? ?Sige a gai vin wei lei na mwasi baego? !Hatie! A wai mwasara vin he vonai lei tea dena tahi.

¹³?Wa lavasigi dein gimiu nem ronghogo gineu sige nem mataisao? Siu igimiu nen haharaginie lo nomiu doridori garea ko nen vai na gineu doluegi gina lado wuweu hi mo vonai dena matai sao.

¹⁴Nge tare ve igimiu nem hakovi na lolo gadigedi sige domiana bugure lolo taqangimiu, nein mese hau rorogi gimiu sibomiu sige nem kali goro na leo hogo.

¹⁵Siu a matai sao mwerehi he vonai tea den eulu. Nge mo vanai dena ure, dena sinobu ko dena tamate.

¹⁶Tare ve a lolo gadigedi sige a domiana bugure mo eno tahi, a romasi ram maraga tahi ko a halai gineu esi u sao vage.

¹⁷Nge a mataisao hi mo vanai den eulu u mwasara. Gitomuegi u renige, siu u tamwata u lologarea, u lado biti, u hahagavi ko u bulubului.

¹⁸Irahine hi ram hako tamwata ram rivu na toli tamwata ko lo taro matue ingere rain lei na mwasi bagotoana.