Read East Ambae 1 BITA 1 Bible Online

1 BITA 1 - East Ambae bible

1 BITA 1

¹Ineu Bita a gaihora noi Jisas Kraes, nam veve garea lawe gimiu a sinobu leowahe noi God hi nem toga mwere na halavano mo huri na qatui venue ingere ngaha, Bontas, Kalesia, Kapadosia, Esia ko Bitinia.

²I God u Domigi vagatai tuei beno ve u leowahe gimiu nein voragi nona sinobu gogona, ngehi mo vanai dena tabanagi nona vui Gogona. I God u tarani gimiu huri ve nein rong hurie ko ve solo mwasaragi gimiu gina dai Jisas. A hogogi ko a tamwata ve ron voragi nomiu na vagevage.

³Igide da ware gareagi God ko i Tamai noda huqe I Jisas Kraes. Lo nona hahaga vi lawua u vei gide dam vora garaqa taligu sulo ladotare hi mo mwaso, a vevenagi i Jisas Kraes u maraga taligu dena mateana.

⁴Siserigi ngaha igide dam ladotare huri na vai garea ngerehi i God u vagataire huri renetune. A vaigarea ngerehi rain he sala tea, hatie ve a gineu ve vin vei asiesiginire, a nora gareana rain he qenu lai tea.

⁵A huireana noi God vin kokogoro gimiu, a vevenagi a nomiu ladohogo, lo rovonai bongi ingeie vin vosangi gimiu gina mwasoana tavagi tuei.

⁶Ngehi vin vei gimiu nein havuhevu, hatie huri siserigi ngaha a rongesi tea wagineu rain vaga hahagavigi gimiu huri na mahogi tea qilodo.

⁷A rongesi ingere ngaha ram vanai ve ran vai lehi na nomiu ladohogo ve u renige. A ladohogo mwasara ngaha a mavanagi u liu dena gol, ngehi ram hurae gina avi vena mwasara, nge vin salasala. Nge a nomiu ladohogo mwasara vin lei na vevegarea ko a roroa ko a ladomava lune nem haharagi Kraes lo mwasoamiu.

⁸Igimiu nehe lehi Kraes tea, nge nem tabea. Igimiu nein he leo laie tea siserigi ngaha, nge nem ladohogo ginie. Siu a lolomiu mo horo gina havuhevu, ngehi nein he garigi laie tea, a havuhevu hi mo horo gina roroa.

⁹Igimiu nem lai na tanoi garigiana ngehi neu ladotarea lo nomiu ladohogo Ngehi a vai vagamwasoi huri na tamatemiu.

¹⁰Ira tangaloi ligoligogi rau hike wawahiligi ko ve rain ilo na vai vagamwasoi ngaha. Ingere rau ligogi huri na hogogi ngehi u vanai lawe gimiu.

¹¹A Vui noi Kraes u toga meire tangaloi ligoligogi, u veve taugi tomue beno huri na gagarasi noi Kraes ko a gineu roroa vin huri lo tagui gagarasi ngerehi. Ira tangaloi ligoligogi rau veileo ve rain hikehike huri na havagineu hi a vui u haharaginire lawera, ve a gineu ngerehi rain vei tagaha, ko a ure vin mwere na havagineu lo taro hi.

¹²A Vui u haharagi lawera vage ve a nora tabana u vei hatie hurire sibora, nge huri gimiu, lune ingere rau veve sere na hogo lawe gimiu ngehi igimiu nem rongoe hibagataha. Ira hine hi rau waregi sere na Roro Garea lawe gimiu lo managi noi Vui Gogona hi u horae himei den eulu, a gineu ngerehi ira Engsel ram tarani ve rain lehire.

¹³Siu igimiu nen vagatai na domimiu huri na tabana garea ko ve nen vai leo ve a nomiu togaana na gogona. A nomiu lado tare doluegi vena eno lo domi tabetabe lawua noi God hi ve vin voragi nomiu, lune vin haharagi Jisas Kraes lawe gimiu.

¹⁴Siserigi ngaha ve igimiu ira netui God, a vevenagi neu rongrongo huri leo, siu igimiu nein mese toga lo matahala mwerehi neu vei tuei. A rongronghogo mei gimiu hatie, giniehi, igimiu neu vei na gineu esi ngerehi mo huri na nomiu tarani.

¹⁵Nge nein gogona lo gineu doluegi hi nem vaire, mwere u uli lo Reve reve Gogona vena, “Nein toga gogona, a vevenagi i God hi u ware gimiu u toga gogona.”

¹⁷Igimiu nem tataro lawea God ko nem warea ve Mama, ko ingeie mo vevegi na lalakogi nona tangaloi gagatalegi vin huri na matahala gatagale hogosie, siu huri igimiu nem toga tangaha mosigei lolo ure, igimiu nein toga gina lado mava lui God.

¹⁸Igimiu nein ilo ve tuei igimiu neu toga lo doridori rahe garea tea, a matahala lailei hougi dena sinobu rau toga tomue dein gimiu. Nge igimiu neu mwaso dena togaana asi hi. U voli tuguhi gimiu, hatie gina gineu u mada mwere na silva sige gol.

¹⁹Nge u voli tuguhi gimiu, gina dai Kraes hi garea garagara, ngehi u mwere na Natui Sibsib mwasara hi hatie sokorana lune.

²⁰I God u leowahe Kraes tomue siu mobei teu na ure, nge u haharaginie lawe na ure, a vevenagi igimiu.

²¹Lui Kraes, igimiu nem ladohogogi God, ngehi u ragasi Kraes dena mateana ko u vei roroaginie. Siu a nomiu ladotare ko a nomiu ladohogo mo eno lui God.

²²Gina nomiu ronghuri lo hogo, igimiu neu vei mwasaragi na tamatemiu, igimiu nein hakovi na tabetabe hogo huri retuemiu ko irehaqemiu lui Kraes. Siu igimiu nen vui tabetabe gimiu gina loloi buei taqangimiu.

²³Igimiu neu vora garaqa taligu, ko a mwasoana garaqa ngaha he vanai tea dena gineu hi vin mate lai. Igimiu neu vora garaqa taligu lo leoi God mo mwaso ngehi vin eno vagi tuei.

²⁴Mwere na Reve reve Gogona mo veve vena: “A sinobu doluegi mwere na duvu ko a nora roroa doluegi mwere na vire lolo talu. A duvu ram mate ko a vire ram soi.

²⁵Nge a leo nona Huqe vin mwaso vagi tuei.” Ko a leo ngaha hi igamai gau waregi serea lawe gimiu.