Read East Ambae 1 BITA 2 Bible Online

1 BITA 2 - East Ambae bible

1 BITA 2

¹Giniehi, igimiu nen siregi vohogi na dorimiu hi rau esi, nen mese mero qaravugi, nen mese kalikeli, nen mese kaligoro, a gineu vin mese garagarasi gimiu, ko nein mese veve leo rau esi.

²Igimiu nein tarani garagaragi na leoi God hi u mwasara, mwere na maresu garaqa mo tarani garagaragi na titi dena huhui retahine. A leoi God vin vei gimiu nein huire ko i God vin vagamwasoi gimiu. A Reve reve Gogona mo veve vena, “Igimiu neu ilo na doridori noi Huqe beno huri ve a nona domtabetabe lawe na tangaloi u lawua.”

⁴Igimiu nen vanai lobei na huqe i Jisas, ingeie a vatu hi mo mwaso. A sinobu ureure rahe taranie tea, nge ingeie a vatu hi i God u leowahe ko ingeie a matani vetu.

⁵Siu igimiu vage neu mwere na vatu mwaso, siu nen siregi taligugi gimiu ve nen labe mwere na beru, ve a vale talo Vui vin labe lune, ngehi ve igimiu nein voragi tangaloi rugurugu Gogona huri ve igimiu nein rugurugu gina rugurugu talo Vui lawe God. Ingeie vin lei tabetabegi na rugurugu ngerehi lo henai Jisas Kraes.

⁶Mwere na Reve reve Gogona mo veve vena: “Ineu nain tabe na vatu togaibibi lolo vanue Jerusalem. A gineu doluegi rain labe lo matani vetu lawua ngaha. Ihine tea mo lado talune vin he maemae lai tea.

⁷A vatu ngaha a mavanana mo eno hageliu lawe gimiu hi neu ladohogo. Nge lawe rahine hi rahe ladohogo tea, mwerehi a Reve reve Gogona mo veve vena, “Vatu hi a tangaloi basabasao mo leo asiesiginie ve hatie gineu lune, ingeie mo voragi na vatu togaibibi hugunei vale.”

⁸A Reve reve Gogona tuegi vage mo veve vena, “Ingeie u mwere na vatu hi mo vaire ram taturegi. A vatu hi mo vaire ram soi.” Ingere ram taturegi a vevenagi rahe ronghuri na havagineu tea hi i God mo veve, ngehi i God u vei teregagi ve vin vei lawera.

⁹Nge igimiu ira sinobu leowahe, igimiu ira tangaloi rugurugu nona Ratahigi, igimiu a sinobu gogona talo vanue gatagale, a sinobu noi God hi ve rain vei na nona taranian sibona, u leowahe gimiu ve nein laqagi huri na gineu garigiana I God u veire, ingeie u ware gimiu dena dodogi sulo nona leleo, ngehi a gineu garigiana.

¹⁰Lo taro gatagale igimiu hatie sinobu, nge siserigi ngaha igimiu a sinobu noi God. Tuei a hahagavi he vanai lawe gimiu tea, nge siserigi ngaha igimiu neu lei na hahagavi noi God.

¹¹Ira noku buluana, igimiu neu mwere na hala vano ko igimiu a tavanaiana lolo ure ngaha. Ineu nam navuhi gimiu ve nein tino vagahao dena gineu esi ngerehi a tarabesimiu ram taranire ve ran vaire, ko ngehi mo qalo goro na tamatemiu.

¹²A sinobu rahe ladohogo tea ram togadali gimiu ko bataha rain veve lai ve igimiu nem vai na gineu rau esi. Nen toga lo mwasoana garea huri ve ingere rain lehi na gineu gagareagi nem vai, ko rain waregi roroagi God lo taro hi I Kraes vin vanai taligu.

¹³Igimiu ira tangaloi nona Huqe, giniehi, igimiu nein teu hivogi gimiu lo vavara tangaloi doluegi hi i God u taure ve rain huqegi goro gimiu. Igimiu nen ronghuri na tangaloi lawua lolo nomiu Kavman ngehi u lawua liure lavasigi.

¹⁴Igimiu nein ronghurire tomtomuegi hi a qatui kavman mo horara ve rain veveginire hi ram vai gineu rau esi ko ve rain vevegarea ginire hi ram vai gineu rau garea.

¹⁵I God a nona taraniana mwerehi ve gina nomiu tabanagi garea nem vosa goro na wuwara lengai tangaloi hi ram veve leo asi vovohoi gimiu.

¹⁶Huri igimiu neu meriqe beno, siu a nomiu doridori garea vin haharaginie. Vage nein mese lado hurive neu meriqe beno mo voragi na tabegorogi ve nein vei gineu rau esi. Nge nein toga mwere ve igimiu a tangaloi tabanagi noi God.

¹⁷Igimiu nen haharagi na nomiu tanoi ladomava lawe na sinobu doluegi. Nen tabe rehavamiu lui Kraes, nein matagugi God ko nen ladomavagi na nomiu kavman.

¹⁸Igimiu a tangaloi tabana vurogi, mo eno lawe gimiu ve nein ronghuri rahine ram huqegi goro gimiu, nein ladomava ginire tamwere. Nein vei mwere ngaha hatie ve lawera hi ram vaivei garea lawe gimiu hogosie, sige ram bulu garea mei gimiu. Nge lawe rahine wagineu vage hi ram vai gagarasigi gimiu.

¹⁹Bataha nem rongo gagarasi lo tarabesimiu huri na gineu he tatarise tea ve a tangaloi vin vei gagarasigi gimiu huri, siu igimiu nem rongribi nem vano tuturedu meie, huri nem ilo ve ngehi mo huri na domi God, siu i God vin hevuhevu huri gimiu.

²⁰Tare ve ram wehi gimiu huri na gineu neu veie u esi, hatie domianagi ve dain gerigi gimiu huri nem rongribi lo nomiu leo vevegi. Nge tare ve nem gagarasi huri na gineu garea nem vaie ko nem rongribi, ngehi mo vai havuhevugi God.

²¹Ngehi a gineu i God u ware gimiu ve nein veie, a vevenagi i Kraes u gagarasi huri gimiu ko u bete na mataleleogi lawe gimiu ve nein huri lune. Siu hurive igimiu nein vei mwerehi ingeie i veie.

²²Ingeie he galegaleasi tea vohogi ko he kalikeli tea vohogi.

²³A sinobu ram veve asiesigi Kraes, nge ingeie he duvi lawera tea gina leo asi. I Kraes, lo nona rong-gagarasi, he vaga matagutegi na tangaloi tea. I Kraes u sireginire lawe God, mo kokogoroe, ingeie hi mo hakovi na vevegi vovohoi, igimiu nein tatabeginie a vevenagi i God ingeie a vevegi vovohoi.

²⁴I Kraes u weli na noda galegaleasi talo tarabesine lo gai saroutu huri ve igide dain siregi dain mese toga lolo galegaleasi taligu ko ve da tauvuigi da toga na huri na matahala vovohoi. A nona gagarasi lolo tarabesine u vei gide dam mwaso taligu.

²⁵Igimiu neu mwere na sibsib rau sala, nge siserigi ngaha neu vanai taligu lobei na nomiu leogoro Sibsib garea ko ingeie vin kokogoro na tamatemiu.