Read East Ambae 1 BITA 3 Bible Online

1 BITA 3 - East Ambae bible

1 BITA 3

¹Lo matahala mwerehi teu, ra vavine hi neu legi beno nein ronghuri retamai netumiu. Siu tare ve ira tamai netumiu rahe ronghuri na leo huhui noi God tea, a doridori hi vin veire rain ladohogo tare ve a tangaloi tea he veve waga na leogi tea lawera. Ingere rain huri lo matahala ngehi ira gaihorara ram toga lune.

²Ire tamai netumiu rain lehi na togaana mwasara hi nem toga lune, ngehi mo haharagi na nomiu tanoi ladomava huri God.

³Siu he garea tea ve igimiu nein virigi na vulumiu, sige nein vinugi na seni rau gihire lo gol sige a luqemiu rau raka ko nem haharagi ve igimiu neu garea garagara lo nagora tangaloi.

⁴Hatie mwerehi vohogi. A nomiu gareana vin vanai dena lolo lolomiu, ngehi ve vin vei gimiu nein voragi vavine rorongo, vavine ladobiti, siu a nomiu gareana vin eno vagituei, huri a doridori ngerehi rau garea garagara lo nagoi God.

⁵Ira vavine gogona tuei hi rau ladomavagi God, ko i God u bete na gareana lawera. A gareana hi mo vaire ram ronghuri tamai neture.

⁶I Sera u vei mwerehi, u ronghuri Ebraham ko u warea ve a nona huqegi ko gimiu ra vavine, igimiu ira netui Sera hogo, tare ve igimiu nem vai gineu rau garea tamwere, ko nehe matagu tea.

⁷Lo matahala mwerehi teu, igimiu a mwera hi neu legi beno, lune nem toga mei regahoramiu nein ladolado vurugegi, nein hako meire, huri neu ilo huri ve ingere rahe huire tea mwerei gimiu. Igimiu nein lado mavaginire, a vevenagi i God u bete na vaigarea u tatarise mwerehi u betea lawe gimiu, a hogogi hi mo bete na mwasoana hogo. Nein vei mwere ngaha, huri ve hatie gineu ve vin tugoro na nomiu tataro.

⁸A noku leo vagasigi ngaha. Igimiu doluegi a domimiu vin bubugi, nein vui hagavi gimiu gagatalegi, nein vui tabetabe gimiu gagatalegi mwerehi ve igimiu nem gagatale vohogi, nein lologarea ko nein ladobiti.

⁹Nein mese wono gineu esi gina gineu esi taligu. Tare ve ihine tea mo veve leo asi vovohoi gimiu, igimiu nein mese soso lawera gina leo asi taligu. Igimiu nen navuhi God ve na vai tabetabegi na tangaloi mwerehi. A vevenagi i God u ware gimiu ko u waratau ve vin bete na vaigarea lawe gimiu.

¹⁰A Reve reve Gogona mo veve vena, “A tangaloi vin vei na gineu ingere ngaha huri vin hevuhevu lo mwasoana. Ingeie vin mese laqa lo gineu rau esi, ko vin mese veve leo kalikeli.

¹¹Ingeie vin siregi vena mese vai gineu rau esi ko vena vai gineu rau garea. Ingeie vin hike wawahiligi na tamwata ko vin tabana hurie.

¹²A Huqe mo lehi na sinobu hi rau garea ko mo rorongtagi na nora tataro, nge a Huqe mo tavului vuro mei rahine ram vai gineu rau esi.”

¹³Tare ve nem vaileo siaga ve nen vai gineu rau garea, ihine tea vin he vai lei tea vena vaivei gimiu.

¹⁴Nge hatie tare ve igimiu nem rong-gagarasi huri na gineu garea nem vai, huri a Huqe vin vei gareagi gimiu. “Igimiu nein mese matagu gina gineu hi ingere ram matagu ginie, igimiu nein mese ladoasi huri na gineu ngerehi.”

¹⁵Nge nem ladomavagi Kraes, ve ingeie i Huqe u gogona lolo lolomiu. Igimiu nen rarai gesegi ve nein duvi goro hine tea mo hui gimiu huri na nomiu ladotare. Nge igimiu nein duvi gina leo rau makemu ko gina ladomava,

¹⁶igimiu nein rongo lolo rongrongomiu huri na nomiu mwasoana garea lui Kraes vin vovohoi gesegi, huri tare ve irahine hi ram veve asiesigi gimiu rain maemae.

¹⁷Siu u garea huri ve igide dain rongo gagarasi huri na gineu dam vai u garea i liu denie hi dam vai gineu rau esi, tare ve i God mo tarani mwerehi.

¹⁸I Kraes sibona u rongo gagarasi huri na galegaleasi vagatagale hogosie. Ingeie he vagasile tea lo galegaleasi, nge ingeie u rong-gagarasi huri na sinobu rau soi lo galegaleasi vena laire vano lawe God. Rau ue vagamate na tarabesine, nge ingeie u maraga taligu lo Vui.

¹⁹Ko lo mwasoana ta lo Vui hi, ingeie u vano mo toretore lawera hine rau mate beno ram toga vau.

²⁰Irahine hi rahe masinge tea ve rain ronghuri God tuei beno lo taroi Noa. I God u raraire gina rongribi lune i Noa u bulu na aka. A sinobu tegaivihe, ingere gai welu doluegi, u vagamwasoire gina wai.

²¹Ko a wai hi u mwere na garuhigogona ngehi mo vagamwasoi gimiu hibagataha, hatie mwerehi dam solo vohogi na soko dena tarabeside, nge a waratau i God u veie tuei beno. Ko ngaha mo woro lune i God u vei ragasi Jisas Kraes dena mateana.

²²Siserigi ngaha u hage taligu eulu ko mo toga lo matuei God mo mamalu gorora engsel, ira lawua ko a huireana doluegi.