Read East Ambae 1 BITA 4 Bible Online

1 BITA 4 - East Ambae bible

1 BITA 4

¹Lune i Kraes u toga lolo ure ngaha, u rong-gagarasi lo tarabesine, igimiu nen vai siagagi gimiu doluegi gina matahalai ladolado ngehi u eno mei Kraes. Ihine tea mo rongo gagarasi lo tarabesine a galegaleasi u rovo denie.

²Igimiu nen vai siagagi gimiu sibomiu lune nem toga hano lolo ure ve nen vai na havagineu hi i God mo tarani, nge hatie ve nein vei na gineu hi a sinobu ram tarani.

³Lo taro tuei, lune igimiu neu toga tau lolo dodogi, igimiu neu veivei nomiu u lawua, neu vei na gineu ngehi a tangaloi rahe ladohogo tea mo havusire ve ran vaire. Igimiu neu vagasile lo vavine, a domimiu rau virigi lo taratarani esi, nem vai hinaga lalawua huri nem bea na vavine lune, nem inu waen nem torongo dadavule ko nem huduhudu goro na tarabesi nunui gineu.

⁴A tangaloi ngerehi rahe ladohogo tea ram garigi huri igimiu nehe bulu tea meire lo gineu ngerehi ram vaire, siu ingere ram tauvuigi ram tau geivutugi gimiu.

⁵Nge ingere rain rarai huri rain matamwasaragi na gineu ingere ngaha lawe God, huri ingeie mo rarai vena veveginire hi ram mwaso tau ko ingerehi rau mate beno.

⁶Giniehi, i Kraes u waregi sere na Roro Garea lawera hi rau mate beno. Hatie huri rau lehi na leo vevegi beno mwereire sinobu doluegi, i Kraes u waregi sere na Roro Garea lawera siu huri ingere rain toga lo vui garea mwerehi i God mo toga.

⁷A taro mo kakarani huri ve a gineu doluegi rain rovo, siu igimiu nen ladolado vurugegi ko nen vai na domimiu na mwasara huri nein kokogoro lai gimiu sibomiu, huri igimiu nein tataro lai.

⁸Hageliu igimiu nein vui tabetabe gimiu gagatalegi a vevenagi a tabetabe vin dori na domire tangaloi hi rau galegaleasi rain lado wenigi, ko a bugure rain meriqe.

⁹Igimiu nein rarai huri ve nein lei vurugegi gimiu gagatalegi talo valemiu ko nein mese singo tutubu gi gimiu.

¹⁰I God u bete na hogogi rau wegiwegineu lawera nona tangaloi tabana vurogi. Iniko goin wahegi na nomu hogogi ve na bului rahine wagineu.

¹¹Ihine mo laqa, na veve leo hi ram vanai dein God. Ihine mo tabanagi na tabana gina huireana hi I God u bete lawea, siu lo gineu doluegi i God vin lei na veve garea lui Jisas Kraes, a huireana ko a varavara a nona gahea vin tuei, vin tuei. Amen.

¹²Ira noku buluiana, igimiu nein mese vutugegi huri na gineu esi ngerehi ram vanai ve ran vai lehi gimiu. A havagineu ram vai lawe gimiu ve rau wegineu.

¹³Nge igimiu nen havuhevu huri nem bulu mei Kraes lo nona gagarasi, siu huri igimiu nein horo gina havuhevu lune i Kraes vin vanai lolo varavarana.

¹⁴Lune a sinobu ram vaivei gimiu a vevenagi nem huri Kraes, igimiu nein lei na vaigarea a vevenagi a vui roroa noi God mo toga lumiu.

¹⁵Igimiu nein mese rong-gagarasi huri na uevagamate tangaloi, sige a balubelu gineu esi tea wagineu, sige nem vaga romasiginire sinobu wagiwegineu.

¹⁶Nge tare nem gagarasi huri nem ladohogo lui Kraes, igimiu nein mese maemae huri. Nen veve garea lawe God huri nem wali na henai Kraes.

¹⁷Taro mo tavuigi siserigi ngaha huri God vin veveginire nona sinobu. Tare ve a vevegi mo tauvuigi mei gide, nge wuraha hurire hi rahe ronghuri na Roro Garea noi God tea?

¹⁸Tare ve u siaga mena tangaloi garea ve vin mwaso, siu tangaloi esi hi ko tangaloi galegaleasi vin sala.

¹⁹Irahine ram tabanagi tuturedu lo gineu rau garea ko ram rong-gagarasi mo huri mwerehi i God mo tarani, ingere rain lado talui God ve vin kokogoro na tamatera.