Read East Ambae 1 BITA 5 Bible Online

1 BITA 5 - East Ambae bible

1 BITA 5

¹Siserigi ngaha a gineu mo eno lolo loloku ve nain veve lawera tamaragai talolo warelue lo nomiu burigi, huri ineu vage a tamaragai lolo warelue. Ineu nau ehi Kraes gina mataku, lune ingeie u rong-gagarasi lo tarabesine. Ineu a gineu gagareagi ram eno raraieu lo eulu, huri ve nain waheginire lawe na sinobu wagiwegineu lo tarogi i Kraes vin vanai taligu. Ineu nam tarani ve na veve lawe gimiu ve,

²igimiu nein leohuri vurugegi na tangaloi ngerehi i God mo betera lawe gimiu mwere na leogoroi sibsib, ngehi mo leohuri vurugegi na bulana sibsib. Igimiu nein leohuri vurugeginire gina loloi taqangimiu vin huire mwerehi i God mo tarani. Nein mese vaie mwerehi ve ihine tea mo garogi gimiu huri ve nen vaie sige nem tarani na gaivoli, nge nen vaie gina nomiu lologarea.

³Igimiu nen mese vaileo ve nen huqegi gorora hi i God u teure lo limemiu. Igimiu nein haharagi na taikeru garea lawe na nomiu tangaloi ve rain huire lune. Mwere na sibsib ram huri na tangaloi mo leogorora.

⁴Siu lune i Kraes a muei Leogoro Sibsib vin vanai, igimiu nein lei na gairorovi qetu nona ratahigi, ngehi vin he qenu lai tea.

⁵Siu lo matahala mwerehi, ira mwalakelo rain mesinge ve rain tino lo vavara tomtomuegi rau sesea taligu denire. Igimiu doluegi nein lado wuweugi gimiu gagatalegi. Mwerehi a Reve reve Gogona mo veve vena, “I God mo tavului vuro meire hi ram sagesagera, nge mo bete na hogogi lawera hi rau lado biti ginire.”

⁶Igimiu nen tino gina lado wuweu lo vavai limei God u muremure, huri ingeie vin heu hagagi gimiu a tarogi vovohoi vin vanai.

⁷Igimiu nein bete doluegi na havagineu tea ngerehi ram tatu mei gimiu, a vevenagi ingeie mo leohuri gimiu.

⁸Igimiu nein leohuri ko nein rarai, huri a nomiu tavalui vuro hi i Setan mo dige lategi mwere na laeon hi mo mwaruruhi mo ulogina dilo lawua vena gani hine tea gatagale.

⁹Igimiu nen labe siaga lo nomiu ladohogo, huri nein qalo lai goroe ko igimiu neu ilo ve ire havamiu lui Kraes lo vataha hugunei ure doluegi rau haqe na gagarasi mwerehi igimiu neu haqea.

¹⁰Lo tagui gagarasi hi u hogosi gimiu huri na mahogi qilodo, nge i God u hako mei gide gesegi gina nona domtabetabe lawua, vage u ware gimiu ve nein bulu mei Kraes lo mwasoana garea ta eulu ngehi vin he rovo lai tea. Igimiu nein rongo gagarasi lo tarabesimiu huri na mahogi tea qilodo hogosie, siu lo tagugi hi i God sibona vin bete na huireana ko a vevegi vovohoi lawe gimiu, huri ve nein labe siaga lai.

¹¹Ingeie mo hakovi na managi doluegi ko mo huqegi goro na gineu doluegi vagituei, Amen.

¹²A noku leta qilodo ngaha i Saelas u ulie laweau, ngehi nau horae lawe gimiu. Ineu nam leo hogosie ve ingeie i tuada lui Kraes, ingeie a tangaloi garohuri, giniehi nam ladohogoginie. Ineu nam tarani ve nan vaga mwamwavigi na domimiu gina leta ngaha. Vage ineu nam tarani ve nan matamwasaragi na matahala ngehi i God mo hako mei gide gina nona dom tabetabe lawua hi u garea garagara. Igimiu nein labe siaga lune.

¹³A warelue lo qatui venue lawua Babilon ram hora nora veve garea lawe gimiu. I God u leowahera mwerehi u leowahe gimiu mwerehi ve i retuemiu vohogi. I Mak, i netuku lui Kraes, ingeie vage mo hora nona vevegarea lawe gimiu.

¹⁴Lune nem garigerigi gimiu gagatalegi, u garea ve nen garigerigi gimiu gina sungusunguni gogona, ngehi mo haharagi ve nem vui tabetabe gimiu huri nem vui tuitui lui Kraes. A tamwata na toga mei gimiu doluegi hi nem toga lui Kraes.