Read East Ambae 2 BITA 1 Bible Online

2 BITA 1 - East Ambae bible

2 BITA 1

¹Ineu Saemon Bita, a tangaloi tabanagi ko a gaihora noi Jisas Kraes, nau uli na leta ngaha lawe gimiu hi neu lei na ladohogo ngehi u garea ko u vovohoi mwerehi igamai gau leie. A ladohogo hi nau leie mo vanai dena noda vagamwasoi i Jisas Kraes ko a noda God.

²A noku tataro ve igimiu nen horo gina hogogi ko a tamwata, a vevenagi neu ilo vurugegi God hogo ko i Netune i Jisas Kraes a noda Huqe.

³Lo managi noi God, ingeie u bete na gineu gagareagi doluegi hi dam tarani garagaraginire lo mwasoada ko ve da tabana lawe God. Igide dau lei na gineu ingere ngaha, a vevenagi igide dau iloe. I Jisas u ware gide gina mwasoana u roroa ko gina nona gareana.

⁴Huri na gineu ingere ngaha, ingeie u bete na waratau lalawua ko rau garea garagara. Siu lune igimiu neu lei na gineu ngerehi, igimiu nein bela lai dena taratarani esi talo ure ngaha, ngehi mo vai soloragi na tangaloi, ko nein bulu lei mei God lo nona gareana.

⁵Giniehi, igimiu nen labe siaga ko nen vai siagagi na nomiu ladohogo lo nomiu doridori garea ko gina nomiu mataisao.

⁶Lune igimiu neu lei na mataisao hi beno, siu igimiu nein haharaginie ve nein labe goro na taratarani esi talo tarabesimiu. Tare ve nem vai lei mwerehi, igimiu nein haharaginie ve lune nem labe siaga lo nomiu tabana ngehi mo haharagi ve nem vai na taraniana noi God.

⁷Siu a doridori garea hi u tatarise lo nagoi God, nein teu buluie gina nomiu tabetabe huri rehavamiu lui Kraes, siu a nomiu tabetabe huri rehavamiu lui Kraes, nein teu buluie gina tabetabe lawera doluegi.

⁸Tare ve a gineu ingere ngaha ram eno mei gimiu ram mauri, ko rain wei mwasigi lolo nomiu iloilo huri na noda Huqe i Jisas Kraes.

⁹Tare ve ihine tea a gineu ingere ngaha rahe eno tea lolo mwasoana, u mwere na tangaloi matadodo ko vin he leo lai tea ve a nona galegaleasi ta tuei u mwasara denie beno.

¹⁰Retueku, ko irehaqeku, igimiu nen vai leo siaga ve nen ilo vurugegi ve i God u ware gimiu ko u leowahe gimiu, nem vai na gineu ingere ngaha, nein he soi lai tea.

¹¹Siu huri God vin lei vurugegi gimiu sulolo Ute ta eulu ngehi a noda Huqe ko a vagamwasoi i Jisas Kraes mo ratahigi lolona.

¹²Igimiu nem ilo na gineu ingere ngaha, ko nem labe siaga lo hogo, nge ineu nain bului gimiu tamwere.

¹³Ineu nam lado haqe na gineu ingere ngaha, lune nam mwaso tau lo tarabesiku.

¹⁴Ineu nam ilo ve vin he ribi tea nain siregi na tarabesigi ngaha, mwerehi a noda Huqe i Jisas Kraes u haharaginie laweau.

¹⁵Ineu nain vei gina noku ragahui, ve igimiu nein ladobibi lei na gineu ingere ngaha lo tagugi hi ineu nau vano beno.

¹⁶Lune igamai gau veve lawe gimiu huri na huireana talo vanaiana taligu noi noda Huqe i Jisas Kraes, igamai gahe veve te gineu ngehi ve a tangaloi mo domigi mo veve. Nge gau lehe gina matamai hogo ve a nona huireana u lawua garagara.

¹⁷Lo taro hi i God mo tabe hagagi na henana, mo vai na leleo mo leleo dalie, igamai gaitolu kakarani taiehi. I Jisas u rongo na dilo hi mo laqa lawea, a dilo mo vanai dena leleo lawua hi, mo veve vena, “I netuku a mweratabe nge ngaha, ineu nau rong garea garagara ginie.”

¹⁸Igamai gau rongo na dilo hi mo vanai dena eulu, lune igamai gau tino mei Jisas lo vusi gogona.

¹⁹A gineu ngerehi ram vai gamai gam leohogosi na leo nora tangaloi ligoligogi ram eno lune. U garea ve igimiu nen rong huri vurugegi na leo ligoligogi ngerehi, huri a leo nora tangaloi ligoligogi u mwere na leleo hi mo waga lolo dodogi. A leleo hi vin leleo vin dadari mo mamarae gi reni ko a Mwasoi Reni vin mwelue mo leleohagi na taqangimiu.

²⁰Lo eulu a gineu ingere ngaha doluegi, igimiu nein ladolado lune, ve a iloiloi leo nora tangaloi ligoligogi, ngehi mo eno lo Reve reve Gogona, ihine tea vin he vai lei tea vena mata-mwasaraginie lo iloilona sibona.

²¹Huri a leo ligoligogi he vanai tea dena domdomi nona tangaloi hogosie, nge a Vui Gogona u tomuegi na tangaloi ligoligogi rau veve leo hi ram vanai den God hogosie.