Read East Ambae 2 BITA 2 Bible Online

2 BITA 2 - East Ambae bible

2 BITA 2

¹Tuei a tangaloi ligoligogi kalikeli rau tino lolo livugei sinobu noi God, vin vei mwerehi vage mei gimiu, a huhui kalikeli rain vanai lolo nomiu burigi. Ingere rain huhui na gineu rahe garea tea hiligi, a leo huhui ingerehi rain vei na sinobu rain sala. Vage ingere rain he tarani tea ve rain lei vurugegi na Huqe i Jisas, ingeie hi u voli tuguhire dena nora togavau. Siu a doridori mwerehi vin veire rain esi ginie sibora, vin he ribi tea.

²Ingere rau sao rain huri na nora matahala rau esi ko ingere rain veve gineu rahe garea tea ko ram qalo goro na hogo.

³A huhui kalikeli ngerehi ram tarani na nomiu mane, siu ingere rain veve leo kalikeli lawe gimiu hogosie, a leo ngerehi ingere ram domigi sibora ram veve. Nge i God vin veveginire, a leo vevegi ngaha mo dule lo ulure, i God u vagatai hurire tueituei vohogi beno, ingeie vin vei makaragi vohoginire.

⁴Igimiu neu ilo ve ira engsel rau galegaleasi i God he siregi rorongo ginire tea, ingeie u tulire talolo avi redu. Aiehi, ingeie u veuhire gina seni ram toga lolo dodogi, ingere ram toga rarai na Rani hi i God vin veveginire.

⁵Ko i God u vevegi na ure tuei beno, lune u vei na valololo mo horo luluwegi na ure, ngehi u horo gina sinobu hi ram qaloqalo meie. Nge i God u vagamwasoi Noa hi u toretore mo veve na doridori garea ngehi mo vai na tangaloi mo vovohoi mei God ko a tangaloi gaibitu vage meie.

⁶I God u vei vohogi na vanue Sodom ko a vanue Komora, ingeie u hurara gineu avi ram gaogao ram voragi qie. Ingeie u vei na togagi venue lalawua gairue hi mwerena mata leleoi havagineu vin vei lawe rahine hi ram qaloqalo mei God.

⁷Ingeie u vagamwasoi Lot, a tangaloi hi a doridorine u garea. Ingeie mo rongesi lo doridorire tangaloi esi ram vai gineu rau esi lolo vanue hi.

⁸I Lot ingeie a tangaloi garea, nge a vevenagi ingeie u toga mena sinobu rau esi ko mo rongoe ngehi mo vai na lolo lolona mo garasie.

⁹Siu a Huqe u ilo ve vin vagamwasoi rahine ram tabanagi lawea lune a gineu esi ram vanai. Ingeie vin wiribibire sinobu rau esi ko vin veveginire, lune ingere ram rarai huri na Rani vevegi vovohoi vin vanai.

¹⁰A leo vevegi mo eno lawe rahine hi ram vai gineu rau esi ngehi ingere sibora ram taranie ko ingere hi ram leoleo hivogi God. Ira huhui kalikeli ngaha rahe matamatagu tea ko ram vai gineu mwere ram tarani. Ingere rahe matagu tea ve rain veve leo asi vovohoire Engsel.

¹¹Ko ira Engsel rau lawua liu denire huhui kalikeli ngerehi, nge ingere rahe veve asiesiginire tea lo nagoi God.

¹²Nge a sinobu ngerehi rahe ronghogo tea ram veve asiesigi na gineu ngehi ingere sibora rahe ilo tea vurugegi. Ingere ram mwere na kakarue, ram vai gineu mwere ve hatie domire lure. Ingere ram mwerena kakarue, igide dau wiribibire ve dai ue vagamatera. Huri a nora doridori rau mwere na kakarue, ira huhui kalikeli ingere ngaha i God vin vei vohoginire.

¹³Ingere rau vei na sinobu ve rain gagarasi, siu ingere sibora rain gagarasi. Ngehi a gaivolire huri na havagineu rau vei. Siu mo havusire huri ram vai na gineu esi lo ute lawua, ingere rau mwere na qatuisoko lolo livugemiu. Ingere ram havuhevu huri ram kali gimiu lo tarogi ram gagani bubugi mei gimiu.

¹⁴Vataha tarogi lune ingere ram lehi na vavine, a domire mo taranie ko a nora taraniana huri na galegaleasi hi he mavo lai tea. Ingere ram tomuegi na sinobu hi rau kekena ve ran holi lolo vunei galegaleasi ko rau vangani na lolo lolora gina lado lawua. Siu i God vin veveginire.

¹⁵Ira huhui kalikeli ingere ngaha rau ehu beragi dena matahala vovohoi ko rau vagasalagi na malelei turegire, rau huri na matahala ngehi i Balam u hurie. I Balam a henai tamana i Beo, ingeie u rong garea huri mo lai mane mwere a gaivoline huri mo vai gineu rau esi.

¹⁶Nge a dongki ngehi he gato lai tea, u veve lawe Balam huri ve ingeie u galegaleasi. A dongki hi, u gato mwere na tangaloi ko mo tugoro na tangaloi ligoligogi huri na nona lado rerarera.

¹⁷Ira huhui kalikeli ngerehi rau mwere na matamata hi u meutu ko u qegu beno, vage ingere rau mwere na dodo hi a langi lawua mo here mo susuni vohoginire. Siu i God u vei vagatai na ute hurire beno, a ute hi u dodoga, u dodoga garagara.

¹⁸Ingere ram sagera mena leo ngerehi hatie iloilogi lure. Nge mena nora taratarani esi ram tomuegi na sinobu ve ran holi lolo vunei galegaleasi, a sinobu ngerehi rabei mwelue denire lavasigi hi ram toga mosigei lolo galegaleasi.

¹⁹Ingere ram warataugi lawera ve rain meriqe, nge ingere sibora rahe mariqe tea. Ingere a tangaloi tabana vurogi lawe na gineu doluegi hi rain salasala. Huri a sinobu ram voragi na tangaloi tabana vurogi lawe na gineu ngerehi ram ligo bibire.

²⁰Ingere rau meriqe dena gineu esi lolo ure, a vevenagi ingere rau ilo Jisas Kraes a noda Huqe. Nge tare ve ingere ram tudori taligu sulo gineu rau esi ko a gineu ngerehi ram ligo bibire, siu ngehi vin esi lawera vin liu taligu denie hi tomue.

²¹Tare ve tangaloi he ilo na matahala vovohoi tea vohogi, u garea meie u liu dena tangaloi hi u ilo na matahala vovohoi ko mo tudori dena leo huhui gogona ngehi i God u bete lawea.

²²Ingere rau vei na gineu ingere ngaha mwere na gato tavalu hogo hi mo veve vena, ‘A wiriu mo vano taligu mo gani na havagineu hi u lueginie,’ ko, ‘A boe, lo tagugi hi u gagaru gina wai mwasara beno ko mo vano mo talele lolo maka taligu.’