Read East Ambae 2 BITA 3 Bible Online

2 BITA 3 - East Ambae bible

2 BITA 3

¹Ira noku buluiana, a leta tuegi ngaha nau ulie lawe gimiu. Nau uli na leta gairue hi, nam tarani ve nan vaga mwamwavigi na domimiu huri ve nein lado bibi na gineu ngerehi, vage huri ve a domimiu na virigi lo gineu hi rau bagoto.

²Ineu nam tarani ve igimiu nen lado taligu huri na leo ingere hi a tangaloi ligoligogi gogona rau laqagi tuei, ko nen lado haqe na Leohora noi noda Huqe, ngehi u betera lawe gamai ko igamai gam veve lawe gimiu.

³Siu u garea ve igimiu nein ilo na gineu hi ve rain vei lo Rovonai Bongi. A sinobu rain vei gineu rau esi lo ute lawua rain he maemae tea ko ingere rain managi gimiu.

⁴Ingere rain veve vena, ?I Jisas u warataugi ve vin vanai taligu. ?Siu i ngehi logo? Ira tubumai rau mate, u tevuigi tuei beno lune hi i God u teu na ure ngaha, mo dadari gaqarigi a gineu rahe dori tea.?

⁵Nge ingere rahe tarani tea ve rain lado bibi na gineu ngerehi rau vei tuei beno huri i God u teu na mahava gina leona, ko gina leona u vei na tano mo maraga dena wai ko u teue gina wai.

⁶Siu a ure u dono ko u sala gina wai.

⁷Ko gina leo hi tau, a mahava ko a ure rom rarai ve roin vano lolo avi. Ingere ram rarai na Rovonai Bongi, nge i God vin vei vohoginire hi ram qalo meie.

⁸Ra noku buluana, nein mese galuvegi na gineu gatagale ngaha, huri ve lo nagoi God, a rani gatagale u mwere na rani teri vagatagale ko a higao teri vagatagale u mwere na rani gatagale hogosie.

⁹A Huqe he vaivei riribi tea ve vin vei na gineu ngerehi u warataugi teu, nge lo nona hahagavi mo rongribi mei gimiu. A vevenagi ingeie he tarani tea ve ihine tea gatagale dein gimiu ve vin sala, nge mo tarani ve a sinobu doluegi ran dori na taqangire ko rain mwaso.

¹⁰Nge a Rani nona Huqe vin vanai mwere na tangaloi belu hi mo vanai, a tangaloi he iloe tea. A dodo vin salasala gina dilogi u lawua. Ko a gineu doluegi lolona rain gao vohogi gina avi u mwamwavi garagara ko a ure, a gineu lolona rain gao vohogi vage.

¹¹Siu lo matahala mwerehi, a gineu doluegi rain salasala. ?Nge igimiu a hava sinobu? Igimiu ve nein toga lo togaana gogona, ko nein tabanagi lawe God.

¹²Lune nem rarai ko nem leo toratora huri na Rani noi God hi ve vin vanai. Lune a Rani vin vanai, a dodo vin salasala gina avi, ko a gineu doluegi lolona rain hale gina mwamwavi evi hi.

¹³Nge i God u vei na waratau lawe gide, ko igide dam rarai na eulu garaqa ko a ure garaqa ngehi a gareana hogosie mo toga aie.

¹⁴Iretueku mweratabe, lune nem rarai na gineu ngaha ve na vai, nen vai leo ve nen mese vai na galegaleasi ko a henamiu nase asi lo gineu. Nen vaileo ve nen toga tamwata mei God.

¹⁵Igimiu nen ladohaqe ve igide dau mwaso, a vevenagi a noda huqe u rongribi. I tuada mweratabe i Bol u veve na gineu hi teu lawe gimiu lune ingeie u uli na leta lawe gimiu gina mataisao hi i God u bete lawea.

¹⁶Ingeie u uli huri na gineu ngaha lo nona leta doluegi. A gineu lavasigi lolo leta noi Bol rau siaga ve dain ronghogosire, ko a sinobu ngerehi rahe iloilo tea ko a nora ladohogo u kekena ram wahegi na gineu ingere ngaha he huri na matahala vovohoi tea. Ingere ram wahegi na Reve reve Gogona lavasigi vage he huri na matahala vovohoi tea vage, nge ingeie hi mo haharagi ve ingere ram vai vohoginire sibora lune ram vaie mwerehi.

¹⁷Retueku mweratabe, huri igimiu neu ilo huri na gineu ingere ngaha beno, nein leohuri. Nein mese siregi ve a sinobu esi ngerehi rain tomuegi beragi gimiu sulo lo nora vai vagasile hi ram vai. Nein leo huri, siu huri igimiu nein he soi tea dena nomiu ladohogo siaga.

¹⁸Nge a mwasoamiu na mauri na huri na iloiloi noda Huqe ko i vagamwasoi i Jisas Kraes. Waregi roroi lawea hibagataha ko vagituei. Amen.