Read East Ambae 1 JON 2 Bible Online

1 JON 2 - East Ambae bible

1 JON 2

¹Renetuku nam uli na leo ngaha lawe gimiu huri ve nein mese vai na gineu hi rau esi. Nge tare nem galegaleasi, huri i Jisas Kraes ingeie hi u vovohoi, u labe lo nagoi God Mama mo laqa huri gide.

²I Kraes u rugurugu ginie sibona, huri vena riqe na bugude doluegi, a asiana hi hatie noda hogosie, nge a asiana nora tangaloi doluegi lolo ure.

³Tare dam ronghuri na leo waratau noi God, igide dain ilo vurugegi, huri ve dau ilo God.

⁴Tare ve ihine tea mo veve vena “Ineu nau iloe,” nge he ronghuri na nona leo waratau tea, a tangaloi mwerehi a tangaloi kalikeli, a leo hogo he eno tea lune.

⁵Ihine hi mo rono huri na leoi God, a tangaloi hi u tabe God hogo. Ihine hi mo veve vena ingeie mo toga lui God, u tatarise ve nge vin huri na taikerui Jisas Kraes. Mwere dau ilo vurugegi huri ve igide dam toga lui God.

⁷Retueku, a leoi waratau ngaha nam uli lawe gimiu hatie leo garaqa, a leo waratau tatuei, i ngehi neu wiribibie beno lo vuigi mo dadari bagataha. A leo waratau tatuei hi neu rongoe beno.

⁸Nge ineu nam reve na leohora garaqa lawe gimiu. A leohora garaqa ngaha a hogo, nein lehi na leohogogi lui Jisas ko lumiu sibomiu. Huri a dodogi u vano beno, nge a leleo hogo mo leleo.

⁹Ihine tea mo veve vena, “Ineu nam toga lo leleo,” nge ingeie u vei esiesigi tuana, a tangaloi hi mo toga lolo dodogi mosigei.

¹⁰Ihine tea hi mo vaivei garea mei tuana ngehi mo toga lo leleo, ingeie he vai tuana tea vena soi lo galegaleasi.

¹¹Nge ihine tea hi mo vai asiesigi tuana, nge hi mo dige lolo dodogi, mo dige he ilo na turegi tea ve mo vano logo a vevenagi a dodogi hi mo vaie a matana mo dodo.

¹²Igimiu ira maresu wuwerigi, nam uli na leo ngaha lawe gimiu huri a nomiu galegaleasi God u lado vohogi beno, a vevenagi i Kraes.

¹³Igimiu ira tama, nam uli na leo ngaha lawe gimiu vevenagi igimiu neu iloe beno lo tauvuigi. Igimiu ira mwalakelo, nam uli na leo ngaha lawe gimiu huri igimiu neu qoragi Satan beno.

¹⁴Igimiu ira maresu wuwerigi, nam uli na leo ngaha lawe gimiu a vevenagi igimiu neu ilo Tamada. Igimiu ira tama, nam uli na leo ngaha lawe gimiu vevenagi igimiu neu iloe beno lo tauvuigi. Igimiu ira mwalakelo, nam uli na leo ngaha lawe gimiu vevenagi igimiu neu labe siaga, a leoi God u eno lolo domimiu, neu qoragi Satan beno.

¹⁵He garea tea ve igimiu nein leo garea na doridorinai ureure ko a gineu hi ram eno lolona. Tare nem leo garea na doridorinai ureure a gareana noi Tamada he eno tea lumiu.

¹⁶A taratarani esi doluegi ram vomai dena ureure, a gineu ngerehi a tarabeside mo taranie, a gineu ngerehi a matada mo taranie, ko a sagesage a vevenagi dam voragi, mwerai homu. A gineu ngere ngaha rahe vomai tea dein Mama.

¹⁷A ure ngaha mena gineu gagarea hi a sinobu ram taranire, rain sala. Nge a sinobu hi ram vai na taraniana noi God, ingere rain mwaso vagituei.

¹⁸Renetuku, vin he ribi tea a ure ngaha vin sala. Nam veve lawe gimiu gesegi huri ve a tavuluivuro noi Kraes rain vomai. Nge siseri ngaha a tavului vuro noi Kraes rau vomai beno. Giniehi, dain veve lai ve a ure ngaha vin he ribi tea vin rovo.

¹⁹A tavului vuro ngerehi rau vano beno den noda burigi rau siregi na noda burigi ingere hate mei gide hogo. Ve mwere rau bubuginire mei gide hogo, nase vai rain tino rorongo mei gide, nge rahe tino tea. Siu ram siregi gide u matamwasara lawe gide huri ve gatagale denire hatie mei gide.

²⁰Igimiu hi i Kraes u tangovi gimiu gina Vui Gogona beno. Siu ngaha igimiu doluegi neu ilo na hogo.

²¹Giniehi, nam uli na leo ngaha lawe gimiu, hatie huri ve nehe ilo na leo hogo hi tea, nge igimiu neu ilo huri ve a kalikeli vin he vanai lei tea dena hogo.

²²?Nge ihine hi a tangaloi kalikeli? A tangaloi kalikeli ngehi mo veve ve i Jisas ingeie hatie i Kraes. Ingeie hi a tavului vuro noi Kraes, huri mo rahagi Tamada koi Netune vage.

²³Ihine tea mo rahagi Netui mo rahagi Tamana vage, nge ihine tea mo lado hogo gi Netui, nge mo lai tabetabegi Tamana vage.

²⁴Nein leo huri vin garea huri a leo hi neu rongoe beno lo tau vuigi vin eno lolo domimiu tamwere. Tare ve a leo hi neu rongoe lo tavuigi vin eno lolo domimiu tamwere, igimiu nein toga lui Netui koi Mama.

²⁵I Jisas u warataugi lawe gide huri na mwaso radu.

²⁶I neu nam uli lawe gimiu huri na tangaloi ngerehi rain keli gimiu.

²⁷Siu igimiu hi i Kraes u tangovi gimiu gina nona Vui Gogona beno, ngehi a Vui Gogona mo toga lumiu igimiu nein he tarani hine tea vena huhui gimiu. A Vui Gogona a hogo mo huhui gimiu huri na gineu doluegi. Siu igimiu nem toga lui Kraes mwerehi a Vui Gogona u huhui gimiu huri ve nein veie.

²⁸Renetuku, igimiu nen toga lui Kraes lune nge vin vomai taligu igide dain labe siaga ko dain he maemae lai tea.

²⁹Neu ilo beno ve i Kraes nge u vovohoi, ingeie gimiu neu ilo vurugegi huri ve a tangaloi ram vai gineu u vovohoi, ingere ira netui God.