Read East Ambae 1 JON 3 Bible Online

1 JON 3 - East Ambae bible

1 JON 3

¹Nein leo, i Tamada i God u tabe gide u liu. A nona tabetabe u lawua garagara giniehi mo waregi gide vei renetune. Siu a hogo igide ira renetune. A sinobu talo ure rahe ilo tea huri ve igide ra renetui God, a vevenagi rahe ilo God tea.

²Ra buluana, igide ira renetui God, ne he haharaginie tea mosigei huri igide dain vonai wuraha, igide dain mwereie a vevenagi igide dain lehe gina matada huri ve ingeie hogo.

³Lune igide dam lado rarai hurie dain vei mwasaragi gide mwerehi i Jisas ingeie u mwasara.

⁴Ihine hi mo vai na galegaleasi, mo vai utuhi na tamwata noi God, a vevenagi a galegaleasi u vei na tangaloi mo vai utu na tamwata noi God.

⁵Neu iloe ve i Kraes u vanai beno vena lai vohogi na galegaleasi nora tangaloi doluegi. Vage ingeie a asiana he eno tea lune vohogi.

⁶Siu irahine hi ram toga bubugi mei Kraes rahe vai na galegaleasi tea, nge irahine hi ram galegaleasi gesegi rahe lehi Kraes tea ko rahe iloe tea.

⁷Renetuku, nein mese siregi na tangaloi ve ran kali lehi gimiu. Ihine hi mo vai na gineu garea ingeie a tangaloi vovohoi, mwerei Kraes ingeie u vovohoi.

⁸A tangaloi mo vai na galegaleasi gesegi, ingeie i netui Satan, huri ba i Satan mo vai na galegaleasi gesegi, u teuvuigi tuei vohogi lune a ure he eno tea tau. Giniehi i Netui God mo vomai ve na vai vohogi na lalakogi ingere hi i Satan u veire.

⁹A tangaloi ngehi i netui God, ingeie he vai na galegaleasi tea gesegi, huri God u bulu meie beno lo mwasoana. Siu ingeie vin he vai na galegaleasi tea gesegi a vevenagi ingeie i netui God.

¹⁰A doridori nai tangaloi me haharagi luae huri ve ingeie i netui God, sige ingeie i netui Satan. A tangaloi hi a doridorine he vovohoi tea, he tabe tuana tea, ngehi hatie netui God, ingeie netui Satan.

¹¹A leo garea hi neu rongoe lo tauvuigi ngehi huri ve dai vui tabetabe gide.

¹²Dai mese vai mwerei Ken, a tangaloi noi Satan u ue vaga mate tuana vohogi. ?Huri havai i Ken mo ue vaga mate tuana? Huri i Ken u vei na gineu rahe vovohoi tea, ingeie tuana u vei na gineu rau vovohoi.

¹³Retueku, nei mese awogi huri a tangaloi hi ram huri na doridorinai ureure ram leo masi gimiu.

¹⁴Nau iloe ve dau mwelue dena mateana beno, dau vomai lolo mwasoana, a vevenagi dau iloe huri dau vui tabetabe gide. Ihine hi he tabe tuana tea, ingeie mo toga radu lolo mateana.

¹⁵Ihine tea hi mo vai leomasi tuana, ingeie a tangaloi ue vagamate, siu igimiu nein iloe huri ve ihine tea hi mo ue vagamate tangaloi vin he lai na mwasoana radu tea.

¹⁶Siu dau ilo na tabetabe hi huri i Kraes u siregi na mwasoana huri gide, siu igide vage dai siregi na mwasoada lawera tangaloi wagineu.

¹⁷Tare ve a tangaloi tea a nona hako gineu u sao, mo lehi tuana mo mahogi, nge he lado tea hurie ve vin buluie, a tangaloi hi vin he veve lai tea ve a tabetabe noi God mo eno lune.

¹⁸Renetungku, da mese veve na tabetabe gina singoda hogosie, nge da haharagi na tabetabe lo doridoride vage.

¹⁹Tare ve igide dam vaie mwerehi dau iloe huri ve igide a tangaloi veve hogo. Igide dain toga mwagumwegu mei God.

²⁰Sige tare dahe toga mwagumwegu tea, huri i God u lawua liu dena noda domiana, ko ingeie u ilo na gineu doluegi.

²¹Retueku, tare ve igide dam rongo lolo tarabeside huri ve dahe vai na gineu esi tea, igide dain he matagu tea ve dain labe lo nagoi God.

²²Tare ve dam navunevu denie, vin bete lawe gide, huri dam rorongtagi na nona leo, ko dam huri na doridori ngehi nge mo havuhevu lune.

²³A tau leo hi i God u betea mo veve mwere ngaha vena, igide dai lado hogo lo henai Netune Jisas Kraes koi gide dai vui tabetabe gide mwerei Kraes u veve beno lawe gide.

²⁴Ira hine hi ram huri na leo noi God, a nora mwasoana u bulu mena mwasoana noi God, a mwasoana noi God u bulu mena masoara giniehi, dam iloe ve i God u toga lude beno, huri u bete na nona vui beno lawe gide.