Read East Ambae 1 JON 5 Bible Online

1 JON 5 - East Ambae bible

1 JON 5

¹Tare igide dam ladohogo huri ve i Jisas ingeie i Kraes i netui God, ihine mo tabe Mama mo tabe Netune.

²?Igide dau mwerehilogo huri ve dam tabe re netui God? Dam iloe lune dain tabe God ko dam ronghuri na nona Leo hora.

³A leo hi huri ve dam tabe God a domianagi huri ve dau rong huri na nona Leo hora. Siu a nona Leo hora hi rain he huire tea mei gide.

⁴Ira netui God doluegi rain qoragi lei na ureure. A noda ladohogo, ngehi dam qoragi na ureure ginie.

⁵?Ihine hi u vei lei ve na qoragi na ureure? Nge a tangaloi mo lado hogo vei Jisas ingeie i netui God ngehi vin qoragi leie.

⁶I Jisas Kraes ingeie hi u vomai gina wai ko a dai, hate gina wai hogosie, nge meire vunu mena wai ko a dai. A vui u vevea lawe gide huri a vui mo veve hogo.

⁷A gineu ingere gaitolu ram matamwasara ginie.

⁸I ngerehi a vui a wai ko a dai, a gineu gaitolu ngaha ram bubugi lo domiana gatagale.

⁹Igide dam lado hogo giniehi a tangaloi ram veve lawe gide, igide dam lado hogo gina leo hi i God u veve lawe gide u liu taligu denie hi. I God mo veve lawe gide huri ve ingeie mo laqa lawe gide lui Netune.

¹⁰Nge tare ve dam ladohogo gi netui God a iloilogi hurive dam lado hogo lo leo hi i God u veve lawe gide. Nge tare ve dahe lado hogo tea giniehi i God u vevea huri Netune Igide dam vevehuri ve i God ingeie a kalikeli.

¹¹I God u veve na leo ngaha lawe gide, huri ve i God u bete na mwasoana radu lawe gide ko mwasoana ngaha mo vanai lawe gide lui Netune.

¹²Tare ve i netui God mo toga mei gide, igide dain mwaso. Nge tare i netui God he toga tea mei gide a mwasoana vin he toga tea lude.

¹³Igimiu hi neu lado hogo lui netui God, nam uli na leo ingere ngaha lawe gimiu huri ve nein ilo vurugegi huri ve neu lei na mwasoana radu beno.

¹⁴Lune igide dam vomai lo nagoi God lo noda tataro, a domide vin huire mwere hi. Dai lado hogo lune dam navu na gineu denie ve u vovohoi lolo domine, nge hi vin rongo na noda tataro.

¹⁵Dau ilo vurugegi huri ve vataha tarogi igide dam navunevu gineu denie mo rongo huri gide. Siu igide dai ilo vurugegi vage ve dam navunevu denie i ngerehi a noda beno.

¹⁶Tare ve ihine tea mo lehi tuana mo vai na galegaleasi asi ngehi hatie galegaleasi talo mateana, nge vin tataro lawe God hurie, huri God vin bete na mwasoana lawea. Nge a galegaleasi ngehi vin he rovolai tea, nge hi a mateana lune, siu nahe veve tea ve nein tataro lawe God hurie.

¹⁷A gineu doluegi hi rau esi i ngerehi a galegaleasi, nge hatie doluegi ve a galegaleasi talo mateana.

¹⁸Igide dau iloe huri ve ihine hi inetui God, nge he vai na galegaleasi tea gesegi, huri i netui God mo koko gorora, huri i Satan vin he vai asiesigi nire tea.

¹⁹Dau ilo ve igide ngaha ira noi God, nge tangaloi doluegi talo ure ram toga lo vavai huireana noi Satan.

²⁰Dau ilo ve i netui God u vomai lolo ure. Ko mo bete na huireana lawe gide huri ve dai ilo na hogo. Igide dam toga hui God nge hi a hogo, lui Netune Jisas Kraes. I God ingeie a hogo, ko mo bete na mwasoana lawe gide.

²¹Retueku nein leo huri gimiu vin garea vaiteu nem vano lengalenga nem huri na God kalikeli.