Read East Ambae JUD 1 Bible Online

JUD 1 - East Ambae bible

JUD 1

¹Ineu Jud, a tangaloi tabanagi noi Jisas Kraes. Ineu nam uli lawe na sinobu ngerehi i God u warera. I God a Mama mo tatabeginie ko i Jisas Kraes mo hako bibire.

²Ineu nam tataro gesegi ve i God na bete na dom hahagavi lawua, a tamwata ko a tabetabe lawe gimiu.

³Ira noku buluana mweratabe, ineu nau tarani garagara ve nain uli na leta lawe gimiu huri na matahala ngehi i Jisas u vagamwasoi gimiu ko ineu vage. Nge nam rongo lolo rong rongoku u huire ve nain uli ko nain veve siaga lawe gimiu ve nein qalo vin huire huri na ladohogo hi ngehi ira sinobu gogona noi God rau leie vagatagale hogosie ko vin eno vataha na tarogi.

⁴A vevenagi u tuei beno, a tangaloi rahe ladohogo tea gi God rau ehu hiligi lolo livu gimiu. A vevegi hurire u uli bibie lolo Reve reve Gogona tuei, tuei vohogi. Ingere a tangaloi rau esi, ram veve, leo kalikeli vovohoi na hogogi noi God, vena voragi na rugurugu tabegoro huri na nora doridori esi lo tarabesire. Ingere ram rahagi na noda Huqe ko i vagamwasoi i Jisas Kraes.

⁵Igimiu neu ilo na gineu ngaha beno, nge ineu nam tarani ve nan vai lado taligugi gimiu huri ve i God u reve vohogi na nona sinobu den Ijib. Nge lo tagugi hi, i God u vei vohogi na sinobu ngerehi rahe ladohogo tea.

⁶Igimiu nein lado haqe na engsel ngerehi rau vei leo ve rain lei na huireana ngehi hatie nora. Ingere rau siregi na tanora vovohoi ko rau kalokalo lo tauleo ngerehi i God u bete lawera i God u veu bibire gina seni ngehi vin eno vagi tuei, ko ram toga lolo ute u dodoga garagara. I God vin hako bibire, aiehi vin dadari a Rani vevegi vin vonai, lune ingeie vin veveginire.

⁷Igimiu nein lado taligu huri na vanue Sodom ko Komora ko a qatui venue u sao vage lobera. A sinobu aiehi ram vai gineu mwerehi a engsel rau vei. Ingere rau vei na galegaleasi lo tarabesire a halagi u sao, mo huire na nora tarani. A gineu ingere ngaha, a mata leleogi lawe gide huri na sinobu ngerehi rain lei na leo vevegi gena avi ngehi vin gao vagi tuei.

⁸A sinobu ingere ngaha hi nam laqagi na leo ngaha hurire ram vai na gineu mwerehi teu. Ingere ram boboregi na gineu hi ve rain veie, lune ram vai na galegaleasi lo tarabesire sibora. Ingere ram rahagi vohogi na huireana noi God. Ingere ram veve asiesiginire doluegi hi ram toga lo eulu.

⁹Nge a muei Engsel Mikael he veve asiesigi na Tamate tea vohogi. Lune a Mikael u vei na vuigaro mena Tamate huri na tarabesi Mosis. Ingeie u veve hogosie vena, “!I God vin tara goro siagaginigo!”

¹⁰Nge a sinobu ingere ngaha lolo livugemiu, ram huri na rong rongora hogosie, ko ram veve asiesigi na gineu haro huri rahe ilo vurugegi tea. Ingere ram mwere na kakarue turu ngehi hatie rong rongora lure. Nge ngaha a gineu hi vin vei vohoginire lo vagasigi.

¹¹!Vin esi garagara hurire! Ingere rau huri na matahala ngehi i Ken u hurie. Ingere ram vai teuteu ve ran vai na mane ram vai na galegaleasi mwere tauhi i Balam u veie. Ingere ram qalo lo matahala mwerehi teu, mwerehi Kora u qalo. Ko vin ve i vohoginire mwerehi u ve vohogi Kora.

¹²Ingere ram vai gineu rahe maemae tea huri lune ram gagani mei gimiu. Ingere rau mwere na gineu sokora lolo gamiu hinaga. Ingere ram mwerena leogoroi sibsib hi ram leo hurire sibora, ko rahe lado huri na sibsib tea. Ingere ram mwerena dodo vurogi hatie gineu lolona, lune a langi mo heregi lateginie nge he uhe tea vohogi. Ingere ram mwere na gai rahe wai na mwasigi tea, hatie mwasigi vohogi lolo taro matue. Ingere ram mwerena gai rau ngehi sarara tugi goarigi, ko rau mate vohogi.

¹³Ingere doluegi rain leo vurugegi na gineu ngerehi a tanoi maemae lure hi ram vaie. Ingere ram mwere na visiu hi ram gilu lategi. I God u leowahe na ute hurire ve rain toga vagi tuei lolo ute u dodoga garagara.

¹⁴I Enok ingeie tangaloi gaibitugi den duvi Adam. I Enok u lehi na taro mo vanai mosigei ko u laqagi huri na sinobu ingere ngaha.

¹⁵“I God vin vevegi na tangaloi doluegi. Ko I God vin vevegi na sinobu doluegi ngerehi rahe masinge tea ve rain leo hogosie huri na gineu esi doluegi hi rau veire. Ingere ram toga mwerehi ve a God hatie. I God vin veveginire huri na leo asi doluegi hi rau veve vovohoie.”

¹⁶A sinobu ingere ngaha ram singo tutubu tamwere ko ram tauteu esi lo sinobu wagineu. Ingere ram huri na nora taratarani esi sibora. Ram sageginire sibora. Ingere ram garigi lamalamagi na sinobu siu huri ve rain leilei na hava gineu hi ram taranie.

¹⁷Ira noku buluana, igimiu nein lado haqe na hava gineu ira gaihora noi noda Huqe i Jisas Kraes rau veve taugi teu ve rain vei te tarogi.

¹⁸Ingere rau veve lawe gimiu vena, “Lolo rani vagasigi ngerehi, a sinobu rain vanai rain sovu gimiu. I rain vei gineu vin hurie mwerehi ram tarani.”

¹⁹A sinobu ingere ngaha, hi ram mwakitegi na nomu tangaloi hi ram hurigo hibagataha. A nora domiana talo tarabesire mo dedeginire. A vui noi God he toga tea lolo lolora.

²⁰Nge igimiu ira noku buluana mweratabe, igimiu nen tabana siaga ve a nomiu ladohogo gogona na hui huire vage, ko ve nen tataro gena managi noi Vui Gogona. Nen koko goro gimiu sibomiu lo tabetabe noi God lune nem rarai huri i Jisas Kraes vin vanai taligu. Ingeie vin haharagi na nora hahagavi ko vin bete na mwasoana tavagi tuei lawe gimiu.

²²Igimiu nen haharagi na hahagavi lawe rahine ram lado gairue.

²³Nen vagamwasoire sinobu wagineu, mwerehi ve nem reve vohoginire dena avi. Lawera sinobu lo vagasigi nein haharagi na hahagavi vin roge mena matagute, huri nein he masinge tea ve nein vei soloragi gimiu sibomiu, mwere na saravai tarabesigi a madagi u bulu lo luqemiu.

²⁴Ineu nam tataro lawe God huri gimiu, i God hi vin koko goro lai gimiu vaiteu nen soi ko ingeie vin lei gimiu vano lo nagona hatie mena galegaleasi, nge gina hahavusiana lawua. A roroa, a tanoi ratahigi, a huireana ko a tanoi lawua doluegi lui Jisas Kraes a noda Huqe u toga tomue siu a higao rambei teu vuigi ko mo toga hibagataha ko vin toga vagi tuei.