Read East Ambae A SERELUE LAWE JON 1 Bible Online

A SERELUE LAWE JON 1 - East Ambae bible

A SERELUE LAWE JON 1

¹Lo Buk ngaha, ineu Jon nau uli na gineu ingere hi i Jisas Kraes u haharaginire lawea. A gineu ngerehi i God u betera lawea, huri ve vin haharaginire lawe na nona tangaloi tabanagi. A gineu ingere hi ve rain vei he ribi tea. Ko i Jisas u hora na nona engsel vena vevesere na gineu ingere ngaha lawe Jon a nona tangaloi tabanagi.

²Ingeie hi u veve serelue na gineu doluegi hi u lehire. Ngehi a leoi God, a roro ngaha mo vanai dein Jisas Kraes,

³!A havuhevu lawe na sinobu hi rau velu na roro ngaha, ko a havuhevu lawe na sinobu hi ram rongo na roro hi u ulire lo buk ngaha ko ram vai na havagineu hi u ulie hurie lolona! A taro u kakarani vohogi ve a gineu doluegi ngaha rain vei.

⁴Ineu Jon nam veve noku vevegarea lawe na warelue gaibitu lolo qatui venue lawua Esia: A hogogi ko a tamwata lawe gimiu mo vanai dein God hi mo toga hibagataha, u toga tuei beno, ko vin vanai tetagaha. Ko a vui gaibitu hi ram tino lo nagoi God ngehi mo toga lo nona tanoi togatoga ratahigi, ingere rain vei mwerehi vage,

⁵ko i Jisas Kraes vin vei lawe gimiu mwerehi vage. I Jisas, ingeie hi u laqagi huri God lo leo ngehi mo vai gide dam leo hogo, ingeie a muegi u maraga dena mateana. Ko ingeie mo mamalu goro na ratahigi doluegi lolo ure. Ingeie u tabe gide, u vei gide dam mariqe dena noda galegaleasi gina daine lo nona mateana.

⁶U vei gide dam voragi huqegi lo vavana, ko dam voragi tangaloi rugurugu huri ve dain tabanagi lawe God hi i tamana. !Ko igide da tabe hagagi na henai Jisas Kraes huri ingeie mo hakovi na managi doluegi vin tuei vin tuei! Amen.

⁷!Nen leo! I Jisas mo vanai lolo dodo, ko a tangaloi doluegi rain lehe gina matara, irahine hi rau ue vagamatea rain lehe vage. !Ko a tangaloi doluegi lolo ure rain ngara hurie. Io, a gineu ngaha vin eno lune! Amen.

⁸A Huqe God mo veve vena, “Ineu a muegi ko a vagasigi ineu nau toga tuei redu, ko nam toga hibagataha ko ineu nain toga vage lo taro hi mo vanai mosigei. Ineu nam hakovi na managi doluegi.”

⁹Ineu Jon, i tuemiu. Igide doluegi dam bulu mei Kraes lo nona rong gagarasi ko a rong ribi. Ineu nau toga vau lo vanue Batmos a vevenagi nau waregi sere na leoi God ko a roro huri Jisas Kraes.

¹⁰Lo rani nona Huqe, a Vui u hivo luku, ko ineu nau rongo na dilo u lawua lo taguku mo tatangi mwere na tavue.

¹¹A dilo hi u veve vena, “Gon uli bibi na gineu hi gu lehire. Siu gom hora na buk lawe na warelue gaibitu lolo vanue Evesas, Smana, Bekamam, Tautira, Sadis, Viladelvia ko Laodisia.”

¹²Ineu nau kileu ve na leo ve ihine hi mo gato meieu. Lune nau kileu, nau lehi na gai turei laiti gaibitu ram labe, rau gihire lo Kol.

¹³Lo livugei gai turei laeti ngerehi, ineu nau lehi na tangaloi u mwereire netui tangaloi, u luqegi na luqe qaravu mo dule mo hivo vuine lo tano, ko u wesigi na wasi lo mabune rau gihie lo kol.

¹⁴A vulune rau mevute mwere na koten, sige mwere na rerei tehi. Ko a matana ram gao mwere na mui evi.

¹⁵A karune mo tavilevile mwere na vatu hi u gara garagara lolo avi lawua ko a dilona u mwere na dumi valolo lawua.

¹⁶Ingeie u hakobibi na visiu gaibitu lo limana matuana, siu a buei vuro u hogo dalideli mo mwalue dena wuwaku. A nagona mo leleo mwere na leleoi aho, ngehi mo leleo garagara lolo livugei reni.

¹⁷Lune nau lehe nau soi hivo lolo karune mwere na tangaloi u mate. Ingeie mo tau na limana matuegi luku ko mo veve vena, “!Gon mese matagu! Ineu a muegi ko a vagasigi.

¹⁸!Ineu hi nam mwaso! Nau mate nge gon leo, ineu nam mwaso vagi tuei. Ineu nam hako huireana goro na mateana ngehi a tamatera tangaloi rau mate ram toga aie.

¹⁹Siu iniko gon uli bibi na gineu ingere hi gu lehire, a havagineu rain vei siserigi ngaha ko a havagineu rain vei atagu.

²⁰A iloilo i visiu ngehi gu lehire lo matueku, ko a gaiturei laeti gaibitu. A gaiturei laeti gaibitu ngerehi a warelue gaibitu ko a visiu gaibitu ngerehi a engsel huri na warelue gaibitu.”