Read East Ambae A SERELUE LAWE JON 10 Bible Online

A SERELUE LAWE JON 10 - East Ambae bible

A SERELUE LAWE JON 10

¹Siu ineu nau lehi na engsel tuegi vage u huire garagara mo himei den eulu. Ingeie mo gagavugi na dodo mavute mwere ve a luqana, ko a himwe himwe mo tango dali goro na qatune, a nagona mo leleo mwere na aho, ko a karune ru mwere na mui evi lawua mo labe vovohoi mwere na beru.

²Ingeie mo hakovi na buk biti u wagae beno. Ingeie mo tau na karune matue lo ului tahi ko a karune mawirigi mo taue lo tano.

³Ko mo ware gina dilogi u lawua mwere na diloi laeon mo ulo, lo tagugi hi u ware beno, a mantawa u dere vagabitu mo duvi lawea.

⁴Lune a mantawa u dere vaga bitu u rovo, ineu nam rarai ve na uli na leo ngerehi ram vanai denie nge nam rongo na dilo mo vanai dena eulu mo veve vena, “Iniko goin wirivunigi na leo rau mwelue dena mantawa ngerehi, goin mese uli bibire.”

⁵Siu a engsel hi nau lehe u labe lo ului tehi ko lo tano mo horagi na limana matue su eulu,

⁶Ko mo lai na waratau gogona lo henai God hi mo toga vagituei. Ingeie hi u teu na eulu, a tano ko a tahi ko a gineu doluegi eulu, ko lolo tahi ko lo tano, siu a engsel hi mo veve vena “Hatie taro ve vin rarai taligu.

⁷Nge lune a engsel gaibitugi mo vena uvi na bulana tavue, a domvagatai noi God hi u toga hiligi vin rovo. A domvagatai hi a Roro Garea, u veve lawe na nona tangaloi tabanagi, ira tangaloi ligoligogi.”

⁸Siu a dilo hi nau rongoe mo vanai den eulu mo laqa taligu laweau vena, “Iniko gon vano gon lai na buk hi u waga beno ngehi mo eno lo limana engsel hi mo labe lo ulu i tehi ko lo tano.”

⁹Siuineu nau vano lobe na engsel ko nam navu denie vena bete na buk biti hi laweau. Ingeie mo veve laweau vena, “Iniko gon laie ko gon ganie, vin gonahi na taqangimu, nge lolo wuwamu vin lulumu mwere na tovu.”

¹⁰Siuineu nau lei na buk biti hi denie ko nam ganie, ko u lulumu lolo wuwaku mwere na tovo. Nge lo tagugi hi nau donoe u rovo, mo dori na taqangiku mo gogona asiesi gena gogonana.

¹¹Siu ineu nam rongo na dilo mo veve laweau vena, “Iniko goin waregi sere na leoi God ngehi u betea lawego, ngehi mo laqagi huri na gineu ve vin hogosi na sinobu a vinure rau wegiwegineu, ko a sinobu lolo vanue wegiwegineu doluegi, ko a tangaloi doluegi mena nora leo hi ram laqa ture, ko ira ratahigi doluegi.”