Read East Ambae A SERELUE LAWE JON 11 Bible Online

A SERELUE LAWE JON 11 - East Ambae bible

A SERELUE LAWE JON 11

¹Rau bete na gaidume laweau mwere na gaitigo, ko i God mo veve laweau vena, “Iniko gon vano gon dume na valei God ko a tanoi rugurugu, ko gon valu na tangaloi ram huduhudu goroau aiehi.

²Iniko gon mese dume na arai valei God. Iniko goin sereginie vin eno, a vevenagi nau bete lawe na sinobu ngerehi rahe lado mava tea gieu. Ingere rain varaqangegi lategi lolo noku togagi venue gogona huri na vale ngavulu gaivesi domwagi gairue vin rovo.

³Nge ineu nain hora na noku tangaloi hako leo gairue, ingere roin luqegi na buburesi bagi huri mo gigilegi na nora hahagavi. Ineu nain bete na huireana lawera huri roin waregi sere na leo hi ve neu nain bete lawera huri na bongi teri vagatagale vudolue vagarue avigi ngavulu gaiono.”

⁴A tangaloi hako leo gairue hi ru mwere na vui gei hi a oliv gairue ko a gaiturei laeti gairue hi rom labe lo nagoi God, ingere a Huqei ureure ngaha.

⁵Tare ihine tea mo tarani ve na vai asiesigi nire, a avi vin mwelue dena wuwara ko mo ue vohogi na nora tavului vuro. Ko tareve ihine tea mo vaileo vena vai veire lo hava matahala tea, ingeie vin mate lo matahala mwerehi teu.

⁶God u bete na huireana lawe na tangaloi hako leo gairue hi ve roin tugoro na mahava ve vin mese uhe lo tarogi hi ingere rom waregi sere na leo i God. I God u bete na huireana lawera ve roin dori na wai rain dori gina dai. Ingere rom hako huireana ve roin hora lai na gineu esi wegiwegineu doluegi rain himei lolo ure tareve ingere rom tarani.

⁷Lune ingere ru waregi sere na leoi God u rovo beno, a kakarue asi gatagale vin hamai dena walu hi a wotogi hatie, vin qalo meire ko mo qoraginire ko mo ue vagamatera.

⁸A tarabesi tangaloi gairue hi rom taqao lo turegi ngehi mo vano lo togagi venue, Sodom ko a henagi tuegi, Ijib ko a iloiloi hea ingere ngaha hogo nge hi a togagi venue lawua ngehi a Huqe i Jisas u mate aie.

⁹Lo rani gaitolu mautugi a sinobu wegiwegineu lo vinure, lo duvire, lo leora ko lo vanuara ingere rain lehi na tarabesi tangaloi gairue hi ru mate nge rain he masinge tea hurive rain tuleginire.

¹⁰A leo noi God hi a tangaloi gairue hi roin waregiserea ko vin vei na sinobu rain rongesi. Lune ingere roin mate a sinobu rain havuhevu, ko rain vei na hinaga lawua ko rain betebetegi nora wawahea lawera gagatalegi huri ru mate beno.

¹¹Lo tagui rani gaitolu mautugi God u mabugi na mabuhi mwasoana su lolo lolora ru maraga rom labe. A tangaloi ram lehi na gineu ngaha ram matagu garagara.

¹²Ingere rom rongo na dilo lawua eulu lo mahava mo veve vena, “!Nero hamai tangaha!” A dilo mo laire rom hage lo eulu lo nagoi nora tavului vuro.

¹³Siserigi a ruru lawua mo ruru ko a duvi togagi venue lawua hi mo soi. A tangaloi u terivaga bitu rau mate ginie. Tangaloi ngerehi lavasigi ram mwaso tau ram matagu lawuagi ram tavuigi ram huduhudu goro na God hi mo toga eulu.

¹⁴Igimiu nen rorongtagi, siserigi ngaha a gineu esi tuegi u vano beno, nge a gineu esi gaitoligi vin vonai vin he ribi tea.

¹⁵Siu a engsel gaibitugi mo uvi na bulana tavue ko dilo lawua saosao lo eulu ram veve vena, “A noda God mena nona leo wahe i Kraes rom hako huireana huri roin huqegi goro na ure vin tuei, vin tuei.”

¹⁶Ira tamaragai ingere ngavulu gaivesi ram toga lo tantano ratahigi ram taigi hivo lo tano ko ram huduhudu goro God.

¹⁷Ingere ram veve vena, “I gamai gam veve gareaginigo, Huqe God, gu mwaso tuei ko gu mwaso hi bagataha. Huri gu haharagi na nomu huireana lawua beno, nge siserigi naha iniko gom voragi ratahigi.

¹⁸A sinobui ureure rau vui qaloqalo ginire, siserigi ngaha a nomu lolo gagasi u vonai beno ve goin lolo gagasi garagara ginire. Siserigi ngaha a taro u vano beno huri ve vin vevegi na tangaloi hi rau mate ko vin tawe na tangaloi tabanagi doluegi, ira tangaloi ligoligogi, ira tangaloi ram mate huri na nora lado hogo ko ira hine hi rau lado mava gina henamu, ingere hi rau lalawua ko ingere hi rau biti, siserigi ngaha a taro u vanai beno ve vin vei vohogi nire hi ram vaiesiesigi na ure.”

¹⁹Siuineu nau lehi na matai valei God u waga beno ko ineu nau lehi na vale siusiu lolona. A leleoi vile ram vile, a mantawa mo dere, a roroi dilo lalawua, a ruru mo ruru ko a videi uhe ram soi mwere na vatu.