Read East Ambae A SERELUE LAWE JON 12 Bible Online

A SERELUE LAWE JON 12 - East Ambae bible

A SERELUE LAWE JON 12

¹Siuineu nau lehi na gigilegi gatagale lo mahava, a gigilegi hi huri na gineu u lawua. A vavine gatagale u luqegi na matainaho mwere ve a luqana ko a vule mo tino lo vavai karune ko a visiu hangavulu domwagi gairue mwere na gai rorovi qetu nona ratahigi ram toga lo qatune.

²A vavine hi mo kakarani ve na bava na maresu, ingeie mo ulogi vuro a vevenagi a gaiherena mo gagarasi, ko mo rongesi garagara ginie.

³Siu ineu nau lehi na gigilegi tuegi vage lo mahava. A Korokodael u lawua u memea mwere na mui avi, a qatune gaibitu ko a mauana hangavulu ko a gairorovi qetu nona ratahigi ram toga gagatalegi lo qatune ngerehi.

⁴A Korokodael lawua hi mo viligi na golona sulo dodo, mo vili mataburigi na buri visiu gatagale ram soi sulo tano, a buri gairue hogosie ram toga. Siu a Korokodael mo vanai kakarani lobei na vavine hurive vin bava netune mo ganie.

⁵Siu a vavine hi mo bava netune a mwera hurive vin huqegi goro na vanue doluegi, a gigilegi nona huireana a nona gaitigo rau gihie lo aean. Nge lo tagugi hi a maresu u vora beno ram hagalai sasawaginie ram laie vano lawe God ko mo toga lo nona tanoi togatoga ratahigi.

⁶Siu a vavine hi mo toa mo vano mo toga lolo vanue vurogi, God u vagatai na tantano hurie, aiehi i God vin leo huri vurugeginie huri na rani teri vagatagale, vudolue vagarue avigi ngavulu gaiono.

⁷Lo tagugi hi, a vuro mo tawaga lo eulu. I Mikael meire nona engsel ram qalo mena Korokodael lawua hi. Siu a Korokodael hi meire nora engsel ram qalo mei Mikael meire nona engsel vage.

⁸Nge Korokodael he qoragi na vuro tea, ko ingeie meire nona engsel hatie leo siregi lawera ve rain toga taligu eulu.

⁹Siu a Korokodael lawua ngehi a mwata tatuei, a henana a Tamate sige i satan, ngehi u keli na sinobu doluegi lolo ure, rau tulie meire nona engsel den eulu ram himei lo tano.

¹⁰Siu ineu nau rongo na dilo mo vonai den eulu mo veve vena, “A vai vagamwasoi noi God u vanai beno, siserigi ngaha i God u haharagi na huireana huri ve ingeie a ratahigi. Siserigi ngaha a nona Mesaia mo haharagi ve ingeie mo hako huireana goro na gineu doluegi, a tangaloi hi u qalo mei retuanda i God u tuli vohoginie dena ute ta eulu.

¹¹Ingere rau qoraginie gina dai Netui Sibsib ko gina nona Roro Garea hi rau waregi sere, ko ingere ram landoutu ve rain siregi na mwasoara ko hatie huri tare ve rain mate.

¹²Siu iniko eulu, ko rahine doluegi nem toga aiehi nen havuhevu, nge a tamate u himei vuine beno lobemiu, ingeie mo lolo gagasi uliu, vage ingeie mo ilo ve a nona taro qilodo hogosie mo eno.”

¹³Lune a Korokodael mo haqea ve rau tulie tavuine lo tano, ingeie mo tavuigi mo livusi na vavine hi u bava na maresu mwera.

¹⁴Siu i God u bete na bainhi menu lawua, a mala ve vin olo vin vano lo tanona lo vanue vurogi. A vavine hi vin toga tabetabegi huri na higao gaitolu mautugi vagahao dena Korokodael ve vaiteu mo vaivohoginie.

¹⁵Siu Korokodael mo wuwanga a wai mo hale tavarea mwere na valolo mo hugi mo huri na vavine hi vena wali vohoginie.

¹⁶Nge a tano u hako mena vavine hi, u waga na singona mo sumu vohogi na waigi u mwelue dena wuwai Korokodael.

¹⁷A Korokodael hi a lolona u gagasi garagara gina vavine hi mo tudori mo qalo mei renetune lalavasigi, ingere hi ram ronghuri na leohora noi God ko ram labe gogona lo hogo hi i Jisas u sereluae lo nona leo huhui.

¹⁸Siu a Korokodael hi u vano mo labe lolo one lobei tehi.