Read East Ambae A SERELUE LAWE JON 16 Bible Online

A SERELUE LAWE JON 16 - East Ambae bible

A SERELUE LAWE JON 16

¹Siu ineu nau rongo na dilogi u lawua mo vanai dena valei God mo veve lawe na engsel gaibitu vena, “Igimiu nen vano nen didihi na lahai lolo gagasi noi God gaibitu hi na hivo lo ure.”

²A muei engsel u dige mo didihi na nona laha mo hivo lo tano. Siu a voha rau gagarasi ram tawaga lo tarabesire hi ram hakovi na gigilegi nona kakarue asi lo limara sige lo raera ko ve ran hudugoro na nona nunui tarabesi gineu.

³A engsel tuegi mo didihi na nona laha talolo tahi, ko a tahi mo dori mo voragi dai mwere na dai tangaloi hi rau ue vagamatea. A gineu mwaso doluegi lolo tahi hi rau mate.

⁴A engsel gai toligi mo didihi na nona laha ta hivo lolo wai halehale ko lolo matamata ko ram dori gi dai.

⁵Siu ineu nau rongo na engsel hi mo leo goro na wai mo veve vena, “!I God gu gogona, gu toga tuei, ko gom toga hibagataha! U vovohoi lawego ve goin vevegi na sinobu ingere ngaha!

⁶Ingere rau didihi vohogi na daire tangaloi hi rau lado hogo lumu ko rau didihi vohogi na dai nom tangaloi ligoligogi, siu siserigi ngaha gu bete na dai lawera ve rain inue vin tatarise mena nora lalakogi.”

⁷Siu ineu nau rongo na dilo u vonai dena tanoi rugurugu mo veve vena, “!Io, Huqe God managi! Gom vevegi na tangaloi mo huri na matahala vovohoi ko a hogo!”

⁸A engsel gaivesigi mo didihi na nona laha sulo aho, mo bete na huireana lawea ve vin hure na sinobu gina avi.

⁹Ingere rau gao gina mwamwavie lawua u vanai dena aho. Siu ingere rau veve asiesigi na henai God ngehi mo hako huireana goro na gineu esi ingere ngaha. Nge a sinobu rahe lado wenigi tea ve ran ware roroi lawe God.

¹⁰A engsel gai limegi mo didihi na nona laha sulolo tanoi togatoga ratahigi nona kakarue asi hi, a dodo mo luluwegi na ute hi mo huqegi aie. A sinobu ram gasi na meara a vevenagi a gagarasigi u lawua.

¹¹Ingere ram veve asiesigi God, a vevenagi a gagarasi lawua mo hogosire lo tarabesire ram horo gina voha, nge rahe masinge tea ve rain tudori dena gineu esi ram vaire.

¹²A engsel gaionogi mo didihi na nona laha talolo wai halehale lawua Iuvretes. A wai lawua hi mo mamaha siu huri ve ira ratahigi talo vui matenaho ram dige turu lo tano mamaha.

¹³Ineu nau lehi na vui esi gaitolu rau mwere na Vurogi rau mwelue dena wuwai Korokodael, rau mwelue dena wuwai kakarue asi, ko rau mwelue vage lolo wuwai tangaloi ligoligogi kalikeli.

¹⁴A vui esi ingere ngaha, ingere a tamate ram hako huireana ve rain vei na vai gi vui. Ingere ram vano lobera ratahigi doluegi lolo ure ve ran vilegi tabulute ginire huri na vuro lo rani lawua noi God managi.

¹⁵“!Igimiu rorongtagi! Vai garea lawe rahine rahe maturu tea, ko rahe tugu tea vohogi luqara ve rain dige lategi mwasigi vurogi ve a sinobu rain lehire!”

¹⁶Siu a vui esi mo vilegi tabuluteginire ratahigi lo tantano gatagale mo waregi ve ‘Amakedon’ lo leo nora Hibru.

¹⁷A engsel gaibitugi mo didihi na nona laha sulo mahava, siu a dilogi u lawua mo vanai dena tanoi togatoga ratahigi lolo valei tataro hi mo veve vena, “!U rovo!”

¹⁸Siu a leleoi vile ram tavilevile, a mantawa mo dere ko a ruru lawua. A ruru hi u lawua garagara. A ruru he lawua tea mwere ngaha lo tarogi a muei tangaloi lo ure ngaha.

¹⁹A togagi venue lawua a Babilon u tawaga hala gaitolu, ko a togagi venue lo qatui venue lalawua rau sao. I God u lado haqe na galegaleasi nona togagi venue hi a Babilon. I God u vei na vanue Babilon mo inu na gineu esi doluegi dena lahai lolo gagasi noi God.

²⁰Siu a vanue doluegi rau toa vohogi ko a vusi lalawua rau sala vohogi.

²¹A vatu lalawua rau mava ram soi sulo tangaloi mwere na uhe lawua mo vanai dena mahava. A sinobu ram veve asiesigi God a vevenagi a gineu esi lawua, ko a tanoi matagute u lawua garagara gina vatu lalawua ngerehi.