Read East Ambae A SERELUE LAWE JON 17 Bible Online

A SERELUE LAWE JON 17 - East Ambae bible

A SERELUE LAWE JON 17

¹Nge a engsel gatagale denire gaibitu hi mo hakovi na laha gatagale u vanai mo veve laweau vena, “!Gon vanai! Ineu nain haharagi na leo vevegi ngehi vin hogosi na vavine masimesinge hi u toga lolo wai halehale u sao.

²Ira ratahigi talo ure ram galegaleasi mena vavine hi lo tarabesire ko a sinobui ureure ram torongo gina waen hi mo vanai dena galegaleasi hi mo vaie lo tarabesine.”

³Siu a engsel mo lai vohogieu lo vui, ko mo laieu tavano lo vaue vurogi. Ineu nau lehi na vavine mo toga lo kakarue u memea, a qatune gaibitu ko a mauana hangavulu, a tarabesine u horo gina leo rau esi vovohoi God.

⁴A vavine hi u luqegi na luqe u memea dodoga, ko mo saru na gol, a perel ko a matain vetu, mo hakovi na laha lo limana hi rau gihie lo gol, a laha hi u horo gina sokorai nona galegaleasi lo tarabesine.

⁵Rau uli na leo, a leo hi u eno hiligi lo raena. A uliuli lo raena vavine hi mo veve vena, “A togagi venue Babilon ko a gineu esi doluegi lolo ure.”

⁶Siu nau lehi na vavine u torongo gina daire sinobu gogona noi God, mena daire hi rau ladohogogi Jisas. Lune ineu nau lehi na vavine hi nam garigi garagara.

⁷Siu a engsel u veve laweau vena, “?Huri havagineu gom garigi? Ineu nain veve na gineu hiligiana nona vavine ngaha lawego ko a kakarue hi mo walie, a kakarue ngehi a qatune gaibitu ko a mauana hangavulu.

⁸A kakarue hi gu lehe, tuei u mwaso nge hibagataha he mwaso tea, nge vin he ribi tea vin mwelue vin hamai dena walu hi a wotogi hatie ko rain lei beraginie ve ran ue vohoginie. A sinobu hi ram toga lolo ureure hi a henara hatie lolo buk mwasoana lo tavuigi hi u teu na ure mo dadari hibagataha. Ingere rain gerigi garagara lune ingere rain lehi na kakarue hi, a vevenagi tuei ingeie u mwaso nge hibagataha he mwaso tea, ingeie vin mwaso taligu.

⁹Iniko goin mataisao huri goin ilo vurugegi na gineu ingere ngaha. A qatui kakarue gaibitu hi a iloilogi huri ve a vusi gaibitu ngehi a vavine hi mo toga lure.

¹⁰Ko vage a iloilogi ve a ratahigi gaibitu. A ratahigi gai lime rau mate beno, a ratahigi gatagale mo mwaso tau mosigei, koa ratahigi gatagale he vanai tea mosigei, nge ingeie vin mwaso huri na mahogi qilodo hogosie.

¹¹A kakarue hi u mwaso tuei, nge ingeie he maso tea hibagataha, ingeie a ratahigi gaiwelugi. Ingeie gatagale denire ratahigi gaibitu, nge ingeie u vano beragi ko rain uevohoginie.

¹²A mauei kakarue hangavulu gu lehire, a iloilogi huri ve a ratahigi hangavulu. Ingere rahe tavuigi tea mosigei ve rain huqegi goro, nge ingere rain lei na huireana ve rain huqegi goro bubugi mena kakarue hi, nge a leo siregi lawera ve rain huqegi goro huri na mahogi qilodo hogosie.

¹³A ratahigi hangavulu hi a domire gatagale hogosie, ingere rain bete na nora huireana ko a nora leo siregi lawe na kakarue hi.

¹⁴Ingere rain qalo mena netui Sibsib, nge a Netui Sibsib vin qoraginire, a vevenagi ingeie a Huqe nora huqegi doluegi ko a Ratahigi nora ratahigi doluegi. I Netui Sibsib meire hi ram hurie, ingere rain qoragi na vuro, a vevenagi ingeie u warera, ko u leo wahera ko ingere ram labe siaga lune.”

¹⁵Siu a engsel u veve laweau vena, “A wai hi gu lehe, ngehi a vavine u toga lo ulure sinobu, ko a duvire, ko a nora leo.”

¹⁶A kakarue mena mauana hi gu lehire, rain buluesi mena vavine hi. Ingere rain lei na nona lalaie doluegi ko rain sireginie vin vano mwasigi vurogi. Ingere rain geni na tarabesine ko rain hurae gina avi.

¹⁷I God u teu na ladolado gatagale talolo domire ve ingere rain vei na gineu mwerehi mo taranie ve rain siregi na nora huireana lawe na kakarue hi ve vin huqegi goro, vin dadari a gineu doluegi hi i God u warataugi rain eno lune.

¹⁸“A vavine hi gu lehe, ngehi a togagi venue lawua hi mo mamalu goro na ratahigi doluegi lolo ure.”