Read East Ambae A SERELUE LAWE JON 18 Bible Online

A SERELUE LAWE JON 18 - East Ambae bible

A SERELUE LAWE JON 18

¹Lo tagugi hi ineu nau lehi na engsel mo himei den eulu. A engsel ngaha mo hakovi na huireana u lawua, ko a varavarana mo leleohagi na ure.

²Ingeie mo ulo gina dilo u huire garagara, mo veve vena, “!A qatui venue lawua Babilon u soi beno u voragi na gineu vurogi! Ingeie u voragi togagi venue nora tamate, ko a tanoi toga vau nora vui esi doluegi, ko a tanoi toga vau lawe na manu hi rau esi rahe mwasara tea ko a kakarue vage hi rahe mwasara tea.

³Ingeie u mwere na vavine asi hi u vei na tangaloi lo qatui venue doluegi lolo ure ram inu na mena waen, ngehi u mwere na doridori esi mena vavine. A ratahigi doluegi lolo ure rau galegaleasi beno mena vavine hi. Siu a tangaloi doluegi lolo ure hi ram vai sosogagi rau voragi mwerai homu beno gina doridori vavine hi u tarani na gineu vatahae.”

⁴Siu ineu nau rongo na dilo tuegi den eulu, mo veve vena, “!Ira noku sinobu, nen mwalue dena togagi venue hi!” Siu huri nein mese bulu meie lo nona galegaleasi ngehi u veire. Siu huri nein mese bulu meie lo leo vevegi hi vin vanai lawea.

⁵A nona galegaleasi a holanagi mo hage mo tui na dodo, ko i God he galuvegi na nona galegaleasi tea hi u veire.

⁶Igimiu nein vei lawea, mwerehi u vei lawe gimiu. A havagineu tea ngerehi u vei lawe gimiu, nein soso lawea vagarue lo ulugi. Igimiu nein lingi na waen sulolo nona laha, ngehi a huireanagi u huire taligu dena waen hi u bete lawe gimiu.

⁷A vavine hi mo vai roroaginie sibona, gina nona vivilakogi lalawua, ko ingeie mo rong garea ginie. Igimiu nein veie vin rongo gagarasi lawua lo tarabesine ko vin hahagavi garagara. Huri mo veve lawea sibona ve, “Ineu a vavine ratahigi, nam toga lo noku togatoga ratahigi. Ineu hatie madue, ineu nain he hahagavi tea vohogi.”

⁸Siu a gineu ngerehi rain vei lawea lo rani gatagale, a mateana ko a tangiana, ko a maro ko a avi vin gao vurivurie, vin voragi qie, a vevenagi a Huqe i God ngehi u muremure garagara vin veveginie.

⁹Ira ratahigi talo ure hi rau galegaleasi meie lo tarabesire ko rau wahegi na nona vivilakogi meie, rain lehi na kukui evi hi mo gaoe. Ingere rain ngara garagara ko rain hahagavi huri na vavine hi u mate.

¹⁰Ko ingere rain matagu gina nona gagarasiana ko rain labe vagahao, ko rain veve vena, “!U esi! U esi garagara lawego, togagi venue lawua Babilon ko gu huire garagara, nge a leo vevegi lawego u vanai lo matainaho gatagale hogosie.”

¹¹Ira tangaloi talolo ure ngerehi ram sosogagi, ingere rain ngara, rain ngara ko rain hahagavi, a vevenagi siserigi ngaha hatie tangaloi ve vin voli na nora lalaie.

¹²A lalaie mwere na gol, a silva, a matain vetu ko a perel. Ko hatie tangaloi ve vin voli na nora luqe gagareagi rau mevute garagara, a luqe rau memea dodoga mwere na luqei ratahigi, a luqe rau memea mwasaraga ko a luqe hi rau siliga. A tangaloi vin hatie vena voli na nora sadolwud ngehi u siaga ve dain haqera, a gineu u sao rau gihire lo livoi eleven, a gineu rau vei lo gai a menagi rau eno namawe, a bras, aean ko a vatu u siaga garagara mwere na vetu maeto.

¹³A tangaloi vin hatie ve vin voli na nora vanila, ngehi a raugi ram tau lo hinaga mo buhoru ginie, a gai bohoru, a waen, a oel, ngehi ram laie dena gai hi a oliv, a vulaoa ngehi ram vai bereti lune, a wit hi ram vai na vulaoa lune, hatie tangaloi ve vin voli na bulara bulugi, a bulara sibsib, a bulara hosi, a bulara kat, a nora tangaloi tabana vurogi, ko a tangaloi hatie ve vin voli na mwasoara tangaloi ngerehi ram tabana vurogi.

¹⁴Ira tangaloi sosogagi rain ngara rain veve vena, “!Babilon a gineu gagareagi gu taranire rau vano vohogi denigo. A gamu hinaga gagarea, a nomu vulavula doluegi rau sala denigo beno ko goin haqe laire tea taligu.”

¹⁵A tangaloi sosogagi ram mwerai homu lo gineu ngerehi ram sogagi lawe na vavine hi, ingere rain matagu gina nona rong-gagarasi ko rain labe mala vagahao. Ingere rain ngara ko rain hahagavi.

¹⁶Ko rain veve vena, “!U esi! U esi garagara huri na togagi venue lawua hi, tuei u luqegi na luqe gagareagi, rau memea dodoga ko a luqe rau memea ko tuei a vavine hi, u vulavulagi na gineu rau gihire lo gol, a matain vetu ko a perel.

¹⁷Nge siu a mahogi qilodo hogosie, a nona gineu gagareagi rau salasala.” A kapten talo aka doluegi, mena tangaloi ram huri na aka meire tangaloi ram tabana huri gaivoli lo aka rau tino vagahao dena Babilon.

¹⁸Ko rau lehi na ahui evi hi u gaoe, ingere ram ngara gina dilogi u lawua, ram veve vena, “Hatie togagi venue vohogi ve u lawua mwere na togagi venue ngaha.”

¹⁹Ingere ram tatavigi gina qie lo qature, ngehi mo haharaginie ve rau hahagavi garagara, siu ingere ram ngara, ram ngara ram veve vena, “!Ei u esi! U esi garagara lawego Babilon, iniko a togagi venue u lawua garagara. A sinobu doluegi hi a nora aka lolo tahi ram voragi mwerai homu a vevenagi a nomu mane. Nge huri na mahogi qilodo hogosie a nomu gineu doluegi rau salasala.”

²⁰Igimiu ra sinobu gogona ko igimiu lo eulu nen havuhevu. Nen havuhevu ira sinobu gogona noi God ko ira gai hora, ko ira tangaloi ligoligogi. I God u vevegi na vavine hi beno huri na havagineu hi u veie lawe gimiu.

²¹Siu a engsel gatagale u huire garagara u weli na vatu lawua, mwere na vatu hi ram bibi vurivuri na wit ginie, ko mo tulie talolo tahi. Ingeie mo veve vena, “Lo matahala mwerehi teu, a togagi venue lawua Babilon, vin tulie tavuine ko vin he maraga lai tea taligu vagituei.

²²Lo tarogi ngaha a tangaloi vin hatie ve na keri na kita, hatie tangaloi ve vin huri huri ehi, vage a tangaloi hatie ve vin uvi na bue, sige ve ihine tea ve na uvi na tavue. A diloi gineu ngerehi rain he rongora tea taligu. A tangaloi tabana rain he tabana tea taligu lumu. A diloi vetu hi ram bibi vurivuri na wit ginie rain he rongoe tea taligu lumu.

²³A leleoi laeti hatie ve vin leleo lumu taligu, vage a diloi tangi langi mei gahorana hi rom vai na waratau lo nora lagiana rain he rongora tea lumu taligu. Tuei, a nomu tangaloi sosogagi u sao u liu dena tangaloi sosogagi doluegi talolo ure. Siu iniko gu keli na sinobui ureure doluegi gina nomu novo asi.”

²⁴A bugui mateana nora tangaloi ligoligogi ko sinobu gogona noi God ko irahine doluegi hi rau mate lo ure ngaha ram eno vovohoi lo limemu.