Read East Ambae A SERELUE LAWE JON 19 Bible Online

A SERELUE LAWE JON 19 - East Ambae bible

A SERELUE LAWE JON 19

¹Lo tagui gineu ngaha, ineu nau rongo na roro mwere na diloi buri sinobu lawua a eulu, ram veve vena,”! Igide da waregareagi God! A noda God u vagamwasoi gide beno siu igide da tabehagegi na henana. Da haharagi ve ingeie mo hako huireana lo gineu doluegi.

²A leo vevegi noi God rau garea ko rau vovohoi. A vavine masmasinge hi u vei na ure mo sokora gina nona galegaleasi lo tarabesine, siu i God u soso lawea beno, a vevenagi a vavine hi u ue vaga mate na nona tangaloi tabanagi doluegi!”

³Siu taligu ingere ram veve vena, “!Igide da waregareagi God! A kukui evi mo gao na qatui venue lawua hi, a kukugi mo hage namawe hogosie, ko vin rovo lai tea!”

⁴Siu ira tamaragai ngavulu gairue domwagi gaivesi ko a kakarue mwaso gaivesi ram taigi hivo ram huduhudu goro God, ngehi mo toga lo nona tanoi togatoga ratahigi. Ram veve vena, “!Amen! !Igide da waregareagi God!”

⁵Siu a dilo mo vanai den eulu, mo veve vena, “!Waregareagi na noda God, igimiu doluegi hi nem tabana lawea ko i igimiu doluegi a tangaloi lalawua ko a tangaloi haro hi nem lado mavaginie!”

⁶Siu ineu nau rongo na dilo mwere na diloi sinobu saosao, u mwere na diloi wei a valolo, ko vage u mwere na diloi mantawa hi mo dere gagarasi. A sinobu ram veve vena, “!Igide da waregareagi na noda God, huri a Huqe a noda God hi mo hakovi na huireana lo gineu doluegi, ingeie hogosie mo Huqegi goro na tangaloi doluegi!

⁷Igide da garigerigi ko da havuhevu, ko da bete na roroa lawe God, a vevenagi a taroi lagiana noi Netui Sibsib u vei vagataie beno.

⁸A luqe gagareagi, rau raka ko rau mwasara, rau bete lawea ve vin seru!” (A luqe gagareagi, ngehi a iloilogi huri ve a gineu gagareagi, ngerehi a sinobu gogona noi God rau vei.)

⁹Siu a engsel mo veve lawea vena, “!Iniko gon uli na gineu ngaha, havuhevu lawe rahine hi a leo siregi lawera ve rain tino lolo hinagai lagiana noi Netui Sibsib!” Ko a engsel mo veve vena, “A leo hogo noi God ingere ngaha.”

¹⁰Siu ineu nam taigi hivo lolo karui engsel, vena huduhudu goroe, nge ingeie mo veve laweau vena, “Gon mese huduhudu goroau, huri ineu a tangaloi tabana mwereigo ko i retuemu, ko irehaqemu hi rau lei na roro huri Jisas. Igide da huduhudu goro na Huqe, huri a roro huri Jisas u ligogi lo singora tangaloi ligoligogi lo managi nona Vui noi God.”

¹¹Siu ineu nam lehi na eulu mo waga, ko nam lehi na hosi mavute mo labe. A tangaloi hi mo toa lo hosi hi a henana ve, “A tangaloi ve goin lado hogo siaga lune, ko ingeie a hogo.” Lune mo vevegi na tangaloi sige mo vai na vuro, ingeie mo vaie mo huri na matahala vovohoi hogosie.

¹²A matana ru mwere na mui evi ko a qatulibo u sao lo qatune ngehi mo haharagi ve ingeie mo ratahigi goro na vanue saosao. A henana rau ulibibie talune beno, ingeie u ilo na hea hi, hatie tangaloi ve u ilo na hea hi.

¹³Ingeie mo luqegi na luqe u tugi dei ko a henana ve, “A leo noi God.”

¹⁴A buri tangaloi vuro ta eulu, rau luqegi na luqe gagareagi, rau mevute ko rau mwasara, ingere ram hurie lo hosi rau mevute.

¹⁵A tangaloi ngaha nona buei vuro u hogo mo mwalue dena wuwana, huri ve ingeie vin vei vuro ginie goro na sinobu lo qatui ureure doluegi, ko ingeie vin qoraginire. Ingeie vin huqegi gorora, a gigilegi nona huireana a gaitigo rau gihie lo aean. Ingeie vin veie vin huire lawera, mwere na tangaloi mo bile vurevure na mwasi grep a nubugi rain mwelue, huri rain vei na waen lune. Lo matahala mwerehi teu, i God hi mo hakovi na huireana doluegi, ingeie mo lologagasi garagara ginire, siu a nona lologagasi vin hogosire.

¹⁶Lo luqana ko lo baloana, rau uli na henana ve, “A Ratahigi nora ratahigi doluegi ko a Huqe nora huqe doluegi.”

¹⁷Siu ineu nau lehi na engsel mo labe lo matainaho, ko mo ware gina dilogi u lawua lawe na manu doluegi hi ram olo lo mahava, mo veve lawera vena, “!Nen vanai ko nen kalo tabulutegi huri na gaganie lawua noi God!”

¹⁸Siu huri igimiu nein geni na tarabesire ratahigi lalawua, a tarabesire tomtomuegi lolo vuro, a tarabesire tangaloi vuro, nein geni na tarabesire hosi ko a tangaloi hi ram toga lure, nein geni na tarabesire tangaloi wagiwegineu vage, ingerehi ram tabana vurogi, ingerehi rahe toga tea lo vavai tau leo, vage a tangaloi lalawua ko a tangaloi wuwerigi!

¹⁹Siu ineu nam lehi na kakarue asi ko ira ratahigi doluegi lolo ure, meire nona tangaloi vuro ram kalo bubugi ve ran qalo mena tangaloi hi mo toa lo hosi ko ira nona tangaloi vuro.

²⁰Siu a tangaloi vuro nona tangaloi hi mo toa lo hosi ram wiribibi na kakarue asi hi mena tangaloi ligoligogi kalikeli, ngehi u vei na vaigi vui lo henai kakarue asi. A tangaloi ligoligogi kalikeli u vei na vaigi vui ngerehi vena kali lehi rahine hi rau lei na gigilegi nona kakarue hi, ko ve ran huduhudu goro na nona tarabesi nunui gineu. A kakarue asi ko a tangaloi ligoligogi kalikeli hi rau tuli mwasogaginire talolo walui evi, ngehi mo gao a qiegi u mwamwavi garagara.

²¹Ko a nora tangaloi vuro rau ue vagamatera gina buei vuro hi mo mwalue dena singoi tangaloi hi mo toa lo hosi ko a manu doluegi rau geni na tarabesire rau guqe vurugegi.