Read East Ambae A SERELUE LAWE JON 2 Bible Online

A SERELUE LAWE JON 2 - East Ambae bible

A SERELUE LAWE JON 2

¹“Iniko gon uli na leo ngaha lawe na engsel lolo warelue lo vanue Evesas, ngehi mo veve vena, ‘A leo ngaha deni eu hi nam hako bibi na visiu gaibitu lo limeku matuegi, ineu hi nam dige lategi lolo livugei gaiturei laeti gaibitu ram labe, ngehi rau gihire lo kol.

²Ineu nau ilo na havagineu hi nem vai, igimiu nem kea u huire ko nehe hako siregi na tabana tea. Ineu nam ilo ve igimiu nehe havuhevu tea mena leo huhui kalikeli nora tangaloi esi ngerehi. Igimiu neu vei lehi rahine hi ram veve hurive ingere a gaihora hogo, nge ram veve leo kalikeli hogosie.

³Igimiu neu rong ribi, ko neu rongo gagarasi lo gineu esi u sao huri na henaku, nge igimiu a domimiu he soi tea.

⁴Nge a gineu gatagale ngehi mo vai eu nam rongesi, ngehi nehe tabeau tea hi bagataha, mwere hi neu tabeau lo tavuigi redu

⁵Siu igimiu nein lado taligu hurive neu tino mwere hilogo tomue siu nebei soi. Nen leahi na taqangimiu nen vai mwerehi neu vei tomue. Tare ve nehe leahi na domimiu tea, ineu nain vanatu lobemiu nain tagagi vohogi na nomiu gaiturei laeti dena tantanomiu.

⁶Nge a gineu gatagale ngehi neu veie u garea, ngehi neu leomasi na doridori talo burigi noi Nikolas hi ram vai, siuineu vage nau leomasire.

⁷“!Ihine tea ve a qerona lune ve vin rorongtagi, ingeie na rorongtagi hava gineu hi a Vui mo laqagi lawe na warelue!” “Irahine hi rau qoragi na vuro goro na gineu esi, ineu nain bete na leosiregi ve rain geni na mwasigi dena gai mwaso, ngehi lolo talui God sibona.”

⁸“Iniko gon uli na leo ngaha lawe na engsel lolo warelue lo vanue Smana, ngehi mo veve vena, Gon veve lawea ve, a leo ngaha denieu, ineu hi a muegi ko a vagasigi, nau mate ko nau mwaso taligu.

⁹Ineu nau ilo na nomiu rongo gagarasi u sao ko ve neu mahogi, nge a hogo, igimiu a mwerai hako gineu lo gineu garea doluegi. Ineu nau ilo na gineu rau esi hi a sinobu lavasigi ram veve vovohoi gimiu lune. Ingere ram veve ve ingere a duvi Israel, nge ingere hatie duvi Israel hogo, nge ingere a valei sonebubugi noi Setan.

¹⁰Siu igimiu nein mese matagu gina havagineu hi ve vin vei gagarasigi gimiu. Ineu nam veve lawe gimiu, i Setan vin teu gimiu lavasigi lolo valei veuveu vena vai lehi gimiu, ko igimiu nein rong-gagarasi huri na rani hangavulu. Nge nein labe siaga, hatie huri tareve nem mate, siuineu nain bete na mwasoana lawe gimiu, vin mwere na gai rorovi qetu nona ratahigi lo qatumiu.

¹¹“!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue! Irahine rau qoragi na vuro, a mateana vagatuegi vin he hogosire lai tea.”

¹²“Iniko gon uli na leo ngaha lawe na engsel lolo warelue lo vanue Bekamam, ngehi mo veve vena, Gon veve lawera ve a leo ngaha deni eu hi a buei vuro u hogo dalideli.

¹³Ineu nau ilo na vanue Bekamam hi nem toga aie. I Setan u huqegi goroe beno. Nge igimiu nein labe siaga lo henaku. Igimiu nehe matagu tea ve nein laqagi lue na nomiu ladohogo. Hatie huri i Antibas, a tangaloi hi u labe siaga lo nona ladohogo lo henaku, ngehi rau ue vagamatea lolo nomiu togagi venue, siserigi ngaha mo voragi muei togagi venue noi Setan.

¹⁴Nge a gineu te gaivihe hi a noku rongesi mo eno lure vovohoi gimiu. A tangaloi lavasigi lobemiu ram huri na leo huhui noi Balam. A tangaloi u huhui Balak huri ve vin tomuegi nire duvi Israel sulo galegaleasi, ngehi ve rain geni na hinaga hi u rugurugu ginie lawe na tarabesi nunui gineu, ko ve ran vai na galegaleasi meire vavine lo tarabesire.

¹⁵A tangaloi lavasigi vage ram toga mei gimiu, ngehi ram huri na leo huhui noi Nikalas.

¹⁶Giniehi, igimiu nen tudori dena nomiu galegaleasi, siu huri nein mwaso, tareve hatie, ineu nain vanatu lobemiu vin he ribi tea ko nain qalo gorora gina buei vuro hi mo mwalue dena wuwaku.

¹⁷!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue! Lawera hi rau qoragi na gineu esi, ineu nain bete na hinaga hi u eno hiligi ngehi a henagi a mana, lawera doluegi hi rau qoragi na vuro, vage ineu nain bete na vatu mevute mena hea garaqa rau uli bibie lune, lawera gagatalegi hi rau qoragi na gineu esi. Ihine tea he ilo na hea garaqa ngaha tea, nge hogosie a tangaloi hi vin leie.”

¹⁸“Iniko gon uli na leo ngaha lawe na engsel lolo warelue lo vanue Tuatira, ngehi mo veve vena, Iniko gon veve lawera ve, a leo ngaha ineu i Netui God hi a mataku rom mui mwere na avi, a karuku rom tavilevile mwere na vatu gara hi lolo avi lawua.

¹⁹Ineu nau ilo na havagineu hi nem vaie, nau ilo huri na nomiu ladohogo, a nomiu tabetabe, a nomiu tabana ko a nomiu rongribi. Ineu nam ilo ve nem vai na gineu u liu denie hi neu veie tomue.

²⁰Nge a gineu he vovohoi tea lolo domiku, inge ngaha huri nem siregi na mahogi lawe na vavine asi hi i Jesebel mo teagi lategi na nona leo huhui kalikeli. A vavine asi hi mo veve huri ve ingeie a tangaloi ligoligogi, nge gina nona leo huhui, ingeie mo tomuegi na noku sinobu ram galegaleasi meire vavine lo tarabesire ko ve ran gani na hinaga hi rau rugurugu ginie lawe na nunui tarabesi gineu.

²¹Ineu nau siregi na taro lawea ve vin lado wenigi, ko vena tudori dena nona galegaleasi, nge ingeie he tarani tea ve vin leahi na taqangine.

²²Siu ineu nain kuroe lo niei gagarasi, ko irahine doluegi hi ram vai na bakabaka mena vavine hi, rain gagarasi vin liu tareve rain he tudori tea dena gineu esi hi mo vaie.

²³Vage ineu nain ue vagamate rahine ram hurie, Siu huri a warelue doluegi rain ilo ve ineu hi nam hike vurugegi na taqangire tangaloi ko a domire ko nain bete na gaitawe lawe gimiu gagatalegi huri na hava gineu neu veie.

²⁴Nge igimiu doluegi lo vanue Tuatira nehe huri na leo huhui asi hi tea, igimiu nehe hike tea ve nen ilo na havagineu hi irahine wagineu ram warea ve, a gineu hiligiana noi Setan hi mo eno lolo livugei dodogi. Nam veve ngaha lawe gimiu, nain he teu na gineu mava tea dolue lo siqemiu.

²⁵Nge hogosie nam tarani ve nein hako siagagi na havagineu hi u eno lolo limemiu beno vin dadari ineu nain vanai taligu.

²⁶Lawe rahine rau qoragi na vuro, ko ram labe toratora ve ran vai na gineu hi ram taranie mo dadari lo qereqerenagi. Ineu nain bete na huirana nge tauhi nau leie den tamaku. Ineu nain bete na huireana lawera ve rain huqegi goro na sinobu doluegi lolo ure. A nora gaitigo a aean, mo haharagi na nora huireana, a gaitigo aean hi u tatarise ve vin vilivurivuri na sinobu ginie, mwere na aean hi mo ue vurivuri na laha tano, vage ineu nain bete na visiu hi a mwasoi reni lawera.

²⁹“!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue!”