Read East Ambae A SERELUE LAWE JON 20 Bible Online

A SERELUE LAWE JON 20 - East Ambae bible

A SERELUE LAWE JON 20

¹Ineu nau lehi na engsel u himei den eulu, Ingeie mo hakovi na ki huri na walu a wotogi hatie ko mo hakovi na seni u lawua lo limana.

²A engsel hi mo wiribibi na Korokodael lawua, ngehi a mwata ta tuei, ngehi a tamate ko i Setan, ko u ligo bibie huri na higao teri vagatagale.

³Siu ingeie mo tulie talolo walu hi a wotogi hatie, mo gorogoroe ko mo logi bibie. A engsel u veie mwere ngaha huri ve vin he sine lai na sinobui ureure tea taligu vin dadari a higao teri vin rovo. Lo tagui higao teri vagatagale vin toro sireginie huri na mahogi tea qilodo.

⁴Siu ineu nam lehi na tanoi togatoga ratahigi u sao, a tangaloi ram toga lure. I God u bete na huireana lawera ve rain vevegi na doridorire tangaloi. Vage ineu nau lehi na tamatera tangaloi hi rau ue vagamatera, a vevenagi ingere rau labe siaga lo roro huri Jisas ko a roro hi mo vanai dein God. Ingere rahe hudu goro na kakarue hi tea, sige a nona nunui tarabesi gineu ko ingere ra lai na gigilegi nona kakarue hi tea lo raera sige lo limara. Ingere rau mwaso taligu, ko ram huqegi goro bubugi mei Kraes huri na higao teri vagatagale.

⁵Ingere lavasigi hi rau mate rain he mwaso tea taligu vin dadari a higao teri vagatagale vin rovo. Nge ngaha a muei maragaana taligu den mateana.

⁶A mateana vaga tuegi vin he mamalu goro laire tea. Ingere rain voragi tangaloi rugurugu noi God ko noi Kraes hi rain huqegi goro bubugi meie huri na higao teri vagatagale.

⁷Lune a higao teri vagatagale u rovo, i Setan vin meriqe dena nona toga vau,

⁸siu ingeie vin mwelue vano, ko vin keli lehi na sinobu lo qatui venue lolo ure doluegi, ingere hi a duvi Kog ko a duvi Makok ve i Setan vin vilegi tabulutegi nire huri na vuro, ingere a sinobu rau sao garagara rain mwere na one lo vaturi tehi.

⁹Ko ira tangaloi vuro noi Setan rau dige turuhi na ureure ko ram sone dalibulugi na sinobu noi God ko a togagi venue lawua hi i God u tabea. Nge a avi u himei den eulu mo gao vohoginire.

¹⁰Ko i Setan hi u sine lehire u tulie talolo walui evi lawua hi mo gaogao qaravu a qiegi u mwamwavi garagara, vage a kakarue ko a tangaloi ligoligogi kalikeli hi u tulire meie vage. Aie hi, ingere rain rongo gagarasi lolo rani ko lolo bongi vin enoeno qaravu vagi tuei.

¹¹Siu ineu nam lehi na tanoi togatoga ratahine u lawua ko u mevute, a tangaloi mo toga lune. A ure ko a mahava ru toa beno denie ko ru salasala.

¹²Ineu nam lehi na sinobu hi rau mate, ingere hi rau lalawua ko ingere hi rau wuwerigi, ram labe lo nagoi tanoi togatoga ratahigi, siu a buk ram waga, a buk huri na mwasoana mo waga. I God mo veveginire hi rau mate mo huri na havagineu hi rau veire, ngehi u uli bibire lo buk ngerehi.

¹³A tangaloi rau mate lolo tahi ram mwalue ram vanai, a mateana ko a tantano huri na tamatera tangaloi hi rau mate, rain he wiri bibi laire tea. I God vin vevegi na tangaloi gagatalegi vin huri na havagineu hi rau veire.

¹⁴Siu a mateana ko tantanoi tamatera tangaloi hi rau mate vin tulire talolo walui evi lawua. A walui evi lawua hi a mateana vaga tuegi.

¹⁵Ihine tea hi a henana mo eno lo buk huri na mwasoana vin tulie talolo walui evi lawua.