Read East Ambae A SERELUE LAWE JON 21 Bible Online

A SERELUE LAWE JON 21 - East Ambae bible

A SERELUE LAWE JON 21

¹Siu ineu nau lehi na eulu garaqa ko a ure garaqa. A eulu ta tomue ko a ure ta tomue ru salasala, a tahi sala vage.

²Ineu nau lehi na togagi venue gogona lawua, ngehi a Jerusalem garaqa mo himei eulu dein God. U vei vagataie mwere na vavine mo luqeluqe mo rarai tamai netune.

³Ko ineu nau rongo na dilogi u lawua mo vanai dena tantano ratahigi mo veve vena, “!Siserigi ngaha a sinobu ingere lo nagoi God ko ingeie vin toga meire ko ingere rain voragi nona sinobu! I God sibona vin toga meire ko vin voragi nora God.

⁴Ingeie vin mengi vohogi na nora tinengi dena matara ko a mateana vin hatie, a hahagavi vin hatie, a tangiana vin hatie, sige a gagarasi vin hatie vage, a vevenagi a matahala ta tuei rau vano beno.”

⁵Ihine hi u toga lo tanoi togatoga ratahigi u veve vena, “!Gon leo! Ineu na vai garaqagi na gineu doluegi!” Siu ingeie mo veve vena, “Iniko gon uli na leo ingere ngaha, huri a leo ingere ngaha a hogo ko ve dain lado ta lure.”

⁶Ihine hi mo toga lo tanoi togatoga ratahigi mo veve laweau vena, “!U rovo! Ineu a Vuigi ko a Vagasigi. Ineu nain bete na wai mwasoana vurogi lawe hine tea hi mo madogu.

⁷Irahine hi rau qoragi na vuro, ingere rain lei na wai hi, ko ineu nain voragi nora God ko ingere rain voragi renetuku.

⁸Irahine hi rahe masinge tea ve rain ladohogo, ingere a tangaloi matamatagu. Ingere hi ram vai gineu rau esi, ram ue vagamate tangaloi, ram vai na doridori esi meire vavine, ram vai na uviuvi managi, ram hudu hudugoro na tarabesi nunui gineu ko ram veve leo kalikeli, ingere doluegi ngaha rain hivo lolo walui evi lawua hi u mwamwavi garagara. Nge ngaha a mateana vaga tuegi.”

⁹Siu a engsel gatagale denire gaibitu hi rau hakovi na laha gaibitu hi rau horo gina rongesi lalawua ngerehi a vagasigi rongesi, mo vanai lobeku mo veve vena, “Iniko gon hurieu, ineu nain haharagi na vavine mo rarai ve na lagi lawego, ngehi i gahorai Netui Sibsib.”

¹⁰Siu a engsel mo lai vunigieu lo Vui sulo vusi lawua u eno aulu. Ingeie mo haharagi na togagi venue gogona lawua Jerusalem mo himei eulu dein God.

¹¹Ingeie mo leleo gina varavarai God, ko mo leleo mwere na mwere na matain vetu hi a jaspa, u leleo mwere na kelasi hi mo tavilevile.

¹²A arai togagi venue hi u lawua rau hakovie lo vatu, u eno namawe, a matai aragi hangavulu domwagi gairue, a engsel hangavulu domwagi gairue ram labe lo matai ara ngerehi ko rau uli na henara duvi Israel gagatalegi lo matai ara ngerehi.

¹³A matai ara gaitolu vovohoi na matainaho kalo, a matai ara gaitolu vovohoi na ute alau, a matai ara gaitolu vovohoi na ute aute ko a matai ara gaitolu ram leo vano vovohoi na matainaho roro.

¹⁴A arai venue hi rau hakovie lo vatu togaibibi hangavulu domwagi gairue ko lo vatu ngerehi, rau uli na henara gai hora noi Netui Sibsib hangavulu domwagi gairue.

¹⁵A engsel hi u gato meieu u hakovi na gaidume rau gihie lo gol vena dume na togagi venue hi, a aragi ko a matai aragi.

¹⁶A togagi venue lawua hi a hugunegi gaivesi rau tatarise ko a qetuqetugi gaivesi, a lawuanagi ko a qaravugi rau tatarise. A engsel mo dume na togagi venue hi gina nona gai dume. Mo huri na gai dume nora ta Krik, a togagi venue hi a teri vatu hangavulu domwagi gairue, 12,000 stadia, a lawuagi a 12,000 stadia, a qaravugi a 12,000 stadia a enamawegi.

¹⁷A engsel mo dume na arai togagi venue hi mo hakovi na gai dum nona tangaloi, a enamawegi a 144 kiubit, teri vatu hangavulu domwagi ngavulu gaivesi domwagi gaivesi mwere na ngadui lime.

¹⁸A ara hi rau gihie lo vatu a henagi a jaspa, a togagi venue lawua hi rau gihie lo gol u mwasara mwerena kalasi.

¹⁹A vatu togai bibi huri na arai venue hi rau gebuginire gina matain vetu hala saosao. A muei vatu togai bibi a henagi a jaspa, tuegi a savaea, gaitoligi a agat, gaivesigi a emeral.

²⁰Ko a vatu togai bibi gailimegi a onikis, gaionogi a kanelian, gaibitugi a qotis angoga, gaiwelugi a malakaet, a vatu togai bibi gai siwogi a tobas, hangavulugi a kalesdoni, hangavulu domwagi gatagale a takwoes, hangavulu domwagi gairue a ametis.

²¹A gai gorogoroi matai ara hangavulu domwagi gairue rau gihire dena perel. A gai gorogoroi matai ara gatagale rau gihie lo perel gatagale. Ko a matahala lolo togagi venue lawua hi rau gihie lo gol u leleo mwere na kelasi.

²²Ineu nahe lehi na vale tataro tea lolo togagi venue lawua hi, a vevenagi i Huqe managi ko i Netui Sibsib ingere a valei tataro.

²³A togagi venue hi he tarani na aho tea sige a vule vena leleo haginie, a vevenagi a leleoi togagi venue hi a varavarai God ko i Netui Sibsib ingeie a laeti.

²⁴A sinobui ureure rain dige lo leleona ko ira ratahigi talo ure rain lei na roroa lawe na togagi venue lawua hi.

²⁵A matai arai togagi venue hi vin he gorogoro tea lo rani gatagale a vevenagi aiehi a bongi hatie.

²⁶A sinobu talo vanue wagiwegineu rain lei na gineu rau garea ko a tanoi lado mava talolo togagi venue hi.

²⁷Hatie gineu ve he mwasara tea ko hatie tangaloi ve u vei na gineu a tanoi maemae lune sige u kelikeli vin he ahu lei tea lolona, nge hogosie ingere hi a henara u uli bibire lo buk huri na mwasoana noi Netui Sibsib rain ehu lei lolo tagagi venue lawua hi.