Read East Ambae A SERELUE LAWE JON 22 Bible Online

A SERELUE LAWE JON 22 - East Ambae bible

A SERELUE LAWE JON 22

¹Siu a engsel mo haharagi na wai lawua hi mo hale tamwere, ngehi a wai mwasoana. Mo tavilevile mwere na kelasi ko mo hale lue dena tanoi togatoga ratahigi noi God ko i Netui Sibsib.

²A wai mo hale mo hivo lo livugei turegi lolo livugei togagi venue lawua hi. A gai mwasoana mo labe dalideli na wai halehale hi. A gai hi mo wei mwasigi vataha vule hangavulu domwagi gairue, a mwasigi rau wegiwegineu vataha na vule, ko a raui gei ingere hi ve rain vaga mwasoi na vanue saosao.

³Hatie gineu ve vin eno lolo vanue hi, ngehi i God u teu na leo warawarai lure. A tanoi togatoga ratahigi noi God ko a noi Netui Sibsib roin eno lolo togagi venue lawua hi, ko ira tangaloi tabanagi noi God rain huduhudu goroe aiehi.

⁴Ingere rain lehi na nagoi God ko a henana vi eno lo raera.

⁵A bongi vin hatie aiehi, ingere rain he tarani laeti tea, sige ve a leleoi aho. Huri a Huqe i God vin voragi na nora leleo, ko ingere rain huqegi goro vagi tuei.

⁶A engsel mo veve lawea vena, “Gon leo ingere ngaha a hogo, ko iniko goin ladohogo ginire. A Huqe ngehi ingeie i God, ingeie hi u bete na vui lawera tangaloi ligoligogi doluegi, ingeie u horau, a nona engsel ve nan haharagi lawera nona tangaloi tabanagi huri na havagineu rain vei vin he ribi tea.”

⁷A Huqe mo veve vena, “!Gon rorongtagi! A sinobu ram rongo huri na leo lolo buk ngaha, rain hevuhevu.”

⁸Ineu Jon, nau rongo na gineu ingere ngaha ko nau lehi na gineu ingere ngaha, nau soi hivo ve na huduhudu goro lolo karui engsel hi u veve na gineu ingere ngaha laweau.

⁹Nge mo veve laweau vena, “Iniko gon mese hudu goroau. Ineu a tangaloi hogosie mwereigo, nau tatarise mwerei retuemu hi a tangaloi ligoligogi, ko mwerei vage hi ram rongtabe na leo ngerehi lolo buk ngaha. Iniko goin huduhudu goro God hogosie.”

¹⁰Siu a engsel mo veve laweau vena, “Iniko goin mese vunigi na leo lolo buk ngaha ve rain toga hiligi, a vevenagi a taro u kakarani ve a leo ingere ngaha rain mwelue vanai.

¹¹Nen siregi rahine hi a dorire rau esi, ingere ran vano tuturedu ran vai gineu rau esi. Irahine rau sokora, nen siregi nire ran vano tuturedu ran vai gineu rau sokora, irahine ram vai gineu rau garea nen siregi nire ran vai gineu rau garea. Irahine rau gogona ingere rain gogona tamwere.”

¹²A Huqe mo veve vena, “Gon rongo! Ineu nain vanai taligu vin siseri. Ineu nain vanai mena gaivoli ve nain volire noku tangaloi tabana gagatalegi vin huri na havagineu hi neu veire.

¹³Ineu a muegi leo ko a vagasigi leo, Ineu nau tavuigi na gineu doluegi ko nain vagasigi na gineu doluegi, Ineu a vuigi ko a vagasigi.”

¹⁴Vai garea ko havuhevu lawe rahine rau solo mwasaragi na luqara, ingere rain geni lai lo mwasi gai mwasoana ko ingere rain ehu lai lo matai arai togagi venue lawua hi.

¹⁵Vagi varea dena arai togagi venue lawua hi, a sinobu hi rau galegaleasi, a sinobu hi ram vai gaqaleva, ngerehi rau vagasile mena vavine lo tarabesire, a sinobu hi rau ue vagamate tangaloi, a sinobu hi ram huduhudu goro nunui tarabesi gineu ko a sinobu ngerehi mo havusire huri ram rongo leo kalikeli ko ram kalikeli.

¹⁶“Ineu Jisas nau hora na noku engsel ve vin veve na gineu ingere ngaha lawego. Ineu nau vanai dena duvi Devet. Ineu a visiu leleo a mwasoi reni.”

¹⁷A Vui Gogona mena warelue ngehi u mwere na vavine hi mo rarai ve vin legi, ingere vunu rom ware vena, “!Igimiu nen vanai!” Irahine hi ram rorongtagi na gineu ngaha, rain veve vena, “!Igimiu nen vanai!” Tare ve ihine mo madogu, ingeie na vanai. Tare ihine mo tarani ve vin inu na wai mwasoana, ingeie na inue mwere na hogohogo lawea vurogi.

¹⁸Ineu na veve siaga lawe hine tea mo rongo na leo ligoligogi lolo buk ngaha. Ihine tea mo tau na leo lo ului leo ingere ngaha, i God vin teu na gineu esi ingere hi ram eno lolo buk ngaha lo ulune.

¹⁹Ihine tea vin lei vohogi na mavusui leo tea dena leo ligoligogi lolo buk ngaha, i God vin lei vohogi na leo siregi lawera ve rain geni lo mwasi gai mwasoana ko vage a leo siregi lawera ve rain ehu lei lolo togagi venue hi u Gogona ngehi mo laqagi hurie lolo buk ngaha.

²⁰I Jisas ingeie hi u veve na gineu ingere ngaha ve a hogo. Jisas mo veve vena, “Io, ineu nain vanai vin siseri.” Amen. Huqe Jisas gon vanai!

²¹A hogogi noi noda Huqe i Jisas na toga meire nona sinobu doluegi. Amen.