Read East Ambae A SERELUE LAWE JON 3 Bible Online

A SERELUE LAWE JON 3 - East Ambae bible

A SERELUE LAWE JON 3

¹“Iniko gon uli na leo ngaha lawe na engsel lolo warelue lo vanue Sadis, ngehi mo veve vena, Ingeie mo hakovi na visiu gaibitu ko a vui gaibitu mo veve vena, Ineu nau ilo na havagi hi igimiu nem lalakogi lune. A sinobu ram veve huri ve nem mwaso, nge a hogo huri ve neu mate.

²Igimiu nen rada, nen vai siagagi gimiu tomue siu a havagineu hi ram eno ram mate vage. Ineu nau lehi na havagineu hi neu veire ko he mwaso tea mwerehi i God mo tarani.

³Siu igimiu nein mese galuvegi na leo huhui hi neu leire ko neu rongora. Igimiu nein ronghuri ko nen lado wenigi. Tare igimiu nehe rada tea ineu nain vanai mwere na tangaloi mo balu, igimiu nein he ilo na taro hi tea ineu nain vanai lolona.

⁴Tangaloi lavasigi ta Sadis ingere rau leohuri mwasoara sibora ve rain mwasara, ko ingere a leo siregi lawera ve rain luqegi na luqe rau mevute ko rain mwasoko lategi meieu.

⁵A tangaloi hi vin qoragi na vuro ingeie vin luqegi na luqe u mevute mwereire ngaha. Ineu nain he hara vohogi na henana tea dena buk huri na mwasoana, nge nain veve lawe tamaku ko ira engsel ve ingere a noku tangaloi.

⁶“!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue!”

⁷“Iniko gon uli na leo ngaha lawe na engsel lolo warelue lo vanue Viladelvia, ngehi mo veve vena. Inge ngaha hogosie u gogona ko a hogo, mo hakovi na ki noi Devet ingeie mo roa na mataivale a tangaloi vin he gorogoro laie tea ko lo tarogi mo gorogoroe a tangaloi vin he roa laie tea.

⁸Ineu nau ilo na havagineu nem vaire. Igimiu nen leo ingeie u roa na mataivale beno lo nagomiu, nge tangaloi vin he goro laie tea. Ineu nau ilo ve a nomiu huireana u biti, nge neu ronghuri na noku leo huhui ko igimiu neu wiribibi siagagi eu.

⁹A sinobu lavasigi ram veve ve ingere a duvi Israel, nge ingere ram kalikeli, a vevenagi ingere rau mwere na valei sonebubugi noi satan. Igimiu nen leo ineu nain veire rain vanai rain taigihivo lolo karumiu ko ingere rain ilo ve ineu nain tabe gimiu.

¹⁰Igimiu neu wirisiagagi na noku leo u ribi beno siu ineu nain kokogoro gimiu dena gineu esi hi mo vanai ve vin vei lehi na sinobu doluegi hi ram toga lo nagoi ure ngaha.

¹¹Ineu nain vanai vin he ribi tea, igimiu nen wiri siagagi na havagineu hi ram eno mei gimiu, siu ihine tea vin he lai vohogi na nomiu gairorovi qetu mwere na gairorovi qetu nona ratahigi.

¹²Ihine tea hi vin qoragi na vuro ineu nain veie vin voragi beru tora lolo valei tamaku, siu ingeie vin labe aiehi vagituei. Ineu nai uli na henai noku God lune ko a henai togagi venue lawua noi noku God hi a Jerusalem garaqa hi mo himei eulu dena noku God. Ineu nain uli na henaku a hea garaqa lune.

¹³“!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue!”

¹⁴“Iniko gon uli na leo ngaha lawe na engsel lolo warelue lo vanue Laodisia,” ngehi mo veve vena, “Ineu hi nau tevuigi na gineu ngerehi i God u teure, Lune i God u teu na gineu doluegi, lovuigi redu ineu aiehi. A noku leo rau vovohoi ko a hogo ineu nam veve amen lo gineu doluegi hi i God u teure, ineu hi nam veve na leo ingere ngaha.”

¹⁵Ineu nau ilo na havagineu nem vaire. Igimiu nehe mwamwavi tea ko nehe gamwadidi tea. Noku tarani ve nen mwamwavi sige nen gamwadidi.

¹⁶Nge a vevenagi igimiu neu mwamwavi salosaloi, ineu nam rarai ve nain luegi vohogi gimiu dena wuwaku.

¹⁷Igimiu nem veve ve nem mwerai homu, a gineu doluegi a nomiu, ko nehe tarani na gineu tea, nge igimiu nehe ilo tea ve igimiu a mahogi, igimiu a segegi, a matamiu rau dodo ko nem tino mwasigi vurogi.

¹⁸Ineu nam veve lawe gimiu ve igimiu nen voli na nomiu gol denieu hi nau hure mwasaraginie gina avi. A matahala hogo nge ngaha ve vin vei gide dain mwerai homu hogo. Ve igimiu nein voli luqe rau mevute denie hurive nein luqe goro na tanoi nomiu maemae igimiu nein voli na meresin denieu ve nen tau lo matamiu ve nein leo lai na gineu.

¹⁹A sinobu hi nau tabera nam vevegi nire ko nam vai na mwasoara mo vovohoi, siu igimiu nen lado wenigi ko nen vaileo siaga ve nen vai na gineu hi rau garea.

²⁰!Leo! Ineu nam labe lo matai vale nam dingdingi. Tareve gom rongo na diloku gom roa na mataivale ineu nain ehu lolo vale nain gagani meigo ko iniko goin gagani meieu.

²¹Irahine hi rau qoragi na vuro rain toga meieu lolo noku tanoi togatoga ratahigi, lo matahala mwerehi tau ineu nau qoragi na vuro nam toga mei tamaku lo nona tanoi togatoga ratahigi.

²²“!Ihine tea ve a qerona lune ve vin rorongtagi, ingeie na rorongtagi havagineu hi a Vui mo laqagi lawe na warelue!”