Read East Ambae A SERELUE LAWE JON 4 Bible Online

A SERELUE LAWE JON 4 - East Ambae bible

A SERELUE LAWE JON 4

¹Lo tagui gineu ingere ngaha, ineu nau leo hage nam lehi na matai vale mo waga eulu. A dilo mo tatangi mwere hi nau rongoe tomue mo mwere na tavue mo veve vena, “Gon hamai tangaha ko ineu nain haharagi na gineu doluegi lawego hi rain vei.

²Siserigi a Vui mo lai vunigieu, ineu nau lehi na tanoi togatoga ratahigi a tangaloi gatagale mo toga lune.

³Ihine hi mo toga lo tanoi togatoga ratahigi mo leleo mwere matain vetu mwere jaspa mena kanelian. A himwehimwe mo toga mo dali na tanoi togatoga ratahigi mo qaroqaroga mwere vatu hi emeral.

⁴Mo dali na tanoi togatoga ratahigi, a tano togatoga ratahigi ngavulu gairue domwagi gaivesi, ira tamaragai ngavulu gairue domwagi gaivesi ram toga lune. Ingere ram saru na luqe rau mevute ko a gai roroi qetu nona ratahigi raugihie lo kol ram eno lo qature.

⁵A vile, a mantawa ko a rorogi mo vanai dena tanoi togatoga ratahigi. Lo nagoi togatoga ratahigi a laeti gaibitu ram leleo, ngehi a vui gaibitu noi God.

⁶Vage lo nagoi tanoi togatoga ratahigi, a gineu u mwere tahi, mo leleo mwere na gelasi. Lolo livugegi mo dali na tanoi togatoga ratahigi a kakarue mwaso gaivesi a matara u toa dolueginire a mue ko atagu.

⁷A muei kakarue u mwere na laeon, tuegi u mwere na bulugi, gaitoligi a nagona mwere na tangaloi ko gaivesigi u mwere na mala hi mo olo.

⁸A kakarue gatagale a bainhine gaiono gesegi, ko a tarabesire u horo gina matara. Vataha bongi ko vataha rani ingere rahe manga tea ram huri ehi vena. “Gogona, gogona, gogona Huqe, God managi, u toga tuei, mo toga hibagataha ko ingeie vin toga vagituei.”

⁹A kakarue mwaso ingere hi ram ware roroi, ram lado mava ko ram vevegarea lawea hi mo toga lo tanoi togatoga ratahigi ngehi mo toga vagituei.

¹⁰Siu ira tamaragai ram taigihivo lawea hi mo toga lo tanoi toga ratahigi ko ram hudu goroe. Ingere ram tau na nora gairorovi qetu lo nagoi tanoi togatoga ratahigi ko ram veve vena:

¹¹“A Huqe nomai God, iniko gu tatarise ve goin lei na roroa, a lado mava ko huri gu vei na gineu doluegi. A gineu doluegi lolo ure ram toga huri gom tarani ve gon bete na mwasoana lawera.”