Read East Ambae A SERELUE LAWE JON 5 Bible Online

A SERELUE LAWE JON 5 - East Ambae bible

A SERELUE LAWE JON 5

¹Siu ineu nau lehi na Buk mo eno lo matuei hine hi mo toga lo tanoi togatoga ratahigi. A buk a uliuli mo eno lolona dalideli. A buk u lulu tabuluteginie ko a buk rau bulu bibie hala gaibitu.

²Siu ineu nau lehi na engsel u huire garagara mo ware gina dilo u lawua vena, ?Ihine hi u tatarise ve vin dare gaibulu vena waga na buk?

³Nge hatie ve hine gatagale lo eulu sige lo ure, sige lo vavai tano ve u tatarise ve vin waga na buk vena leo lolona.

⁴Ineu nau ngara uliu huri hatie ve a tangaloi mo tino ve u tatarise ve vin waga na buk ko vena leo lolona.

⁵Siu a tamaragai gatagale denire mo veve laweau vena, “!Iniko gon mese ngara, gon leo! A laeon den duvi Juda ngehi a duvi Devet vovohoi u qoragi na nona vuro doluegi, siu ingeie vin dare gaibulugi hala gaibitu vena waga na buk hi.”

⁶Siu nau leo vano lure tamaragai ram toga lo livuge ko a kakarue mwaso gaivesi lolo livugara tamaragai. Lo livuge, a tanoi togatoga ratahigi mo eno lo tavulugi ko a kakarue mwaso lo tavulugi. Ineu nau lehi na Netui Sibsib mo labe meire nam lehe ve rau ue vagamatea. A mauana gaibitu ko a matana gaibitu, ngerehi a vui noi God hi u horara himei lo ure.

⁷I Netui Sibsib u vanai mo wali na buk dena matuei hine hi mo toga lo tanoi togatoga ratahigi.

⁸Lune i Netui Sibsib mo wali na buk a kakarue mwaso gaivesi, ira tamaragai ngavulu gairue domwagi gaivesi ram taigi hivo lo nagora gagatalegi ram hakovi na bue uviuvi ko a laha hi rau gihie lo kol rau horo gina gaibuhoru ngehi a tataro nora sinobu gogona noi God.

⁹Ingere doluegi ram huri na ahi garaqa lawe Netui Sibsib. “Iniko gu tatarise ve goin lei na buk ko goin dare na gaibulugi, a vevenagi rau uevagamatego, nge gina dai nomu mateana gu voli tuguhi na sinobu lawe God, dena duvigi doluegi, a babai tangaloi doluegi, a nora leo ko a vanuara.

¹⁰Iniko gu veire ram voragi tangaloi rugurugu noi nomai God lolo ure hi iniko gom ratahigi lolona ko ingere rain huqegi lo ure.”

¹¹Siu nam leo ko rongo na diloi engsel saosao mo dali na tanoi togatoga ratahigi ko a kakarue gaivesi ko ira tamaragai ngavulu gairue domwagi gaivesi. A engsel u sao, u sao dain he valu laire tea,

¹²ram ware gina dilo u lawua ram veve vena, “I netui hi rau vagamatea u tatarise ve vin lei na huireana, mwerai hako gineu ko a matai sao, a huireana, a roroa, ladomava ko a waregarea!”

¹³Siu ineu nau rongo na gineu mwaso doluegi lo eulu ko lolo ure, ko lo vavai tano ko lolo tahi. Ingere doluegi ram huri vena, “Ihine hi mo toga lo tanoi togatoga ratahigi, ko i Netui Sibsib, igide doluegi dain bete na waregarea, a tanoi ladomava, a roroa ko a huireana vin eno vagi tuei.”

¹⁴A kakarue gaivesi ram veve vena, “Amen,” ko ira tamaragai ram taigi hivo ram hudugoro.