Read East Ambae A SERELUE LAWE JON 6 Bible Online

A SERELUE LAWE JON 6 - East Ambae bible

A SERELUE LAWE JON 6

¹Siu ineu nam leo vano, nam lehi na Netui Sibsib mo dare na gaibului buk a muegi. Ineu nam rongo na dilo mo mwere na mantawa vanai dena kakarue mwaso gatagale mo veve vena, “!Iniko gon vanai!”

²Ineu nam leo a hosi mavute mo mwalue. A tangaloi mo toga lune mo hakovi na vuhu mena liuegi, ingere ram bete na gairorovi qetu lawea ingeie mo toa mo vano ve vin qoragi na vurogi.

³Lune i Netui Sibsib mo dare na gaibului buk tuegi, ineu nam rongo na kakarue tuegi mo veve vena, “!Iniko gon vanai!”

⁴Ineu nam lehi na hosi memea mo mwalue. A tangaloi mo toga lune u veilei ve vin lei vohogi na tamwata dena ure siu hurive a sinobu rain vui wehiwehire. Ingere ram bete na buei vuro lawua lawea.

⁵Lune i Netui Sibsib mo dare na gaibului buk gaitoligi ineu nam rongo na kakarue mwaso gaitoligi mo veve vena, “!Iniko gon vanai!” Ineu nam lehi na hosi maeto mo mwalue, a tangaloi mo toga lune mo hakovi na sigele lo limana.

⁶Ineu nam rongo na dilo lolo livugei kakarue mwaso gaivesi mo veve vena, “!A getei kone gatagale u tatarise huri na gaivolivoli lo rani gatagale ko a getei bereti gaitolu huri na gaivoli lo rani gatagale, nge ihine tea vin mese vai vohogi na oel mena waen!”

⁷Lune i Netui Sibsib mo dare na gaibului buk hi gaivesigi, ineu nam rongo na diloi kakarue mwaso gaivesigi mo veve vena, “!Iniko gon vanai!”

⁸Ineu nam lehi na hosi mo mwalue a vinune u qenu. A henana tangaloi hi mo toga lune i mateana ko a tangaloi mo hurie a henana i togagi venue nora tangaloi rau mate. God u bete na huireana lawera ve rain ue vagamate na duvi sinobu talo ure. Lavasigi rain mate gina buei vuro, lavasigi rain mate gina mwaruruhie, lavasigi rain mate gina segeana rau esi ko lavasigi rain mate gina kakarue turu talolo ure.

⁹Lune i Netui Sibsib mo dare na gaibului buk gailimegi ineu nam leo vano lo vavai tanoi rugurugu nam lehi na tamatera hi rau mate huri rau waregi sere na leoi God ko ram veve lue na leo i hogo

¹⁰A tamate ngerehi ram ulo gina dilogi u lawua, ram veve vena, “!Huqe iniko gu gogona ko iniko a hogo! I gamai gain rarai vin dadari tagaha ve goin vevegi na sinobu talo ure ko goin soso lawera huri rau ue vagamate gamai?”

¹¹Siu ingere gagatalegi ram lai na luqe rau mevute ko a leo mo veve lawera ve rain rarai vin mala ribi, ire tuara ko ire haqera lavasigi rau ladohogo lui Kraes, rahe ue vagamatera tea mosigei, mwere ingere rau mate. A tamatera lo vavai tanoi rugurugu rain rarai vin dadari a gineu ngaha vin vei.

¹²Siu ineu nam leo i Netui Sibsib mo dare na gaibului buk gaionogi. A ruru lawua u vei. A aho mo maeto mwere na manono ko a vule mo memea mwere na dai.

¹³A visiu lo mahava ram soi sulo tano mwere na mwasigei ram soi talo tano lune a langi mo hereginire.

¹⁴A dodo mo sala mwere na qana ngehi a tangaloi mo lulue, a visiu teri ko a vanue ram tagagi dena tanora.

¹⁵Siu a Ratahigi doluegi lolo ure ira huqegi doluegi, ira leo goro soldia doluegi, ira mwerai homu, a sinobu a nora huireana lure, ira tangaloi tabana vurogi, ko a sinobu rahe tino tea lo vavai leo, rau hili lolo malanga, ko lo vavai vetu lalawua lo vusi.

¹⁶Ingere doluegi ram ware vusi ko a vatu lalawua, “!Nen soi sulumei ko nen vunigi gamai dena nagoi hine hi mo toga lo tanoi togatoga ratahigi ko dena lolo gagasi noi Netui Sibsib!”

¹⁷A rani lawua huri na lologagasi noi God u vanai beno. “?Ihine vin labe lai lo rani hi?”