Read East Ambae A SERELUE LAWE JON 7 Bible Online

A SERELUE LAWE JON 7 - East Ambae bible

A SERELUE LAWE JON 7

¹Lo tagugi hi ineu nau lehi na engsel gaivesi ram labe gagatalegi lo hugunei ure gaivesi, ram wirigoro na matai lengi gaivesi, siu hurive a langi esi vin he here tea talo ure, sige lolo tahi, sige vin mese here sulo gai tea.

²Ko ineu nau lehi na engsel tuegi vage u hamai dena vuimatainaho mo hakovi na gaigigilegi noi God, ingeie u ulo gina dilogi u lawua lawe na engsel gaivesigi hi i God u bete na huireana lawera ve rain vei vohogi na ure ko a tahi.

³A engsel hi u veve vena, “Igimiu nein mese vai vohogi na ure, sige a tahi, sige a gai teri, vage vin dadari gain teu na gaigigilegi noi God lo raera nona tangaloi tabanagi doluegi.”

⁴Ko a leo u vanai laweau ve a tovogi hi rau lei na gaigigilegi noi God lo raera, ingere teri vudolue vagatagale avigi ngavulu gaivesi domwagi gaivesi Ingere hi dena duvi Israel hangavulu domwagi gairue.

⁵Teri vatu hangavulu domwagi gairue den duvi Juda, Ruben, Kad, Asa, Navtali, Manase, Simion, Livae, Aisaka, Sebulun, Josev mei Benjemen.

⁹Lo tagugi hi ineu nam leo vano, ko nam lehi na buri sinobu u lawua, a tangaloi vin he valu leire tea doluegi. Ingere ram vanai dena vanue wagiwagineu, a duvigi rau wagiwegineu ko ram gato lo leo wagiwagineu, ram labe lo nagoi togatoga ratahigi ko lo nagoi Netui Sibsib, ram luqegi na luqe rau mevute ko ram wali na bagai metui lo limara.

¹⁰Ingere ram ulo gina dilogi u lawua vena, “!A vai vagamwasoi mo vanai dena noda God hi mo toga lo tanoi togatoga ratahigi ko deni Netui Sibsib!”

¹¹Ira engsel doluegi ram dalibulu goro na tanoi togatoga ratahigi, ira tamaragai ko ram labe dalibulu goroi ira tamaragai a kakarue mwaso gaivesi, siu ingere ram soi hivo ko ram taigi na nagora sulo tano lo nagoi tanoi togatoga ratahigi ko ram hudugoro God.

¹²Ingere ram veve vena, “!Amen! A waregarea, a waregiroroi, a mataisao, a vevegarea, a huireana, a ladomava ko a muremure a noi God gahea vagituei! Amen!”

¹³Denire tamaragai gatagale mo huieu vena, “?Irahine sinobu ingere ngaha ram luqegi na luqe rau mevute ko ingere ram vanai logo?”

¹⁴Ineu nam duvi lawea vena, “Nahe iloe tea, nge iniko gu ilo.” Ingeie mo veve laweau vena, “A sinobu ingere ngaha hi rau mwelue turu na mateana asi. Ingere rau solo mwasaragi na luqara ko rau veire ram mavute gina dai Netui Sibsib.”

¹⁵Giniehi, ingere ram labe lo nagoi tanoi togatoga ratahigi noi God, ram tabanagi lawea lolo rani ko lolo bongi lolo valena. Ihine hi mo toga lo tanoi togatoga ratahigi vin kokogorora.

¹⁶Ingere rain he mwaruruhi lai tea taligu, sige ve rain madogu, hatie aho ve vin raqara ko sige ve a hava mwamwavie tea ve vin hogosire taligu.

¹⁷A vevenagi i Netui Sibsib hi u toga lolo livugei tanoi togatoga ratahigi, ingeie vin kokogorora ko ingeie vin tomueginire sulolo wai meuri vena vai mesurigi. Ko vena bete na mwasoana lawera siu God vin mengi vohogi na nora tinengi dena matara.”