Read East Ambae A SERELUE LAWE JON 8 Bible Online

A SERELUE LAWE JON 8 - East Ambae bible

A SERELUE LAWE JON 8

¹Lune i Netui Sibsib mo dare na gaibulu gaibitugi, a ute mo tara taqao lo eulu huri na mahogi qilodo.

²Siu ineu nau lehi na engsel gaibitu hi ram labe lo nagoi God ko ingere ram hakovi na bue uviuvi gaibitu.

³A engsel tuegi vage hi mo hakovi na lahai gai buhoru rau gihie lo kol, u vanai mo labe lobei tanoi rugurugu. Ingeie mo hakovi na gaibuhoru u lawua ve vin bului na tataro nora sinobu noi God ko ve ran rugurugu ginie lo tanoi rugurugu hi rau gihie lo kol ngehi mo labe kakarani lobei na tanoi togatoga ratahigi.

⁴A kukui hure bonbon mo hage bubugi mena tataro nora sinobu noi God dena limana engsel hi.

⁵Siu a engsel mo lai na lahai hure bonbon mo hogoni na avi geni lolona dena tanoi rugurugu, ko mo tulie suhivo lolo ureure ko a vile, a mantawa mo dere, a ruru mo ruru, ko a dumdumi lalawua.

⁶Siu a engsel gaibitu ngerehi ram hakovi na tavue uviuvi gaibitu ram rarai ve ran uvire.

⁷A engsel a muegi mo uvi na bulana tavue a vatuvatui uhe mena avi mo roge mena dai ram rurungudu mo himei lo ure. A mahiqei ure gaitoligi u gao vohogi, a gai aiehi rau gao vohogi, ko a duvu doluegi rau gao vohogi.

⁸Siu a engsel tuegi mo uvi na bulana tavue a gineu mwere na vusi lawua mo gao mo soi talolo tahi, a duvi tahi aiehi mo dorigi dei.

⁹A duvi kakarue lolo tahi hi rau mate doluegi ko a aka teriteri lolona rau esi doluegi.

¹⁰A engsel gaitoligi mo uvi na bulana tavue. A visiu lawua mo mui mwere na tosi, mo soi dena dodo mo hivo lolo duvi wai halehale ko lolo matamata.

¹¹A henai visiu hi i, “Gogona,” u gogona mwere na ngoli sala. A duvi wai aiehi rau gogona, a sinobu sao rau inu na wai hi rau mate a vevenagi a wai rau gogona asiesigi.

¹²A engsel gaivesigi mo uvi na bulana tavue a aho a tavulugi mo dodo, tavulugi mo leleo hogosie. A vule a tavulune mo dodo, tavulune mo leleo ko a duvi buri visiu tavulugi ram qenu, ko tavulugi ram leleo.

¹³Ko ineu nau leo ko nam rongo na mala mo olo namawe garagara mo ngara gina dilogi u lawua vena, “A engsel gaitolu ram tino tau mosigei lune ingere rain uvi na bulara tavue, a gineu esi lawua lawe na tangaloi doluegi lolo ure. !Vin esi! !Vin esi garagara!”