Read East Ambae A SERELUE LAWE JON 9 Bible Online

A SERELUE LAWE JON 9 - East Ambae bible

A SERELUE LAWE JON 9

¹Siu a engsel gai limegi mo uvi na bulana tavue ko ineu nam lehi na visiu mo soi lo mahava mo hivo lo ure. Ingere rau bete na ki lawe na visiu hi, ve vin roa na matai welu bue hi hatie wotogi lune.

²Siu a visiu mo roa na matahala ngehi mo hivo lolo walu hi hatie wotogi lune, ko ahugi mo hamai dena walu mwere na ququi evi lawua. Siu a aho mena mahava rom dodo a vevenagi gina ququi evi hi mo hamai dena walu.

³Siu a diso ram himei lo ure dena ququi evi hi u bete na huireana lawera huri ve rain gesi na tangaloi mwere na gadi.

⁴Ingere rau veve lawera ve rain mese vai esiesigi na duvu, ko a rivurivu ko a gai lolo ure ngaha. Ingere rain vei gagarasigi nire tangaloi hi hatie gigilegi nona Huqe lo raera.

⁵Ingere rain he bete na huireana tea lawe na diso ve rain ue vagamate na tangaloi nge rain bete na gagarasi lawe na tangaloi lo tarabesire huri na vule gai lime ko a gagarasigi mo mwere na gadi mo gasi na tangaloi.

⁶Lo taro hi a sinobu rain hikesi na turegi huri ve ingere rain mate mwere hilogo, nge ingere rain he haqea tea. Ingere rain tarani na mateana, nge a mateana olo vohogi denire.

⁷A diso rau mwere na hosi ram rarai ve rai vano lolo vuro. Ingere ram tari na gineu lo qature u mwere na gai rorovi qetu nona ratahigi rau gihie lo kol, a nagora u mwere na nagoi tangaloi.

⁸A vulure rau mwere na vului vavine ko a livora rau mwere na livoi laeon.

⁹A mabure rau mwere na aean mwere na luqei vuro hi mo eno goro na liue. Lune ingere ram olo a dumi langi lengisi bainhine ram dumi mwere na buri hosi hi ram toa vano lolo vuro.

¹⁰A diso ingere hi a livora ram eno lo golora mwere na livoi gadi. A gadi hi ram gasi na tangaloi a gagarasigi mo eno lo tarabesire huri na vule gai lime.

¹¹A nora ratahigi gatagale, a engsel hi mo leo goro na walu hi hatie wotogi. A henana lo leora talo Hibru, “Abadon,” ko a henana lo leora talo Krik, “Abolion.”

¹²A gineu esi muegi u vano beno, nge gairue rom vanai tau mosigei.

¹³Siu a engsel gaionogi mo uvi na bulana tavue. Ineu nam rongo na dilo mo vanai dena hugunei tanoi rugurugu gaivesi hi rau gihie lo kol mo labe lo nagoi God.

¹⁴A dilo mo veve lawe na engsel gaionogi hi mo wali na bulana tavue, mo veve vena, “Igimiu nen torosiregi na engsel asi gaivesi hi rau veu bibire lolo wai halehale hi a lawua Iuvretes.”

¹⁵Siu ingere ram riqe na engsel gaivesi hi ingere rau tino rarai tuei beno ve vin dadari lo taro ngaha, lo vule ngaha ko lo rani ngaha. Ingere rau rarai ve rain ue vagamate na duvi tangaloi ta lo ure

¹⁶Lolo tano qaloana hi a tangaloi u sao garagara ram toga lo hosi vuro hi ram toa lo hosi. Nam rongo na tovora huri ve - 200,000,000, vudolue teri vagarue.

¹⁷Ineu nau hueri nam lehi na tangaloi ram toa lo hosi. A luqei nora qaloana rau memea, rau gesana ko rau angoga mwere na salva. A qatui hosi ingere hi rau mwere na qatui laeon, ko mena avi, a ququgi ko a vatu hi u gara, garagara ram mwalue dena wuwara.

¹⁸A duvi tangaloi ta lo ure rau mate gena gineu esi gaitolu hi, a avi, a ququgi ko a vatu hi u gara, garagara hi ram mwalue dena wuwai hosi ingere hi.

¹⁹A huireana nona hosi ingere hi mo eno lo wuwara ko lo golora vage. A golora ram mwere na mwata hi a qature ram gasi na tangaloi ginire.

²⁰Nge a tangaloi lavasigi nge hi rahe mate tea lo gineu esi ngerehi, rahe dori na domire tea ve rain tudori dena havagineu hi rau vei gena limara. Ingere ram van tuturedu ram huduhudu goro na vui esi. Ko a nunui tarabesi gineu hi rau gihie lo kol, vatu, ko a gai. A gineu ingere hi rahe leo tea, rahe rongo tea ko rahe dige tea.

²¹A tangaloi ingere hi ra he dori na domire tea dena nora galegaleasi asi, ram van tuturedu ram ue vagamate tangaloi, ram vai na gaqaleva, ram vai na galegaleasi asi meire vavine ko ram balubelu.