Read Eastern Krahn Matio' 11 Bible Online

Matio' 11 - Eastern Krahn bible

Matio' 11

¹:Yee' :yeh :Yusu' gweh-a or-a'a: bo :na-nyor:⧾ :on :korn-a :bhue: 'yor :ne-a 'sororn', an-a' wlu worn 'dhu-eh: 'i, :yee' or 'wluh 'o :dha 'o 'weh, or mu, or 'ye nyor⧾ deh :torne:, 'de or 'ye Nyorsoa-a' tubo-wlu⧾ po, 'de :gwlor⧾ :eh :ne-a 'de :Galali'i-bluhba ken 'di.

²:Yee' :yeh nyor⧾ 'ni 'dlu :po :Jororn' :or :ne-a :kasue 'di, or 'worn-a deh⧾ or no-a, :yee' or dbo or-a'a: bo :na-nyor⧾ 'de or bo,

³on 'ye-or' dih dhele:, on 'ye :ao', :Mor 'o, :or 'dhu nyor :or mu-a 'de :yi :e? :Ae' :a :fuo: nyor :noror' 'ken ke?

⁴:Yeh on dhele-or dih, :yee' :Yusu' zela-uh-: :gwluhuh', or 'da, A mu deka. :Yee' a zela: :Jororn' :gwluhuh' deh⧾ a 'worn-a-: 'dekorn: deh⧾ a 'ye-a-:.

⁵'Doror'-nyor⧾-a 'ye-: dih. 'De :kloror-nyor⧾-a na. 'De nyor⧾ yau-zon-weh kpon-a, an 'puh, 'de on :gweh :vlehehn'-' :ka :Mose'-a' 'tele' no-a mu-a'. 'De 'suun'-nyor⧾-a 'worn dih. 'De 'meheh'-nyor⧾-a sorn-'. 'De Nyorsoa-a' tubo-wlu:⧾ 'jeh-a po-eh 'de se deh-a' :za-da 'ble-nyor⧾ bo.

⁶:Yee' :bhorlie' 'do nyor :or se-a 'an dhih-' dhobo:, 'do or :porluh ken.

⁷:Yeh :Jororn'-a'a: bo :na-nyor⧾-a 'wluh-a 'o :Yusu' bo, :yee' :Yusu' 'kpa 'o or-a' dhih :za 'da 'weh, 'de nyor⧾ :doru' :dao' bo, or 'dae:, Ti a mu-a 'de :Jororn' bo 'de :bhehneh'-bluhba ken, :yee' deh 'i-deh: a mu 'ye 'da :eh? A mu nyor :or gweh-a :peli'-gan: :pobor'-a bla-a, 'ye 'da :e?

⁸:Mor eh se :ao' :ne, :yee' :eh :korn dhih a mu 'de :bhehneh'-bluhba ken :eh? A mu nyor :or pa-a 'tiei: :nmaa'e-' 'ye 'da :e? 'Kei:. Nyor⧾ :on pa-a 'tiei: :nmaa'e, on 'ti 'de 'keen-boi' 'bli 'sla⧾ ya.

⁹:Yee' :eh :korn dhih a mu 'de :bhehneh'-bluhba ken :eh? A mu-', a 'ye Nyorsoa-a' wele-eh: :po-nyor 'ye :e? Keen' :mloror' :kpeheh:. Jorwor: 'an zela a :gwluhuh', or :se wele-eh: :po-nyor: 'suh. Or :zi 'o wele-eh: :po-nyor-' 'weh.

¹⁰Or-: 'o, :or :korn dhih Nyorsoa :za-a-' 'de or-a'a: 'chlee-deh 'di, or 'da, 'An mu 'an-a: tubo-wlu:⧾ :po-nyor :on ybei' :dbo o. Or-: mu :an-a'a: :gwie 'kpa :po 'do :on ybei'.

¹¹:Yee' :Yusu'-a kpa or-a' wlu 'dlu bo, or 'dae:, Dhih 'jeh, 'an zela a :gwluhuh', nyor⧾-a' klehkpeh 'nynor⧾-kpao'⧾ 'wluh-a, eh se nyor :korn :or 'ye-a 'i 'beh, :or 'ye-a 'o :Jororn'-' :zi. Jorwor: nyor :or no-a nyor 'zeehn :naa, 'do nyor⧾ :on :ne-a 'de Nyorsoa-a' nyor⧾ wlu 'ken :korn-eh 'zorn, :yee' or-a' 'jeh :dao', or-: 'beh 'i, or-: :zi 'o :Jororn'-'.

¹²:Eh 'wluh-a 'o ti :Jororn' 'ye-a' Nyorsoa-a' tubo-wlu⧾ po, :en kor-a Nyorsoa-a' nyor⧾ wlu 'ken :korn-eh 'i, 'de :eh :yeh-dih:-a 'zean'-we-eh: :daa ken, :yee' 'kulu-nyor⧾-a vorn-eh bo, on 'ye Nyorsoa-a' nyor⧾ wlu 'ken :korn-eh: on :torne: a-uh ya gba.

¹³:Mose'-a' 'tele'-: 'dekorn: Nyorsoa-a' wele-eh: :po-nyor⧾-a' klehkpeh-: :eh :yeh-dih:-a :Jororn' ken, an po Nyorsoa-a' wele-eh:, 'de an za Nyorsoa-a' nyor⧾ wlu 'ken :korn-eh-a' dhih-'.

¹⁴:Mor eh 'dhu, a 'beh-dih: a 'ye-eh' dhih 'jeh-' po, :Jororn' :daa, or-: 'dhu :Ila'yor-', :or mu-a 'de :yi.

¹⁵Nyor :or 'ble-a :dou'⧾, 'nyi or 'worn-ih.

¹⁶:Yee' deh 'i-deh: 'on 'beh-dih: 'on 'ye :kana-nyor:⧾ :daa 'i :po-dih: :eh? On gweh 'nynuu: :nyene' :on :dhe-a dih 'do 'doror', 'de :an wele-a on 'bei', :an no-a,

¹⁷:A bla :tou' 'do a bo. Jorwor: a-a' 'worn, a-a' ye. :A ble nyor-a' 'meheh'-duh:⧾ 'do a bo. Jorwor: a-a' 'worn, a-a' 'zlu.

¹⁸:Yee' :Yusu'-a kpa or-a' wlu 'dlu bo, or 'dae:, Ti :Jororn' yi-a 'de, :yee' or pa-' 'suehn:, 'de or :se-' nomor 'na, :yee' nyor⧾ 'da, 'Kwla 'ye-dih-deh: :ne 'o or 'de.

¹⁹:Yeh 'yu an 'da-dih-a Nyor-kpalu-a' 'yu yi-a 'de, or di deh 'weh, 'de or 'na, :yee' nyor⧾ 'da, A :gbee'e:. 'Yu :daa, or no deh :di-nyor-: nomor 'na-nyor-:. 'De or no 'taa-deh:⧾ :za-nyor⧾-: 'dekorn: deh⧾-zon:⧾ :no-nyor:⧾ :noo'-: an-a' :ybeh-dih-nyor. Jorwor: deh Nyorsoa-a' :toror' no-a, eh-: :to-dih-eh nyor⧾ 'i, :ka or-a' :toror' 'sleh-a 'i.

²⁰:Yee' :Yusu' 'kpa 'o :gwlor⧾ or :no-dih:-a deh⧾ :kolu'⧾ :dhulu' 'di, eh-a' 'bhun dih :wlu-dih: 'da 'weh. Deh no-eh, on :se-' an-a' deh⧾-zon⧾ dih 'tali:, 'de on :se-' dih 'bili: 'de Nyorsoa bo.

²¹Or 'dae:, 'Chlo 'do a :mor :Kola'zin-nyor⧾ bo. 'Chlo 'do a :mor :Behse'la-nyor⧾ bo. Deh no-eh, deh⧾ :kolu'⧾ 'on no-a 'do a bo, :mor 'on no-ih 'do 'Taya-gwlor-: 'dekorn: 'Saedorn-gwlor-: bo :dee', :yee' an mu an-a' deh⧾-zon⧾ dih 'tali:, 'de on 'ye 'de Nyorsoa bo 'bili: :dee' see, 'de on 'ye 'tiei-zon⧾-' pa, on 'ye 'de :bhuhbuh' 'nyne-' dih :dhe, on 'ye-eh' nyor⧾ 'i :to-dih: :ka on 'bili:-a-' dih.

²²'Do eh-a' dha, 'an zela a :gwluhuh', :yee' 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do nyor⧾ :dao' bo, eh 'ye a-uh' :zi.

²³:Yee' a :mor :Kapa'nior-nyor:⧾, 'do a bo. A 'bhorn a 'ye a-a' 'jeh 'i 'beh-dih: a 'ye 'de yai' nyni :e? 'Kei:. Nyorsoa-a mu a 'de 'ku 'bli :po. Deh no-eh, deh⧾ :kolu'⧾ 'on no-a 'do a bo, :mor 'on no-ih 'do 'Salor-gwlor bo, :yee' or mu dih :nyna :dee'.

²⁴Jorwor: 'an zela a :gwluhuh', :eh :mor 'do Nyorsoa-a' zabe: :zi-we-eh 'di, Nyorsoa-a mu :wehlih 'ye-: 'do :gwlor :dao', or-a' nyor⧾ bo, eh 'ye a-uh' :zi.

²⁵:Yee' 'do ti :dao' bo, :Yusu' 'dae:, 'On-ba:, :mor :or 'dhu-a :Gwlor :baa' 'de yai'-: 'dekorn: 'noror 'zorn-: 'on po :on 'zio. Deh no-eh, :on 'zile: deh⧾ :daa, :toror' :korn-nyor⧾-: 'dekorn: 'chlee-deh: yubo-nyor⧾-: dih, 'de :on :to-dih-ih 'nynuu: :nyene' 'i.

²⁶Keen', 'On-ba:, eh 'pehn-dih: :an-a' :porluh-: dih, :on 'ye-eh' no.

²⁷:Yee' or :wlu-' 'de nyor⧾ bo, or 'dae:, 'On-ba 'nyi 'on 'kpih 'weh, 'do deh⧾-a' klehkpeh bo. Eh se nyor :korn, :or 'ye-a Nyorsoa-a' 'Yu yubo:. Jorwor: or :Baa' :due' gbai, or-: yubo-or. 'De eh se nyor :korn, :or 'ye-a or :Baa' yubo:. Jorwor: or-a'a: 'Yu :due' gbai, or-: yubo-or, 'dekorn: :yuh or-a'a: 'Yu-a 'bhorn-a, or 'ye-a or :Baa' 'i :to-dih:.

²⁸:Yee' a yi 'noror 'on bo, a-a' klehkpeh :or no-a :koan, 'de :or 'ble-a 'gbeh⧾ :en :ku-a kwa. A yi 'noror 'on bo, a 'ye :forn.

²⁹A 'duo: 'an-a: nyor⧾ deh :torne-eh-a' 'gbeh-', a 'ye-eh' ken dih :po. 'De a 'chean' deh 'noror 'on bo. Deh no-eh, 'on :kpoehn: 'i, 'de 'on se 'an 'jeh 'i 'beh-dih:. :Yee' a-a' :porluh⧾-a mu dih :dhe.

³⁰Deh no-eh, nyor⧾ deh :torne-eh: 'an 'nyi a-uh, a 'ye-a' no, eh se 'i :kma. 'De mor 'gbeh 'an 'nyi a-uh, eh se kwa :ku.