Read Eastern Krahn Matio' 12 Bible Online

Matio' 12 - Eastern Krahn bible

Matio' 12

¹:Yee' 'do ti :dao' 'di, eh no Nyorsoa-a' :gwlee-we-eh:, :yee' :Yusu'-: 'dekorn: or-a'a: bo :na-nyor⧾-: an yi-dih 'de deh⧾-yor: an 'da-dih-a 'wii 'nyne-', 'de 'gle. :Yee' 'moeh: no or-a'a: bo :na-nyor⧾, 'de on 'duo: deh⧾-yor: :dao' en-' :nee'-a' kplan-a', 'de on di-ih.

²:Yeh :Falasi'i-nyor⧾ 'ye-eh, :yee' on :wlu-' 'de or bo, on 'dae:, :Gbee'e:. :An-a'a: bo :na-nyor⧾-a no deh :eh se-a 'o :a-a'a: 'tele'-a' :gwie 'i :ne, 'do Nyorsoa-a' :gwlee-we-eh 'di.

³'De or 'dae:, Deh :Debe' no-a, ti 'moeh 'ye-a' or-: or-a'a: bo :na-nyor⧾-: no, a :se-eh' zlo :e?

⁴Deh or no-a, eh-: :dhe dih. Or pa 'de Nyorsoa-a' 'gbu 'di, 'de or di 'bhlee: on po-a 'o Nyorsoa ybei' dih, :eh :ne-a gban 'i, :eh or-: or-a'a: bo :na-nyor⧾-: on se-a :korn on 'ye-a' di, Nyorsoa-a' 'slaa: :za-nyor⧾ :due'-a di-a.

⁵:Ae' a :ze-eh' zlo, 'de :Mose'-a' 'tele'-chlee-deh 'di, :eh :mor 'do Nyorsoa-a' :gwlee-we-eh 'di, Nyorsoa-a' 'slaa: :za-nyor:⧾ :on :ne-a 'de or-a' 'sla 'di, an wa-a 'tele' :e? Jorwor: on :se-' 'gen :za-eh:.

⁶'An zela a :gwluhuh', :ka deh :neheh' :ne-a :daa, eh 'beh-a 'i, eh :zi-a 'o Nyorsoa-a' 'sla-'.

⁷:Yee' :mor a yubo: deh eh :bleh-dih:-a 'i :dee', :mor Nyorsoa 'da, Eh :se 'slaa: :za-dih-deh:⧾ 'on :se-' 'bhorn. Jorwor: nyor⧾-a' :wehlih: 'ye-eh: 'o 'an 'bhorn, :mor a yubo-eh :dee', :yee' a :se-' nyor⧾ :on se-a eh-a' deh 'i yubo: zabe: :kpon-dih:.

⁸Deh no-eh, 'yu an 'da-dih-a Nyor-kpalu-a' 'yu, or no :Gwlor :baa' 'do Nyorsoa-a' :gwlee-we-eh 'dlu bo.

⁹:Yee' :yeh :Yusu' 'wluh-a 'o :dha 'o, :yee' or pa 'de an-a' 'di :gweh-dih-sla 'zorn.

¹⁰'Do :wor or :yeh-dih: 'yu :due' :or :korn-a son 'meh-a. 'De on dhele-or dih, on 'da, Eh :ne 'o :a-a'a: 'tele'-a' :gwie 'i 'weh :e, nyor 'ye :gwlor-nyor⧾ 'puh-dih: 'do Nyorsoa-a' :gwlee-we-eh 'di :e? On :za deh :daa-' 'weh, deh no-eh, an 'bhorn :ka on 'ye-a' no, 'de on 'ye-or' 'tele' dih :kpon-dih:, 'do deh-zon: :no-eh bo.

¹¹:Yee' or :wlu-' 'de on bo, or 'dae:, :Mor a-a' nyor :due' 'ble 'blae', 'de jorwor: eh 'ye 'de 'bie' :dhorno' 'di 'kpa, 'do Nyorsoa-a' :gwlee-we-eh 'di, :yee' nyor :dao' or :se-eh' :kpon i, 'de or 'ye-eh 'de :za :e?

¹²:Yee' dha :gwlor-nyor-a mu :na-dih: :eh, :or 'kpa-a deh ken :kao', :or :zi-a 'o 'blae'? Eh-: :korn dhih :a-a'a: 'tele' 'worn-dih-eh ken dih, :a 'ye nyor bo 'kpa, 'do Nyorsoa-a' :gwlee-we-eh 'di.

¹³'De or :wlu 'de son-a' 'meheh'-nyor: :dao' bo, or 'da, Slo :an-a' son. 'De or slo-uh. :Yee' or-a' son 'bor-', on 'sleh 'i, :ka on 'be :ne-a.

¹⁴Jorwor: :yeh :Falasi'i-nyor⧾ 'ye-a deh :dao', :yee' on 'si-: 'zorn, 'de on 'dhu dhih :ka on 'ye-a' :Yusu'-a' 'dba-a' no.

¹⁵:Yee' :yeh :Yusu' yubo-eh 'i, :yee' or 'wluh 'o :dha 'o 'weh. 'De nyor⧾ :dhulu' zi 'o or klei', 'de or 'puh-dih: puhba-nyor⧾-a' klehkpeh :on :ne-a 'de on 'klu-'.

¹⁶:Yee' or 'dhu-uh 'slen, on :ne-eh' no, 'de nyor⧾ :ne-' nyor or 'dhu-eh:-' yubo:.

¹⁷Or no deh :daa 'weh, 'de Nyorsoa-a' wlu 'ye dhih 'jeh-' 'kpa :ka or-a' wele-eh: :po-nyor: :Azaya' no-a eh-a' :za-a' see, or no-a, Nyorsoa 'da,

¹⁸'An-a: 'bhoi-yu :wor :dhe dih, :or 'on gan-a, :yor 'on :ybeh-a-', 'de 'an :gwluhuh' 'pehn-dih:-a ken dih. 'An mu 'an :Zulu or ken :po, :yee' or mu 'an 'ton :korn-deh-a' dhih-' :za, 'de 'bluhba⧾-dlu⧾-a' klehkpeh bo.

¹⁹Or :se-' :jeh i, 'de mor or :se-' 'geh⧾ :po i. Nyor-beh :se-' or-a' wlu 'worn-: i 'do 'kpa :gwie 'i.

²⁰Nyor :or gweh-a tu :an 'bhorn-a :jla-a' :dee' see, or :se-or' :jla i. 'De mor nyor :or gweh-a 'nape :eh 'bhorn-a 'mo-a' :dee' see, or :se-or' 'mo-dih: i. Or mu-eh :no :chio'lo:, 'de or-a' 'ton :korn-deh 'ye :glaa' kpa.

²¹:Yee' or-: 'bluhba⧾-dlu⧾-a' klehkpeh-a mu :gwlii' :dhe.

²²:Yee' nyor⧾ :ya 'de :Yusu' bo 'yu :due' :or 'dor-a, 'de :or se-a :wlu-a' 'beh-dih:, deh no-eh, 'kwla 'ye-dih-deh: :ne 'o or 'de. 'De :Yusu' 'puh-dih-or. :Yee' eh-: no-eh, 'de or 'duo: :wlu-a'-', 'de or 'ye dih.

²³:Yee' nyor⧾-a' klehkpeh :on :ne-a 'o, eh :florn-dih-uh-: worn, 'de an dhele-eh dih, an no, 'Yu :daa, or 'beh-dih: or 'ye :Debe'-a' 'yu no :e?

²⁴:Yee' :yeh :Falasi'i-nyor⧾ 'worn-ih'-a, :yee' on 'dae:, :Behzeh'bu: 'o, :on no-a 'ku, 'de :on no-a 'kwla 'ye-dih-deh: :klaba', mo-: 'nyi-or 'kpih, 'de or za nyor⧾ 'kwla 'ye-dih-deh⧾ 'de.

²⁵:Yee' :Yusu' yubo: deh an za-a-' 'do on :gwlii' 'weh, 'de or 'da, :Mor 'bluhba-dlu :za an-a' 'jeh 'sororn', 'de on 'ye an-a' 'jeh bo vorn, :yee' 'bluhba-dlu: :dao', an mu gbe :zie:. :Mor gwlor :za or-a' 'jeh 'sororn', 'de mor 'gbu :due' 'di-nyor⧾ 'ye an-a' 'jeh 'sororn' :za, 'de on 'ye an-a' 'jeh bo vorn, :yee' on :se-' dih :nyna i.

²⁶:Mor 'ku 'si-dih: 'ku 'zorn, :yee' on :za an-a' 'jeh 'sororn', 'de an vorn an-a' 'jeh bo. :Yee' :kaa an-a' nyor⧾ wlu 'ken :korn-eh mu dih :nyna-eh :no :eh?

²⁷:Yee' :mor eh 'dhu, :Behzeh'bu 'nyi 'on 'kpih, 'on 'ye nyor⧾ 'kwla 'ye-dih-deh⧾ 'de :za, :yee' :or 'nyi a-a'a: nyor⧾ 'kpih, 'de an za nyor⧾ 'kwla 'ye-dih-deh⧾ 'de :ke :eh? :Yee' 'do eh-a' dha, mo-: :an mu a-a' zabe: :zi-nyor⧾ :no.

²⁸Jorwor: :mor eh 'dhu, Nyorsoa-a' :Zulu: 'nyi 'on 'kpih, 'on 'ye nyor⧾ 'kwla 'ye-dih-deh⧾ 'de :za, :yee' eh-: za-eh gbor :ka Nyorsoa-a' nyor⧾ wlu 'ken :korn-eh :ne-a 'noror a 'klu-' :naa.

²⁹'De mor :neheh', nyor :yoror :or 'beh-dih: :or 'ye :kmuu-nyor-a'a: 'gbu wa, 'de :or 'ye or-a'a: 'tiei-' 'duo: :eh? Jorwor: :mor or 'ye-eh' no, or mu :kmuu-nyor: :dao' :san :weh, 'de or 'ye or-a'a: 'tiei kpa.

³⁰Nyor :or se-a 'noror 'an 'for bo :ne, :yee' or vorn 'on bo. :Yee' nyor :or se-a 'on bo 'kpa 'do deh⧾-a' :dha :due' :po-eh bo, :yee' or gboba deh⧾ dih.

³¹:Yee' 'do eh-a' dha, 'an zela a :gwluhuh', nyor⧾-a' deh⧾-zon⧾-a' klehkpeh-: 'dekorn: Nyorsoa-a' 'nyne 'kor-dih-eh-: en mu bo 'ma-dih-eh:. Jorwor: nyor :or 'kor-dih:-a Nyorsoa-a' :Zulu-a' 'nyne, or-a' deh⧾-zon⧾-a' dhih :se-' bo 'ma-dih-eh: i.

³²Nyor :or mu 'yu an 'da-dih-a Nyor-kpalu-a' 'yu 'bhun dih :wlu-dih:, or-a' deh⧾-zon⧾-a' dhih-a mu bo 'ma-dih-eh:. Jorwor: nyor :or mu-a Gban 'i :ne :Zulu 'bhun dih :wlu-dih:, or-a' deh⧾-zon⧾-a' dhih :se-' bo 'ma-dih-eh: i, :kana-: 'dekorn: 'de 'kmo-a' nya-:.

³³:Yee' :mor tu no tu 'jeh, :yee' an mu 'bi 'jeh ne :tlo. Jorwor: :mor on no tu-zon, :yee' an mu 'bi-zon⧾ :tlo. Deh no-eh, tu-a' 'bi, me-: nyor⧾-a yubo-dih tu.

³⁴A :mor sane-zon⧾-nynuu: :daa, :kaa a :mor, :or 'dhu-a 'kulu-nyor⧾-', a 'ye deh⧾ 'jeh-' :za-a' no :eh? Deh no-eh, deh⧾ :en 'yi-a 'o 'do a-a' :porluh⧾ ken, me-: a-a' worn⧾ za-'.

³⁵Nyor 'jeh nor dhe deh⧾ 'jeh dih, 'do :wor or za deh⧾ 'jeh, 'de 'kulu-nyor dhe deh⧾-zon⧾ dih, 'do :wor or za deh⧾-zon⧾.

³⁶'An zela a :gwluhuh', :eh :mor 'do Nyorsoa-a' zabe: :zi-we-eh 'di, :gwlor-nyor⧾-a mu bo zela:, 'do wlu⧾ :en yi-a 'o on worn⧾ 'i :due' :due' bo.

³⁷Deh no-eh, :an-a' wlu-a mu-eh :no, 'de :on 'ye 'gen :korn, 'de :an-a' wlu-a mu-eh :no, 'de zabe 'ye :on kpon.

³⁸:Yee' :Falasi'i-nyor⧾-: 'dekorn: nyor⧾ 'tele' :torne-nyor⧾-: an-a' nyor⧾ :noo' :wlu 'de :Yusu' bo, on 'dae:, Nyor⧾ deh :torne-nyor:, :a 'bhorn :on 'ye :a 'yi :to-dih-deh 'i :to-dih:.

³⁹Jorwor: or :wlu-' 'de on bo, or 'dae:, :Kana-nyor:⧾ :daa, :on no-a deh⧾-zon:⧾ :no-nyor⧾, 'de :an-a' no-a :dhehehn-deh⧾ 'do Nyorsoa bo, an 'bhorn 'yi :to-dih-deh:. Jorwor: 'yi :to-dih-deh :due' an mu-a 'ye-: 'klein', eh-: 'dhu, Nyorsoa-a' wele-eh: :po-nyor: :Jona'-a' 'yi :to-dih-deh-'.

⁴⁰Deh no-eh, :ka :Jona' zi-a zorn-we taan-: 'dekorn: glu-we taan-: 'de zimi-eh: :klaba' 'di, :yee' 'ka-: 'yu an 'da-dih-a Nyor-kpalu-a' 'yu-a mu zorn-we taan-: 'dekorn: glu-we taan-: 'de glu :zi-eh :no :ke.

⁴¹'Do Nyorsoa-a' zabe: :zi-we-eh 'di, 'Neneva-nyor⧾-a mu dih :nyna, 'do :kana-nyor:⧾ :daa ybei', 'de on 'ye-uh zabe :kpon-dih:. Deh no-eh, on 'tali: an-a' deh⧾-zon⧾-: dih, 'de on 'bili: 'de Nyorsoa bo, ti :Jona' po-a Nyorsoa-a' tubo-wlu⧾ 'de on bo. A :gbee'e:. Nyor :noror' :noror' :ne :daa :naa, or-: 'beh 'i, or-: :zi 'o :Jona'-'.

⁴²'Do Nyorsoa-a' zabe: :zi-we-eh 'di, 'keen-nynor: :or 'wluh-a 'de 'bluhba-dlu: :on :ne-a 'de 'yluh-a' 'kwla 'wluh-dih: 'da-a' kona-for bo, or mu dih :nyna, 'do :kana-nyor:⧾ :daa ybei', 'de or 'ye-uh zabe :kpon-dih:. Deh no-eh, or 'wluh :dha :dhorno' or 'ye 'Keen :Salomor'-a' :toror' :korn-eh :dou'⧾ bo :to. A :gbee'e:. Nyor :noror' :noror' :ne :daa :naa, or-: 'beh 'i, or-: :zi 'o :Salomor'-'.

⁴³:Yee' :Yusu'-a kpa or-a' wlu 'dlu bo, or 'dae:, :Mor 'kwla 'ye-dih-deh :za-eh 'o nyor 'de, :yee' eh zi-dih-'-: dih, eh na 'de 'kwla⧾-' dih. Eh 'bhorn :dha eh 'ye-a' :forn-dih:. Jorwor: :mor eh se dha 'ye,

⁴⁴:yee' eh 'da, 'An mu 'de 'an-a: 'gbu soa 'di de :mu, :dha 'on 'wluh-a. 'Ka-: 'o eh no, 'de eh yi de. :Yeh eh yi-a de, :yee' eh 'ye eh-a'a: 'gbu soa, on :florn 'di dih, 'de on wobo-eh: 'di dih, on :po-eh: 'kpa.

⁴⁵:Yee' eh mu-', eh :ya 'de 'kwla 'ye-dih-deh:⧾ :nee' :meheh' 'sorn, :en no-a 'kulu-deh⧾, :en :zi-a 'o eh-a' 'jeh-', 'de en pa, en 'ti 'de. :Yee' :mor en gweh 'de or 'di 'dlu, :yee' nyor :dao', or :ne-' 'kmo-zon: :on :zi-a 'o, or-a' :zai' neh-'. :Yee' 'ka-: 'o eh mu :no :ke, 'do :kana-nyor:⧾ :daa :on no-a deh⧾-zon:⧾ :no-nyor⧾ bo.

⁴⁶:Yee' :yeh :Yusu'-a wlu-a 'de nyor⧾ bo :chio'lo:, :yee' or 'de-: 'dekorn: or-a' dei'-nyor⧾-kpalu⧾-: mo-: :nyna dih 'do 'zorn, 'de on dhele: nyor⧾ dih :ka an 'bhorn-a on 'ye-a' 'de or bo :wlu.

⁴⁷'De nyor zela-or :gwluhuh', or 'da, :On 'de-: 'dekorn: :an-a' dei'-boi'-: mo-: :nyna dih 'do 'zorn, :an dhele :on dih. An 'bhorn on 'ye 'de :on bo :wlu.

⁴⁸Jorwor: :Yusu' dhele-or-: dih, or 'dae:, :Or 'dhu 'on-de-' :eh? :Or 'dhu 'an 'de-di'-boi'-' :eh?

⁴⁹'De or slo or-a' son 'de or-a'a: bo :na-nyor⧾ bo, or 'da, 'On-de-: 'dekorn: 'an 'de-di'-boi'-: mo-: :dhe dih.

⁵⁰Deh no-eh, nyor :or no-a 'On-ba: :or :ne-a 'de yai', or-a' 'ton :korn-deh, or-: 'dhu 'an 'de-di'-boi'-: 'dekorn: 'on-de-:-'.