Read Eastern Krahn Matio' 13 Bible Online

Matio' 13 - Eastern Krahn bible

Matio' 13

¹'Do 'we-eh :due' :dao' 'di, :yee' :Yusu' 'wluh 'de 'gbu 'di, 'de or mu 'de :Galali'i-yobo'-pehnu worn 'i, 'do :wor or :dhe dih.

²:Yee' :gwlor-nyor:⧾ :doru', mo-: 'gbo-dih-or 'dlu dih. Eh-: no-eh, 'de or 'kpa 'de 'blagbe 'di, 'do :wor or :dhe dih, 'de an-a' klehkpeh :nyna dih 'do 'kpuhba' 'i.

³Or zela-uh deh⧾ :dhulu' :gwluhuh' 'de 'dlan⧾ 'di, or 'dae:, :Yee' 'yu :due' :oo', or-: mu deh⧾-yor: :gba 'da.

⁴:Yeh or gba-ih-a 'de 'gle, :yee' :nee' 'kpa 'o :gwie 'i, 'de neme 'yle, en mla-ih.

⁵:Nee' 'kpa 'o 'bluhba ken, :or :ne-a 'soba 'zorn. :Yeh en 'kpa-a 'o, :yee' en 'dhobo: en 'wluh-'. Deh no-eh, 'bluh :dhulu' se 'o :ne.

⁶Jorwor: :yeh 'yluh :kma-a 'i, :yee' en wlor-'. :Ka en-' buh⧾ se-a :dha :dhorno' mu 'de glu, :yee' en 'klan-'.

⁷'De :nee' 'kpa 'de 'wu⧾-kwla 'nyne-'. :Yeh 'wu⧾ ku-a, :yee' en :mla-dih-ih-: worn.

⁸Jorwor: :nee' 'kpa 'o 'bluhba: 'jeh ken, me-: wa. :Yeh en wa-a, :yee' :nee' po 'yor-a' :kehehn' :due', :nee' po :kwlaa :meheh'lo:, 'de :nee' po :kwlaa taan.

⁹:Yee' :Yusu' 'da, Nyor :or 'ble-a :dou'⧾, 'nyi or 'worn-ih.

¹⁰:Yee' or-a'a: bo :na-nyor⧾ yi 'o or bo, 'de on dhele-or dih, on 'dae:, :Eh no 'de :an wlu 'de nyor⧾ bo 'de 'dlan⧾ 'di :eh?

¹¹'De or :wlu 'de on bo, or 'dae:, Nyorsoa-a' nyor⧾ wlu 'ken :korn-eh-a' 'slan :za-eh: gbor 'de a :mor :mloror' bo. Jorwor: or :se-' nyor⧾ :dao' 'nyi-eh:.

¹²Deh no-eh, nyor :or 'ye-a deh⧾ :dhulu', or-a'a: deh⧾ :dhulu' or 'ye-a, en mu ken 'kpa-:, 'de or 'ye :doru' 'ble. Jorwor: nyor :or se-a deh 'ye, or-a'a: deh-yu-a' 'jeh or 'ble-a, eh mu-or 'kwa :za-eh:.

¹³Deh-: :korn-a dhih, 'de 'an wlu-dih-a 'de 'dlan⧾ 'di 'de on bo, eh-: 'dhu, an pobo-: dih, jorwor: an-a' 'ye dih. 'De an :to :dou'⧾ 'weh, jorwor: an-a' 'worn dih, 'de mor an-a' 'worn deh-' dih.

¹⁴:Yee' 'do an-a' dhih bo, deh Nyorsoa-a' wele-eh: :po-nyor: :Azaya' :za-a-', eh 'kpa-' dhih 'jeh, or no-a, An mu :dou'⧾ :to :too:, jorwor: on 'se 'ba deh-' dih 'worn, 'de an mu dih pobo: :poboo:, jorwor: on 'se 'ba dih 'ye.

¹⁵Deh no-eh, nyor⧾ :daa, an-a' 'dlu⧾ 'sun-', 'de on :se-' 'bhorn on 'ye :dou'⧾ :to, 'de on kan 'yli, 'de on :ne-' dih 'ye, 'de on :ne-' dih 'worn, 'de on :ne-' deh-' dih 'worn 'do an-a' :porluh⧾ ken, 'de on :ne-' dih 'bili:, 'de Nyorsoa :ne-uh' 'puh-dih:.

¹⁶Jorwor: a :mor :mloror', :bhorlie' 'do a-a' 'yli bo. Deh no-eh, en 'ye-: dih. 'De :bhorlie' 'do a-a' :dou'⧾ bo. Deh no-eh, en 'worn-: dih.

¹⁷Dhih 'jeh, 'an zela a :gwluhuh', Nyorsoa-a' wele-eh: :po-nyor:⧾ :dhulu'-: 'dekorn: 'yi 'sleh-nyor:⧾ :dhulu'-: an 'bhorn deh⧾ a 'ye-a, on 'ye-ih' 'ye :dee', jorwor: on :se-ih' 'ye. 'De an 'bhorn deh⧾ a 'worn-a, on 'ye-ih' 'worn :dee', jorwor: on :se-ih' 'worn.

¹⁸:Yee' a :to :dou'⧾ 'de deh 'yu :or gba-a deh⧾-yor, or-a' 'dlan :daa, or 'dhu-eh:-', a 'ye-eh' yubo:.

¹⁹Deh⧾-yor: :or 'kpa-a 'o :gwie 'i, or gweh nyor⧾-a' klehkpeh :on 'worn-a Nyorsoa-a' nyor⧾ wlu 'ken :korn-eh-a' tubo-wlu⧾. Jorwor: on :se-ih' dih 'worn. :Yee' 'ku yi-: 'de, 'de on :za 'o wlu :on :gba-eh 'do on :porluh⧾ ken.

²⁰Deh⧾-yor: :or 'kpa-a 'o 'bluhba: :or :ne-a 'soba 'zorn ken, or gweh nyor :or 'worn-a Nyorsoa-a' wlu, 'de :or kpon-uh-a dih, 'do :dha :due' :dao', 'do :porluh-a' dih 'pehn ka 'di.

²¹Jorwor: or se deh-' dih 'worn-eh: 'jeh 'ble 'de or 'di, :yee' or gweh deh⧾-yor: :or :korn-a buh⧾ se-a :dha :dhorno' mu 'de glu, :yee' or-a' :gwle 'o 'do ti :dhorno'⧾ 'di. :Mor 'worn dih 'beh-eh 'yle, 'de 'kle 'ye-eh 'ye 'de yi, 'do Nyorsoa-a' wlu-a' dhih bo, :yee' 'do :dha :due' :dao', or ple-', or 'tali: Nyorsoa-deh-: dih.

²²Deh⧾-yor: :or 'kpa-a 'de 'wu⧾-kwla 'nyne-', or gweh nyor :or 'worn-a Nyorsoa-a' wlu. Jorwor: 'kmo bo-deh:⧾, me-: 'beh-dih or-a' :porluh 'worn dih. :Ka or 'ye-a' no, 'de or 'ye-a' bhan, eh-: 'da-dih-or 'yi. Deh⧾ :daa, me-: 'yle, :en kpon Nyorsoa-a' wlu :bhluun' 'worn dih, :yee' :ka on 'ye-a' no, 'de on 'ye-a' 'yor po, ka se :ne.

²³Jorwor: deh⧾-yor: :or 'kpa-a 'o 'bluhba: 'jeh ken, or gweh nyor :or 'worn-a Nyorsoa-a' wlu, 'de :or 'worn-uh-a dih. :Yee' nyor-a' 'jeh :dao', :ka deh⧾-yor: :or po-a 'yor :dhulu', or :ne-a, 'de or-a' :noror' po-a 'yor-a' :kehehn' :due', :noror' po-a 'yor-a' :kwlaa :meheh'lo:, 'de :noror' po-a 'yor-a' :kwlaa taan, :yee' 'ka-: nyor :dao' or :ne :ke.

²⁴:Yee' :Yusu' po 'dlan :noror' :neheh', 'de on bo, or 'dae:, Nyorsoa-a' nyor⧾ wlu 'ken :korn-eh gweh :ka nyor-kpalu :due', :or gba-a deh⧾-yor: 'jeh 'de or 'bli 'gle.

²⁵Jorwor: ti :gwlor-nyor⧾-a' klehkpeh, an 'mo-a dholo-', :yee' nyor :or 'nyeh-or', or mu 'de 'gle :dao' 'di, 'de or gba :peli'-a' 'yor 'de deh⧾-yor: 'jeh :dao' 'nyne-', 'de or mu.

²⁶:Yee' :yeh deh⧾-yor: 'jeh :dao', or me-a, 'de or wa-a 'yor, :yee' :peli' :dao', en me-' :ke.

²⁷:Yee' 'yu :or :korn-a gle :dao', or-a'a: 'bhoi-nynuu mu 'de or bo, 'de on 'dae:, Nyor :klaba', eh :se deh⧾-yor: 'jeh, me-: :on se gba 'de :on 'bli 'gle :e? :Yee' dha :peli' :daa, en 'wluh 'da :eh?

²⁸'De or 'dae:, Nyor :or 'nyeh-a 'on-' :oo', or-: no deh :dao'. 'De or-a'a: 'bhoi-nynuu 'da, :An 'bhorn :a 'ye mu, :a 'ye :peli' :dao' :za :e?

²⁹Jorwor: or 'da, 'Kei:. Nyor se yubo: :mor a :taa :peli' :dao' za, a :ne-' deh⧾-yor: 'jeh :peli' dih :za-dih:.

³⁰A 'nyi en-' klehkpeh :ku-dih: :dha :due', 'de eh 'ye deh⧾-yor-a' chehehn-ti no. :Yee' 'do ti :dao' 'di, 'do :wor 'an mu 'an-a: deh⧾-yor: :chehn-nyor⧾ :gwluhuh' zela:, on 'ye :peli' :dao' chehn :zai', on 'ye-ih' 'pu⧾ san, on 'ye-ih' 'yli po, 'de jorwor: on 'ye deh⧾-yor: 'jeh :dao' :dha :due' po, 'do 'on 'bli yai'.

³¹:Yee' :Yusu' po 'dlan :noror' :dele' ka, 'de on bo, or 'dae:, Nyorsoa-a' nyor⧾ wlu 'ken :korn-eh gweh :zlaan'-a' 'yor-eh: :eh 'yu :due' 'duo:-a 'de or gba-a 'de or 'bli 'gle.

³²:Zlaan'-yor-eh: :dao', eh-: no 'zeehn: neh 'de deh⧾-yor-a' klehkpeh 'nyne-'. Jorwor: :mor eh ku, :yee' eh no :zlaan'-gan: :kolu', :yee' eh 'beh-: 'i, eh :zi 'o gbaa-deh⧾-a' 'yor-a' klehkpeh nyor⧾-a gba-a 'weh, 'de 'dhuu'-deh⧾ 'nyne-', 'de jorwor: neme: :en zi-dih-a-' dih 'de yai', me-: 'yle, 'de en po 'dle⧾ 'do eh-a' 'gabuh⧾ 'nyne-'.

³³:Yee' :Yusu' po 'dlan :noror' :noror' :dele' ka, 'de on bo, or 'dae:, Nyorsoa-a' nyor⧾ wlu 'ken :korn-eh gweh 'bhlee-a' 'vu-dih-deh:, :eh 'nynor :due' 'duo:-a, 'de or po-a 'bhlee-a' :bhebe' :doru' bo, 'de or zian-dih-a, 'de :eh gweh-a 'bhlee: :bhebe'-a' klehkpeh 'dlu.

³⁴:Yee' :Yusu' zela: deh⧾-a' klehkpeh :daa, :gwlor-nyor:⧾ :doru' :gwluhuh', 'de 'dlan⧾ 'di. Or :se 'de nyor⧾ bo :wlu 'de :ka 'sluh 'di, 'dlan⧾ :due', me-: or no, 'de or wlu 'de on bo.

³⁵Or no deh :daa 'weh, 'de Nyorsoa-a' wlu 'ye dhih 'jeh-' 'kpa, :ka or-a' wele-eh: :po-nyor no-a eh-a' :za-a' see, or no-a, 'An mu 'de 'dlan⧾ 'di :wlu-dih:. :Yee' 'an mu deh⧾ nyor⧾ se-a yubo: :zai', :en 'zile:-a, :en 'wluh-a 'de 'bluhba-a' glu 'dhu 'da, 'an mu-ih on :gwluhuh' zela:.

³⁶:Yee' :yeh :Yusu' 'wluh-a 'do :gwlor-nyor:⧾ :doru' :dao' bo, 'de or pa 'de 'gbu 'di, :yee' or-a'a: bo :na-nyor⧾ mu 'de or bo, on 'dae:, :Za :peli' :ne 'de 'gle-dlan: :daa gbor 'noror :a bo.

³⁷'De or 'dae:, 'Yu :or 'dhu-a deh⧾-yor-a' 'jeh, 'yu an 'da-dih-a Nyor-kpalu-a' 'yu :oo'.

³⁸Gle :dao', eh-: 'dhu dha 'bluhba ken-', 'de deh⧾-yor-a' 'jeh :daa, me-: 'dhu nyor⧾ Nyorsoa-a :korn-a wlu 'ken-'. :Peli'-zon:⧾ :dao', me-: 'dhu nyor⧾ :on :korn-a 'de 'ku bo-',

³⁹'de nyor :or 'nyeh-or' :or gba-a :peli' :dao', or-: 'dhu 'ku-'. 'Dhuu'-deh:⧾ :dao', en-' chehehn-ti:, eh-: 'dhu 'bluhba-a' 'dlu-' :jla 'da-', :yee' deh⧾-yor: :chehn-nyor:⧾ :dao', mo-: 'dhu 'enjor-nyor⧾-'.

⁴⁰:Ka :peli' :dao', en-' dhih :ne-a, en mu-a :dha :due' :po-eh, en 'ye-a 'yli :po-eh: 'de neh-', 'ka-: 'o eh mu :ne 'do 'bluhba-a' 'dlu-' :jla 'da :ke.

⁴¹:Yee' 'do ti :dao' 'di, 'yu an 'da-dih-a Nyor-kpalu-a' 'yu-a mu or-a'a: 'enjor-nyor⧾ :dbo, 'de on 'ye deh⧾-a' klehkpeh :en no-eh 'de nyor⧾-a no-a deh⧾-zon⧾-: 'dekorn: nyor⧾ :on no-ih-a-: an mu 'de or-a'a: nyor⧾ wlu 'ken :korn-eh 'nyne-' :za-eh:.

⁴²:Yee' or-a'a: 'enjor-nyor⧾-a mu nyor⧾ :dao' 'de neh-' :po, 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

⁴³:Yee' 'yi 'sleh-nyor⧾-a mu :fan, 'de an-a' dhih-a' 'i 'beh-a' 'di, :ka 'yluh-a no-a fan-a', 'de on :Baa' Nyorsoa-a' nyor⧾ wlu 'ken :korn-eh 'zorn. Nyor :or 'ble-a :dou'⧾, 'nyi or 'worn-ih.

⁴⁴:Yee' Nyorsoa-a' nyor⧾ wlu 'ken :korn-eh gweh bhaan-deh: :eh 'zile:-a 'de 'gle see. 'We-eh :due', 'yu :due', or-: 'tehn-eh dih, 'de or po-eh 'bluh ken :dele' ka. :Yee' 'mona: no-or 'gabaa. Eh-: no-eh, 'de or mu, or plo deh⧾-a' klehkpeh or :korn-a, 'de or dhen gle :dao'.

⁴⁵:Yee' :dele' ka, Nyorsoa-a' nyor⧾ wlu 'ken :korn-eh gweh :ka 'dhama: :dhen-nyor :due', :or 'bhorn-a 'dhama: :nmaa'e 'kwla⧾-' dih, or 'ye-or' dhen.

⁴⁶'We-eh :due', or 'ye 'dhama-yor-eh :due' :eh 'kpa-a deh ken 'gabaa. :Yeh or 'ye-eh, :yee' or mu, or plo deh⧾-a' klehkpeh or :korn-a, 'de or dhen-eh.

⁴⁷:Yee' :dele' ka, Nyorsoa-a' nyor⧾ wlu 'ken :korn-eh gweh :ka sor, zimi: 'dba-nyor⧾-a po-a 'do yobo'-pehnu worn, 'de on kpon-a zimi: 'doror: 'dor.

⁴⁸:Yee' :yeh sor :dao', or 'yi-a, :yee' on jli-or', on ya-or 'o 'kpuhba' 'i. 'De on :dhe dih, an 'chleh zimi: :dao'-' dih, an po 'jeh ne 'de 'dhian 'di, 'de an po zon⧾ ne 'kwla.

⁴⁹'Ka-: 'o eh mu :ne, 'do 'bluhba-a' 'dlu-' :jla 'da :ke. 'Enjor-nyor⧾-a mu 'de :yi, on 'ye deh⧾-zon:⧾ :no-nyor⧾ 'for 'i po, 'de on 'ye 'yi 'sleh-nyor⧾ 'for 'i po,

⁵⁰'de on 'ye deh⧾-zon:⧾ :no-nyor⧾ 'de neh-' po, 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

⁵¹:Yee' :Yusu' dhele: or-a'a: bo :na-nyor⧾-: dih, or 'dae:, A 'worn deh⧾ :daa, en-' klehkpeh-: dih :e? 'De on 'da, Keen'.

⁵²'De or 'dae:, Eh :nmor-: 'yi. Deh no-eh, nyor⧾ 'tele' :torne-nyor⧾-a' klehkpeh :on 'chean'-a Nyorsoa-a' nyor⧾ wlu 'ken :korn-eh, on gweh 'gbu :korn-nyor:, :or :za-a: 'de or-a'a: deh dih :dhe 'da, bhaan-deh:⧾ :dele'-: 'dekorn: bhaan-deh:⧾ soa⧾-:.

⁵³:Yee' :yeh :Yusu'-a' 'dlan⧾ :po-eh :jla-a, :yee' or 'wluh 'o :dha 'o,

⁵⁴or mu 'de or 'bli :gwlor-'. 'Do :wor or :torne: nyor⧾ deh 'de an-a' 'di :gweh-dih-sla 'zorn. Eh-: :florn-dih-uh worn, 'de an no, Dha 'yu :daa, or :za :toror' :daa-: 'dekorn: nyor⧾ 'di dih 'ma-dih-kpih: :daa :eh?

⁵⁵Eh :se 'Joseh: :or no-a tu⧾ :bha :koan, or-a'a: 'yu :e? Or 'de-a' 'nyne :se :Mehle' :e? 'De eh :se 'Jeen-: 'Joseh-: Samor'-: 'dekorn: :Juda'-: on :se or-a' dei'-boi' :e?

⁵⁶Eh :se or-a' dei'-nynor⧾-kpao'⧾-a' klehkpeh, mo-: se dha :a bo :ne :e? :Yee' dha 'yu :daa, or 'chean'-dih: deh⧾-a' klehkpeh :daa :eh?

⁵⁷:Yee' nyor⧾ :ne-a 'de 'sla :dao' 'zorn, on :se-' or-a' dhih 'worn-dih:. Jorwor: :Yusu' :wlu-' 'de on bo, or 'dae:, Nyor⧾ 'sluh⧾-a 'ye Nyorsoa-a' wele-eh: :po-nyor deh-' 'weh. Jorwor: nyor⧾ :on :ne-a 'o or 'bli :gwlor-'-: 'dekorn: or 'bli 'gbu-: an-a' 'ye or deh-'.

⁵⁸:Yee' :Yusu' :se-' deh⧾ :kolu'⧾ :dhulu' no 'do :dha 'o. Deh no-eh, on se dhih 'jeh-' :po-eh 'ble 'do or bo.