Read Eastern Krahn Matio' 14 Bible Online

Matio' 14 - Eastern Krahn bible

Matio' 14

¹:Yee' 'do ti :dao' 'di, :Hehlo' :or no-a nyor⧾ wlu 'ken :korn-nyor 'de :Galali'i-bluhba ken, or-: 'worn :Yusu'-a' 'nyne.

²'De :Hehlo' :wlu 'de or-a' 'jeh-a'a: bo :na-nyor⧾ bo, or 'dae:, Nyor⧾ 'ni 'dlu :po :Jororn' :oo', or-: 'wluh 'de nma-dih-deh 'di. Eh-: no-eh, 'de or 'ble 'kpih, or no nyor⧾ 'di dih 'ma-dih-deh⧾ deh :dao'.

³Deh :korn-a dhih or 'da :ao', eh-: 'dhu. Or-a' 'jeh 'yor-eh: 'nyi nyor⧾ 'tele', 'de on kpon :Jororn', on san-or, 'de on po-or :kasue 'di see. Or no deh :daa 'weh, 'do :Hehlo'dia-a' dhih bo, :or :Hehlo' :za-a or-a' dei' Felor' 'kwa.

⁴:Jororn' za-eh' 'weh :dee' see, 'de :Hehlo' bo, 'do kpor⧾ :dhulu' 'di, or 'dae:, Eh se 'o :a-a'a: 'tele'-a' :gwie 'i :ne, nyor 'ye or-a' 'de-di' :yi-nyor 'nynor 'kwa :za.

⁵Eh-a' dhih, :Hehlo'-a 'bhorn or 'ye-or' 'dba, jorwor: or ple nyor⧾-a' 'yli. Deh no-eh, on 'duo: :Jororn'-' 'weh, or 'ye Nyorsoa-a' wele-eh: :po-nyor no.

⁶Jorwor: 'do :Hehlo'-a' 'wluh-dih-we-eh bo, 'do :wor :Hehlo'dia-a'a: 'nynor-kpao'-yu 'kpa-dih: 'o :gwlea, 'de or ye. :Yee' or 'pehn-dih: :Hehlo'-a' :porluh-: dih 'gabaa.

⁷Eh-: :korn dhih, or po or-a' wlu :dhama'-', or :zlehn-dih: deh, or 'da or mu-or deh-beh-deh-beh: or mu-or 'yba-dih: 'nyi-:.

⁸:Yee' or 'de zela-or-: :gwluhuh' deh or 'ye-a' 'yba. Eh-: no-eh, 'de or 'da, 'Nyi 'on nyor⧾ 'ni 'dlu :po :Jororn'-a' 'dlu 'de 'pani' 'di.

⁹:Yeh 'keen 'worn-a deh :daa, :yee' or-a' :porluh pa-' :chehbe'. Jorwor: :ka or :zlehn-dih:-a-: 'dekorn: or 'bei' or 'da-a, an-a' dhih-: eh-: no-eh 'de or 'dhu nyor⧾ wlu worn, eh 'ye :no-eh:.

¹⁰'De or dbo nyor⧾, :Jororn'-a' 'dlu 'ye 'o :chehn-eh: 'de :kasue 'di,

¹¹'de on po-uh 'de 'pani' 'di, on 'nyi-uh 'nynor-kpao'-yu, 'de or ya-uh 'de or 'de bo.

¹²'De :Jororn'-a'a: bo :na-nyor⧾ 'yle, on 'duo: or-a' 'ku-', 'de on nma-dih-uh dih. 'De on mu, on zela: :Yusu' :gwluhuh'.

¹³:Yee' :yeh :Yusu' 'worn-a :Jororn'-a' 'meheh'-nyne, :yee' or 'wluh 'o :dha 'o 'weh, or kpa 'blagbe:, 'de or mu 'de :dha nyor se-a :ne, or 'ye kpor chehn. Jorwor: :yeh :gwlor-nyor:⧾ :doru' 'worn-ih'-a, :yee' on 'wluh :gwlor⧾ :nyene' 'di dih, an na 'bluhbor, an zi 'o or klei'.

¹⁴:Yeh or 'si-a 'bluhbor, or 'wluh-a 'de 'blagbe 'di, :yee' or :yeh-dih: :gwlor-nyor:⧾ :doru' ken. :Yeh or 'ye-uh'-a, :yee' an-a' :wehlih-a: no-or, 'de or 'puh-dih: :yuh 'ble-a puhba-deh⧾ 'de on 'klu-'.

¹⁵:Yeh glu-a gor-a, :yee' or-a'a: bo :na-nyor⧾ yi 'o or bo, on 'dae:, Dha :daa :a :ne-a, nyor se-a :ne, 'de mor ti zi-a :ke. Dbo :gwlor-nyor:⧾ :doru' :daa, :gwlor⧾ :nyene' 'di dih, on 'ye dii-deh⧾ dhen 'do an-a' 'jeh bo.

¹⁶Jorwor: :Yusu' :wlu-' 'de on bo, or 'dae:, On se :korn on 'ye mu. A :mor 'ye-uh' deh 'nyi on 'ye di.

¹⁷'De on 'da, Deh :due' :a 'ble-a dha mor, eh-: 'dhu, 'bhlee: :kpuan'⧾ :mm'-: 'dekorn: zimi 'sororn'-:.

¹⁸'De or 'da, A ya-ih 'noror 'on bo.

¹⁹'De or zela: nyor⧾ :gwluhuh' on 'ye-' dih dhele: 'do :peli' ken. :Yee' or 'duo: 'bhlee: :kpuan'⧾ :mm'-: 'dekorn: zimi 'sororn' :dao'-: 'weh, 'de or pobo: 'de yai', or po Nyorsoa-a' 'zio, 'de or :chehn-dih: 'bhlee: :kpuan'⧾ :dao' dih, 'de or 'kwa. Or 'nyi-ih or-a'a: bo :na-nyor⧾, 'de on 'nyi-ih :gwlor-nyor:⧾ :doru' :dao'.

²⁰'De an-a' klehkpeh di deh, on dbo. :Yeh on gweh-a deh :di-eh 'i, :yee' :yih :en :sie:-a 'o dih, or-a'a: bo :na-nyor⧾ po-a :dha :due', me-: 'yi :too'⧾-a' :bhue: 'yor 'sororn'.

²¹Nyor⧾ :on di-a deh, on 'beh-dih: on 'ye nyor⧾-kpalu⧾-a' 'wlu :mm' no. Jorwor: 'nynor⧾-: 'dekorn: 'nynuu: :nyene'-: on :se-' :zlo-eh:.

²²:Yee' :yeh eh no :ao', :yee' :Yusu' po 'de or-a'a: bo :na-nyor⧾ 'blagbe 'di, 'de or 'da, A mu 'on ybei' 'de :Galali'i-yobo'-pehnu-a' 'for :a 'wluh-a bo de. :Yeh an mu-a, :yee' or :sie: de, 'de or dbo nyor⧾ :doru' :dao' on 'bli deh⧾-' dih.

²³:Yeh or dbo-uh-a on 'bli, :yee' or :due' mu 'de tluh ken, or 'ye 'de Nyorsoa bo :wlu. :Yeh glu gor-a, :yee' 'do :wor or :due' :ne.

²⁴:Yee' :yeh eh no :ao', :yee' 'blagbe :tehn bo 'weh 'de 'ni ken. Yobo'-pehnu-a' 'duh⧾-a bla-uh-: 'i. Deh no-eh, :pobor'-a 'beh-dih-uh 'worn dih.

²⁵:Yee' 'do :dha 'o zorn-a yi-dih-a :zen-dih: 'da, 'do :wor or na-dih 'ni ken dih, or mu 'de on bo.

²⁶Jorwor: :yeh on 'ye-or, 'de or na-a 'ni ken dih, :yee' :fano-a: no-uh 'gabaa, an po 'geh⧾, an no, 'Meheh'-nyor-a' :zulu: 'o.

²⁷Jorwor: 'do :dha :due' :dao', or :wlu-' 'de on bo, or 'dae:, A :ku :gwluhuh'-'. 'Mor :oo'. A 'bor :fano-a' :no-' a-uh.

²⁸:Yee' :Piteh' zela-or-: :gwluhuh', or 'dae:, :Gwlor :baa', :mor eh 'dhu :on mor-' deh 'jeh, :yee' 'da 'on, 'on 'ye 'ni ken dih :na, 'on 'ye 'de :on bo yi.

²⁹'De :Yusu' 'dae:, 'Yle. :Yee' :Piteh' 'wluh 'de 'blagbe 'di 'weh, or 'si 'o 'ni ken dih, 'de or na-eh ken dih, or mu 'de :Yusu' bo.

³⁰Jorwor: :yeh or 'ye-a :pobor'-a bla-or 'i, :yee' :fano-a: no-or. :Yee' or-a' buh⧾-a pa-' 'de 'ni 'zorn, 'de or po 'geh, or 'da, :Gwlor :baa', 'puh-dih: 'on.

³¹:Yee' 'do :dha :due' :dao', :yee' :Yusu' slo or-a' son, 'de or kpon-or dih, or 'da, :Mor :or :korn-a dhih 'jeh-' :po-eh se-a 'i 'beh. :Eh no 'de :an-a' :porluh-a dhobo :eh?

³²'De on 'kpa 'de 'blagbe 'di, 'de :pobor' 'bor.

³³:Yee' :yuh :ne-a 'de eh 'di, an za or-a' :weheh', an no, Dhih 'jeh, :mor Nyorsoa-a' 'Yu :oo'.

³⁴:Yeh on 'dhan-a :Galali'i-yobo'-pehnu, :yee' on 'si 'bluhbor: 'do :gwlor an 'da-dih-a :Gehneh'sla.

³⁵:Yeh nyor⧾ :on 'ti-a 'o :dha 'o, on yubo-or 'i, :yee' on dbo wlu⧾ 'do 'for⧾-a' klehkpeh :dao' 'di dih, 'de on :ya 'de or bo puhba-nyor⧾-a' klehkpeh,

³⁶on bale-or, or 'ye 'worn, puhba-nyor⧾ 'ye or-a'a: :gba 'vuu-a' 'mla-a' deh-beh dih 'tuh :sloror'. Nyor⧾-a' klehkpeh :on 'tuh-uh-a dih, an-a' klehkpeh 'puh-' 'tene' :kpeen:.