Read Eastern Krahn Matio' 15 Bible Online

Matio' 15 - Eastern Krahn bible

Matio' 15

¹:Yee' :Falasi'i-nyor⧾-: 'dekorn: nyor⧾ 'tele' :torne-nyor⧾-:, mo-: 'wluh :Julu'slehn, 'de on yi 'de :Yusu' bo, on dhele-or-: dih, on 'da,

²:Eh :korn dhih 'de :an-a'a: bo :na-nyor⧾-a wa 'tele' :a :bai'-a' :bai' :sie-dih-a: :a-uh ke :eh? An-a' :dle kwa, 'de an di deh.

³'De or :wlu 'de on bo, or 'dae:, :Eh :korn dhih 'de a wa Nyorsoa-a' 'tele' 'do a-a' 'tele'-a' deh-' 'ye-eh-a' dhih :ke :eh?

⁴Nyorsoa 'nyi :a 'tele', or 'dae:, 'Ye :on 'de-: 'dekorn: :on :baa'-: deh-'. 'De or :wlu :neheh', or 'dae:, Nyor :or 'jle-dih:-a or 'de-: 'dekorn: or :baa'-: :yee' or :korn or 'ye 'dba-eh:.

⁵Jorwor: a :mor :mloror', a 'da :mor nyor zela: or 'de-: 'dekorn: or :baa'-: :gwluhuh', or 'da, Deh a :korn a 'ye-a' 'ye, 'de 'on 'kwa :dee', a :se-eh' 'ye-: i, deh no-eh, eh :dhe-dih-eh: 'for 'i, 'do Nyorsoa bo.

⁶:Yee' a 'dae:, :Mor nyor no :ao', :yee' or se :korn or 'ye or :baa' deh :dao' 'nyi, 'do or-a' deh-' 'ye-eh bo. 'Do eh-a' dha, 'do a-a' 'tele'-a' deh-' 'ye-eh-a' dhih, :yee' a no-eh', Nyorsoa-a' wlu no 'plo.

⁷A :mor nyor⧾-a' 'yli 'ye-nyor:⧾ :daa. :Azaya' :se-eh' 'i zi 'do deh or :za-a-' 'do a 'bhun :dee' see, or po-a Nyorsoa-a' wele-eh:, or 'dae:,

⁸Nyor⧾ :daa, an po 'on dhih bo 'do on worn 'i. Jorwor: an-a' :porluh⧾ se 'noror 'on bo :ne.

⁹'An :weheh' an za-a, deh 'plo :oo' an no. An torne nyor⧾ 'tele'⧾ :en 'wluh-a 'de :gwlor-nyor⧾ 'worn, 'de on 'da en 'wluh 'de 'on bo.

¹⁰:Yee' :yeh :Yusu' gweh-a :Falasi'i-nyor⧾-: 'dekorn: nyor⧾ 'tele' :torne-nyor⧾-: an-a' bo :wlu-eh 'i, :yee' or 'da :gwlor-nyor:⧾ :doru', :on :ne-a 'o 'weh, on 'ye 'de or bo yi, 'de or :wlu 'de on bo, or 'dae:, A :to :dou'⧾, 'de a 'ye 'an wlu-' dih 'worn o.

¹¹Eh :se dii-deh: :eh mu-a 'de nyor 'worn, eh-: 'kor-dih-or 'do Nyorsoa ybei' :deh. Jorwor: deh :eh 'wluh-a 'de nyor 'worn, eh-: 'kor-dih-or.

¹²:Yee' or-a'a: bo :na-nyor⧾ yi 'o or bo, 'de on 'dae:, :On yubo-eh' :ka deh :daa :on :za-a-', eh 'si-a :Falasi'i-nyor⧾ 'i, :yeh on 'worn-ih'-a :e?

¹³'De or zela-uh :gwluhuh', or 'dae:, 'Dhuu'-deh⧾-a' klehkpeh 'On-ba: :or :ne-a 'de yai', or se-a 'dhu, en mu 'tlun-eh: :due' :due'.

¹⁴A-a' 'beh-dih:-' a-a' :porluh⧾ 'worn dih 'do an-a' dhih bo. On no 'doror'-nyor:⧾ :an na-dih-a nyor⧾. :Mor 'doror'-nyor :na-dih: 'doror'-nyor, :yee' an-a' klehkpeh, an mu 'de 'bie' 'di 'kpa-:.

¹⁵'De :Piteh' :wlu 'de or bo, or 'dae:, :Za 'dlan :daa gbor 'noror :a bo.

¹⁶'De :Yusu' 'dae:, A :mor :ke, a 'see deh-' dih 'worn-eh :korn 'gboror: :e?

¹⁷A se-eh yubo: ke :e, :ka dii-deh: nyor di-a, eh mu-a 'de or 'di, 'de eh 'si-a 'zorn :e?

¹⁸Jorwor: deh⧾ :en 'wluh-a 'de nyor 'worn, en 'wluh 'o or-a' :porluh ken, me-: 'kor-dih-or 'do Nyorsoa ybei'.

¹⁹Deh no-eh, 'do nyor⧾-a' :porluh⧾ ken, 'do :wor deh⧾-zon⧾-a' :gwluhuh' dih :na-dih-eh 'wluh, eh-: no-eh 'de nyor⧾-a 'dba nyor⧾, an no 'nyne :zaan', 'de an korn 'tmeor⧾, an 'yli, an 'dhu-dih nyor⧾ dhih ken dih, 'de an za-dih nyor⧾ deh⧾-zon⧾ 'bhun dih.

²⁰Deh⧾ :daa, me-: 'kor-dih nyor⧾ 'do Nyorsoa ybei'. Jorwor: :mor nyor di deh, 'de or 'ye :ao', or se kwa :dle, :yee' eh :se-or' 'kor-dih: i 'do Nyorsoa ybei'.

²¹:Yee' :Yusu' 'wluh 'o :dha 'o 'weh, or mu 'de 'bluhba-a' 'for⧾ 'Taya-gwlor-: 'dekorn: 'Saedorn-gwlor-: en :ne-a ken.

²²:Yee' 'Keneh-nynor :due' :or 'ti-a 'o :dha 'o, or-: yi 'o or bo, or-: po 'geh⧾, :or no, :Gwlor :baa', :Debe'-a' 'yu, 'ye 'an :wehlih. 'An-a: 'yu-nynor-kpao' 'ble 'kwla 'ye-dih-deh 'do or 'de, 'de or 'ye or-a' 'jeh worn 'gabaa.

²³Jorwor: :Yusu' :se-' :wlu 'de or bo. :Yeh 'nynor :dao', or bale-or :balee:, :yee' :Yusu'-a'a: bo :na-nyor⧾ yi 'o or bo, on 'dae:, :On :korn 'gen, dbo-or de. Deh no-eh, or po :zleh 'do :a klei'.

²⁴:Yee' or zela: 'nynor :dao' :gwluhuh', or 'dae:, Nyorsoa dbo 'on 'klein', 'de 'Ezlea-nyor⧾ :on gweh-a 'blae'⧾ :en 'ma-a bo.

²⁵:Yee' 'nynor yi-: 'de, 'de or 'jli dih 'do or 'zorn, or 'dae:, :Gwlor :baa', :za-dih: 'on-', 'nyi 'on.

²⁶'De :Yusu' :wlu 'de or bo, or 'dae:, Eh se 'yi dih :nmor nyor 'ye 'nynuu-a' dii-deh⧾-' 'duo:, 'de or 'ye-ih gbe⧾ 'nyi.

²⁷:Yeh or 'da :ao', :yee' 'nynor 'dae:, Keen' :mloror', :Gwlor :baa', jorwor: gbe⧾-a' 'jeh, en di deh⧾-a' :pibi' :en kele-a 'o en-' nyor⧾ :klaba'⧾-a'a: 'tebo⧾ ken dih 'weh.

²⁸'De :Yusu' 'dae:, :Mor 'nynor :daa. :An-a' Nyorsoa-a' dhih 'jeh-' :po-eh 'beh-: 'i 'gabaa. Deh :an 'bhorn-a :eh 'ye-a' :no-eh: 'do :on bo, 'nyi eh :no-eh:. :Yee' 'do :dha :due' :dao', 'do :wor or-a'a: 'yu 'puh-dih:.

²⁹:Yeh :Yusu' 'wluh-a 'o :dha 'o, :yee' or na-dih :Galali'i-yobo'-pehnu worn dih, or mu 'de tluh 'dlu, 'de or :dhe dih.

³⁰:Yee' :gwlor-nyor:⧾ :doru', mo-: yi 'o or bo, :an ya 'de :kloror-nyor⧾-: 'doror'-nyor⧾-: :nea-nyor⧾-: 'bobo'⧾-: 'dekorn: puhba-nyor:⧾ :dhulu' :noo'-:. On 'pehn-dih-uh dih 'do or ybei', 'de or 'puh-dih-uh.

³¹:Yeh on 'ye-a :ka 'bobo'⧾-a wlu-a, 'de :nea-nyor⧾-a 'puh-a, 'de :kloror-nyor⧾-a na-a, 'de 'doror'-nyor⧾-a 'ye-a dih, :yee' an-a' :porluh⧾ 'ma-'. 'De an po 'Ezlea-nyor⧾-a' Nyorsoa-a' 'nyne ya.

³²:Yee' :Yusu' 'da or-a'a: bo :na-nyor⧾ 'weh 'do or bo, 'de or 'dae:, :Gwlor-nyor:⧾ :doru' :daa, an-a' :wehlih-a: no 'on. An-a' 'we taan 'zean' dha 'on bo, 'de an-a'a: dii-deh⧾ :gweh. 'On :se-' 'bhorn 'on 'ye-uh' on 'bli deh⧾-' dih dbo, :mor 'moeh 'si 'de on 'di, on :ne-' :gwluhuh'-' dih 'kpuhba: :gwie⧾ bo dih.

³³'De on dhele-or dih, on 'dae:, Dha :a mu 'bhlee :za 'noror :bhehneh'-bluhba: :daa ken, :a 'ye nyor⧾ :doru' :daa 'nyi :eh?

³⁴'De or dhele-uh dih, or 'da, 'Bhlee: :kpuan'⧾ dhie a 'ble :eh? De on 'dae:, En :meheh' 'sorn :oo', 'dekorn: zimi: :nyene'-kpor-bei-:.

³⁵'De or zela: nyor⧾ :doru' :dao' :gwluhuh' on 'ye dih :dhe 'do 'bluhbor.

³⁶:Yee' or 'duo: 'bhlee: :kpuan'⧾ :meheh' 'sorn-: 'dekorn: zimi: :dao'-: 'weh, 'de or po Nyorsoa-a' 'zio, 'de or :chehn-dih-ih dih 'de or 'kwa, or 'nyi-ih or-a'a: bo :na-nyor⧾, 'de on 'nyi-ih :gwlor-nyor:⧾ :doru' :dao'.

³⁷'De an-a' klehkpeh di deh, on dbo. :Yeh on gweh-a deh :di-eh 'i, :yee' :yih :sie:-a 'o dih, or-a'a: bo :na-nyor⧾ po-a :dha :due', me-: 'yi :too'⧾ :meheh' 'sorn.

³⁸Nyor⧾ :on di-a deh, nyor⧾-kpalu⧾-a' 'wlu :nyieh :ne 'de on 'nyne-'. Jorwor: 'nynor⧾-: 'dekorn: 'nynuu: :nyene'-: on :se-' :zlo-eh:.

³⁹:Yee' :Yusu' dbo nyor⧾ :doru' :dao' on 'bli deh⧾-' dih. 'De or 'kpa 'de 'blagbe 'di, or mu 'de 'bluhba-a' 'for :or 'koan'-dih:-a 'Magana-gwlor dih.