Read Eastern Krahn Matio' 16 Bible Online

Matio' 16 - Eastern Krahn bible

Matio' 16

¹:Yee' :Falasi'i-nyor⧾-: 'dekorn: :Sayusi'i-nyor⧾-: mo-: yi 'de :Yusu' bo, on yi-or dih 'dhen 'da, 'de on dhele-or dih or 'ye-uh' 'yi :to-dih-deh 'i :to-dih: :eh beh or-a' 'kpih 'wluh 'de Nyorsoa bo yai' deh 'jeh :eh?.

²Jorwor: or zela-uh-: :gwluhuh', or 'da, :Mor 'yluh :taa 'nior 'kpa, :yee' a 'da, 'De yai'-a mu 'yi dih :nmor :glaa'e o, deh no-eh, 'de yai' :ne 'zoo.

³:Yee' :mor zorn bo 'dhu, :yee' a 'da, 'Ni-a mu :dba 'zean' o, deh no-eh, 'de yai' zani-', 'de :kpe dih. A yubo: 'de yai'-a' dih bo zela-eh 'weh. Jorwor: a se deh⧾ :en mu-a 'dlu bo :naa, en-' bo dih zela-eh 'beh-dih:.

⁴:Kana-nyor:⧾ :daa, :on no-a deh⧾-zon:⧾ :no-nyor⧾, 'de :an-a' no-a :dhehehn-deh⧾ 'do Nyorsoa bo, an 'bhorn 'yi :to-dih-deh:. Jorwor: 'yi :to-dih-deh :due' an mu-a 'ye-: 'klein', eh-: 'dhu, Nyorsoa-a' wele-eh: :po-nyor: :Jona'-a' 'yi :to-dih-deh-'. :Yeh or 'da :ao', :yee' or 'wluh 'o on bo 'weh, 'de or mu.

⁵:Yee' :Yusu'-: 'dekorn: or-a'a: bo :na-nyor⧾-: on 'dhan :Galali'i-yobo'-pehnu 'weh. :Yeh an mu-a, :yee' on 'ma-dih: bo on 'ye 'bhlee kpa.

⁶:Yee' or zela-uh-: :gwluhuh', or 'dae:, A 'wla :gwluhuh' dih, a 'dhu a-a' 'jeh :dhororn', 'do :Falasi'i-nyor⧾-: 'dekorn: :Sayusi'i-nyor⧾-: an-a' deh⧾ :en 'vu-dih-a 'bhlee, en :ne-' a 'kor-dih: o.

⁷:Yee' an polo dhih 'de an-a' 'jeh 'nyne-', an no, :A :se 'de 'bhlee :ya :dhih 'o, eh-: :korn dhih or 'da :ao'.

⁸Jorwor: :ka or yubo-eh 'i, :yee' or dhele-uh-: dih, or 'dae:, :Eh no 'de a polo dhih 'de a-a' 'jeh 'nyne-' :ka a se-a 'bhlee 'ble, eh-a' dhih :eh? A :mor :gwlor-nyor:⧾ :on :korn-a dhih 'jeh-' :po-eh se-a 'i 'beh.

⁹A 'see-eh-' dih 'worn 'gboror: :e? 'Bhlee: :kpuan'⧾ :mm' 'do nyor⧾-kpalu⧾-a' 'wlu :mm' bo, 'dekorn: en-' :too'⧾ a po-a :dha :due', a 'see-eh :gwluhuh' bo po-dih :e?

¹⁰:Ae' 'bhlee: :kpuan'⧾ :meheh' 'sorn 'do nyor⧾-kpalu⧾-a' 'wlu :nyieh bo, 'dekorn: en-' :too'⧾ a po-a :dha :due', a 'see-eh :gwluhuh' bo po-dih :e?

¹¹:Kaa eh no 'de a 'see-eh dih 'worn 'gboror: :eh, :ka 'on se-a 'bhlee-a' dhih-' :za? Jorwor: a 'dhu a-a' 'jeh :dhororn', :Falasi'i-nyor⧾-: 'dekorn: :Sayusi'i-nyor⧾-: an-a' deh⧾ :en 'vu-dih-a 'bhlee, en :ne-' a 'kor-dih: o.

¹²:Yeh or 'da :ao', :yee' on 'worn-eh-: dih :ka or se-uh-a :gwluhuh' zela: on 'ye-a' an-a' 'jeh :dhororn' 'dhu 'do deh⧾ :en 'vu-dih-a 'bhlee, jorwor: on 'ye-a' an-a' 'jeh :dhororn' 'dhu 'do :Falasi'i-nyor⧾-: 'dekorn: :Sayusi'i-nyor⧾-: an-a' nyor⧾ deh :torne-eh bo.

¹³:Yee' :Yusu' mu 'de 'bluhba-a' 'for :or 'koan'-dih:-a 'Sehsali'a: :Fele'pa-gwlor ken dih, 'do :wor or dhele: or-a'a: bo :na-nyor⧾ dih, or 'dae:, :Kaa :gwlor-nyor⧾-a 'da 'yu an 'da-dih-a Nyor-kpalu-a' 'yu :eh?

¹⁴'De on 'da, Nyor⧾ :noo' 'da :mor nyor⧾ 'ni 'dlu :po :Jororn' :oo'. :Noo' 'da, :mor :Ila'yor: 'o. 'De :noo' 'da, :mor :Jehlimaya'-: :eh beh-Nyorsoa-a' wele-eh: :po-nyor⧾-a' nyor :due' :oo' 'bla.

¹⁵'De or 'dae:, :A 'worn 'de a bo :ke. :Kaa a 'da 'an dhih :eh?

¹⁶'De Samor' :Piteh' 'dae:, :Mor 'kmo :ne-Nyorsoa-a' 'Yu :oo', or 'tan-a.

¹⁷'De :Yusu' zela-or :gwluhuh', or 'dae:, :Bhorlie' 'do :on bo, Samor', :Jona'-a' 'yu. Deh no-eh, :gwlor-nyor⧾ :se-' :on deh :daa :torne:. Jorwor: 'On-ba: :or :ne-a 'de yai', or-: :torne-eh :on.

¹⁸'De 'an zela :on :gwluhuh', :mor :Piteh' :oo', :eh :bleh-dih:-a 'i sobu', 'de 'do 'soba: :daa ken, 'do :wor 'an mu 'an-a: 'chore :po-dih:. 'De 'meh-a' 'kpih :sloror', en :se-' an-a' ya :gba-eh 'beh-dih: i.

¹⁹'An mu :on Nyorsoa-a' nyor⧾ wlu 'ken :korn-eh-a' :koeh'eh 'nyi-:, 'de deh-beh: :on se-a ken dih 'worn-dih: dha yao 'zorn, eh :se-' ken dih 'worn-dih-eh: i 'de Nyorsoa 'bli yai'. 'De deh-beh: :on :za-a wlu 'ken dha yao 'zorn, eh mu wlu 'ken :za-eh: :ke 'de Nyorsoa 'bli yai'.

²⁰:Yee' or 'dhu or-a'a: bo :na-nyor⧾ 'slen deh 'jeh, on :ne-' nyor-beh :gwluhuh' zela: :ka or 'dhu-a Nyorsoa-a' 'taan'-yu-'.

²¹:Eh 'wluh-a 'o ti :dao' 'di, :yee' :Yusu' 'kpa 'o or-a'a: bo :na-nyor⧾-a' :gwluhuh' zela: 'da 'weh, :ka or :korn-a or 'ye-a' :Julu'slehn mu, or 'ye-a' deh⧾ :doru'-a 'kle 'ye :gbor :gbor, 'de 'bluhba: :korn-nyor⧾-: Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: 'kwa. An mu-or 'dba-:, :yee' 'do 'we-eh-a' taan neh 'di, Nyorsoa-a mu-or 'de :za.

²²'De :Piteh' 'da-or 'do 'for 'i, 'de or 'kpa 'o or-a' 'borboa' 'i :po 'da, or 'da, :Dhan dhluma:, Nyorsoa :kafi'na, :Gwlor :baa', deh :daa, eh se 'beh-dih: eh 'ye :no-eh: 'do :on bo, :ka ti-a mu-a 'dlu-' :tehn.

²³Jorwor: :Yusu' 'bili:-'-: dih, 'de or :wlu 'de :Piteh' bo, or 'dae:, 'Wluh :daa 'on bo, 'ku. :An kan-dih 'on :gwie:. Deh no-eh, :on se 'de Nyorsoa-a' 'for bo :ne. Jorwor: :on :ne 'de :gwlor-nyor⧾-a' 'for bo.

²⁴:Yee' or zela: or-a'a: bo :na-nyor⧾-: :gwluhuh', or 'dae:, Nyor :or 'bhorn-a :or 'ye-a' 'o 'on klei' zi, :yee' 'nyi or 'ma-dih: or-a' 'jeh-a' dhih bo. 'Nyi or 'duo: or-a'a: 'kle 'ye-eh-a' 'klorse tu-', or 'ye 'o 'on klei' zi.

²⁵Nyor :or 'bhorn-a :or 'ye-a' or-a' :febeh' dih dhe, :yee' or mu-eh 'ma-dih:. Jorwor: nyor :or 'ma-dih:-a or-a' :febeh' 'do 'an dhih bo, :yee' eh-a' dih :dhe-eh: 'o or no.

²⁶:Mor nyor 'ble 'bluhba-a' klehkpeh, 'de or-a' :febeh' 'ye gbe :zie:, :yee' deh 'i-deh: eh mu-or 'o :po :eh? 'De mor, :mor nyor-a' :febeh' 'ma, deh or 'ye-a' plo 'de or 'ye-eh' deka 'ye, eh se :ne.

²⁷:Yee' 'yu an 'da-dih-a Nyor-kpalu-a' 'yu-a mu 'de :yi, 'de or :Baa'-a' dhih-a' 'i 'beh-a' 'di, or-: or-a'a: 'enjor-nyor⧾-:. :Mor or 'yle, :yee' or mu nyor⧾-a' klehkpeh geli' :za 'do noo-deh:⧾ on no-a bo.

²⁸Dhih 'jeh, 'an zela a :gwluhuh', nyor⧾ :noo', mo-: :nyna dih dha :a 'nyne-', mo-: :se-' 'meh-: i, 'de on 'ye 'yu an 'da-dih-a Nyor-kpalu-a' 'yu 'ye, or 'ye 'de yi, 'de or 'ye nyor⧾ wlu 'ken :korn.