Read Eastern Krahn Matio' 17 Bible Online

Matio' 17 - Eastern Krahn bible

Matio' 17

¹:Yee' :yeh 'we :meheh'lo zi-a, :yee' :Yusu' 'duo: :Piteh'-: 'Jeen-: 'dekorn: 'Jeen-a' dei' :Jororn'-: 'weh, 'de or kpa-uh 'de tluh :dhorno' ken, on 'ye kpor chehn.

²:Yeh an pobo-a 'o, :yee' or-a' yau :za-dih:-', 'de or-a' 'yuba-a fan, :ka 'yluh-a no-a fan-a', 'de 'tiei: or pa-a-', en :za-dih: :ke, en :ne :bhoror: :ka zorn-pli :ne-a.

³'Yli :a bla-a 'i, :yee' on 'ye :Mose'-: 'dekorn: :Ila'yor-: mo-: :an wlu 'de or bo.

⁴'De :Piteh' :wlu 'de or bo, or 'dae:, :Gwlor :baa', eh :nmor-: 'yi, 'de :a :ne dha. :Mor :on :taa-eh 'bhorn, :yee' 'an mu gbe :dhe dih :gbalie⧾ taan :po dha mor, :due' 'do :on bo, :due' 'do :Mose' bo, :due' 'do :Ila'yor bo.

⁵:Yeh :Piteh' 'si-a 'o :wlu 'da, :yee' 'yli :a bla-a 'i, yao-pli: :en fan-a, me-: 'jli-uh 'dlu. 'De yao-pli: :dao' 'di, 'do :wor wlu 'wluh, on 'dae:, 'An-a: :dhih :kma-yu: 'o, or-: :dhe dih. 'An :porluh 'pehn-: dih 'do or bo. A :to or-a' wlu :dou'⧾ bo.

⁶:Yeh or-a'a: bo :na-nyor⧾ 'worn-a wlu :daa, :yee' :fano-a: no-uh, 'de on slo an-a' 'jeh, on 'jli dih 'do 'bluhbor.

⁷Jorwor: :Yusu' yi 'o on bo, 'de or 'tuh-uh dih, or 'dae:, A :sorn-', a mu yai'. A 'bor :fano: :ple-eh.

⁸:Yeh on 'duo:-a 'dlu⧾ ya-', an pobo-a 'o, :yee' on :se-' nyor :noror' 'ye. Jorwor: :Yusu' :due', or-: on 'ye.

⁹:Yeh an 'dhle-a tluh, :yee' or dhe-uh 'tele' 'i, or 'dae:, A-a' zela:-' nyor-beh :gwluhuh' deh a 'ye-a kele'a: o. :Mor 'yu an 'da-dih-a Nyor-kpalu-a' 'yu 'meh, 'de or 'ye 'de nma-dih-deh 'di 'wluh, 'de a 'ye-eh' nyor⧾ :gwluhuh' zela: 'o.

¹⁰'De on dhele-or dih, on 'da, :Eh :korn dhih 'de nyor⧾ 'tele' :torne-nyor⧾ 'da :Ila'yor:, or-: :korn :or 'ye 'de yi :zai' :eh?

¹¹'De or zela-uh :gwluhuh', or 'da, :Ila'yor :korn or 'ye 'de yi, 'de or 'ye deh⧾-a' klehkpeh 'kpa po.

¹²Jorwor: 'nyi 'on zela: a :gwluhuh', :Ila'yor 'yle :weh, jorwor: on se-or 'i yubo:, 'de deh an 'bhorn-a on 'ye-or' :no-dih:, 'de on :no-dih-eh or. 'Ka :wor 'yu an 'da-dih-a Nyor-kpalu-a' 'yu-a mu or-a' 'jeh-a' worn 'ye-eh :no :ke, 'de on 'kwa.

¹³:Yee' or-a'a: bo :na-nyor⧾ 'worn-eh-: dih :ka eh 'dhu-a nyor⧾ 'ni 'dlu :po :Jororn'-a' dhih-' or za-a-' 'de on bo.

¹⁴:Yee' :Yusu'-: 'dekorn: or-a'a: bo :na-nyor⧾-a' nyor⧾ taan :dao'-: mo-: yi 'o nyor⧾ :doru' :on :ne-a 'o tluh 'zorn bo. :Yeh on nyni-a 'o, :yee' nyor-kpalu :due', or-: yi 'o :Yusu' bo, or-: 'jli dih 'do or 'zorn,

¹⁵or 'dae:, :Gwlor :baa', 'ye 'an-a: nyor-kpalu-yu-a' :wehlih, 'nyi 'on. Or 'ble 'dbaa'-deh:, eh-: no-or 'suh, 'de or 'ye or-a' 'jeh worn 'gabaa. Deh no-eh, ti :dhulu' or 'ga-: dih 'de 'yli deh⧾-' dih-: 'dekorn: 'de 'nior-:.

¹⁶'On kpa-or 'o :an-a'a: bo :na-nyor⧾ bo 'weh. Jorwor: on se or-a' 'puh-dih-eh 'beh-dih:.

¹⁷'De :Yusu' :wlu 'de on bo, or 'dae:, A :mor :kana-nyor:⧾ :daa :or se-a dhih 'jeh-' :po-eh 'ble, 'de :or :korn-a noo-deh:⧾ se-a 'i 'sleh, ti dhie 'on 'ye dha a bo no :eh? :Kaa 'on 'ye :porluh-a' 'yi 'dba-eh no 'do a bo :eh? A :ya 'de 'yu :daa 'noror 'on bo. 'De on kpa-or 'de or bo.

¹⁸:Yee' :Yusu' 'nyi 'kwla 'ye-dih-deh 'tele', eh 'ye 'o 'yu 'de 'wluh. 'De eh 'wluh 'o or 'de. :Yee' 'do :dha :due' 'jeh :dao', or 'puh-'.

¹⁹:Yee' :Yusu'-a'a: bo :na-nyor⧾ yi 'o or bo 'de 'slan-', on dhele-or-: dih, on 'dae:, :Eh :korn dhih 'de :a se 'kpih 'ble 'do 'yu :dao' or-a' 'kwla 'ye-dih-deh 'de :za-eh bo :eh?

²⁰'De or zela-uh :gwluhuh', or 'da, A se eh-a' no-a' 'beh-dih:, deh no-eh, a-a' dhih 'jeh-' :po-eh se 'i 'beh. Dhih 'jeh, 'an zela a :gwluhuh', :mor a-a' dhih 'jeh-' :po-eh :ne :zlaan'-a' 'yor-eh :sloror' 'beh-dih:, :yee' a 'beh-dih: :wlu 'de tluh :daa bo 'weh, :mor a 'da, Mu, 'wluh 'o :dha :on :ne-a, 'de :on 'ye 'do :dao' mu, :yee' an mu 'o 'wluh-:. :Yee' deh⧾-a' klehkpeh 'beh-dih: en 'ye :no-eh: 'do a bo. [

²¹'De mor Nyorsoa bo :wlu-eh-: 'dekorn: 'suehn-' :pa-eh-: en :due', me-: 'beh-dih: :en 'ye nyor⧾ 'kwla 'ye-dih-deh⧾-a' :yih :dao' nyor⧾ 'de :za.]

²²:Yee' :Yusu'-a'a: bo :na-nyor⧾-a' klehkpeh 'kpa :dha :due' 'de :Galali'i-bluhba ken. 'Do :wor :Yusu' zela-uh :gwluhuh', or 'dae:, An yi 'yu an 'da-dih-a Nyor-kpalu-a' 'yu :plo 'da, 'de :gwlor-nyor⧾ bo.

²³An mu-or 'dba-:. :Yee' 'do 'we-eh-a' taan neh 'di, Nyorsoa-a mu-or 'de :za. :Yeh or-a'a: bo :na-nyor⧾ 'worn-ih'-a, :yee' an-a' :porluh⧾ 'kpa-: 'zorn 'gabaa.

²⁴:Yee' :Yusu'-: 'dekorn: or-a'a: bo :na-nyor⧾-: on mu :Kapa'nior-gwlor-', 'do :wor Nyorsoa-a' 'sla-a' 'taa-deh:⧾ :za-nyor⧾ :yi-dih: 'o :Piteh' bo, 'de on dhele-or dih, on 'dae:, A-a'a: nyor⧾ deh :torne-nyor:, or-a' :za Nyorsoa-a' 'sla-a' 'taa-deh⧾ :e?

²⁵'De :Piteh' 'dae:, 'Kei:, or za-ih' o. :Yee' :yeh :Piteh' 'wluh-a 'o :dha 'o, :yee' or mu 'de 'gbu. :Yeh or pa-a, :yee' :Yusu', or-: no :zai'-nyor, :or dhele-or dih, or 'dae:, Samor', :kaa :an-a' :porluh no eh-a' 'ye-a' :eh? Deh 'i-deh-nyor: :or :korn :or 'ye 'taa-deh⧾ :za 'do 'keen-boi' :on :ne-a dha 'bluhba ken bo :eh? An-a' 'nynuu :e? :Ae' nyor⧾ 'sluh⧾?

²⁶'De :Piteh' 'dae:, Nyor⧾ 'sluh⧾ :oo'. 'De :Yusu' 'da, Eh :oo'. :Yee' 'do eh-a' dha, an-a'a: 'nynuu se :korn on 'ye 'taa-deh:⧾ :za 'da.

²⁷Jorwor: nyor⧾ :daa, on :ne-' deh⧾-zon⧾ :gwluhuh' dih :na-dih: 'do :a 'bhun, mu 'de yobo'-pehnu worn 'i, :on 'ye :koeh'eh po. :Yee' :zai'-zimi-eh: :an mu-a 'fla-:, :yee' kan-dih: eh-a' worn 'i, 'do :wor :an mu 'wlii-eh 'ye-dih:. 'Duo-eh, 'de :on 'ye-eh' kpa 'de 'taa-deh:⧾ :za-nyor⧾ bo, 'do mor-: 'dekorn: 'mor-: :a-a'a: Nyorsoa-a' 'sla-a' 'taa-deh⧾ bo.