Read Eastern Krahn Matio' 18 Bible Online

Matio' 18 - Eastern Krahn bible

Matio' 18

¹:Yee' 'do ti :dao' 'di, 'do :wor :Yusu'-a'a: bo :na-nyor⧾ :yi-dih: 'o or bo. 'De on dhele-or dih, on 'dae:, :Or no nyor :klaba' 'do Nyorsoa-a' nyor⧾ wlu 'ken :korn-eh 'zorn :eh?

²'De :Yusu' 'da 'yu-yu-beh :due' 'de or bo. 'De or dhe-or dih 'do an-a' gwea,

³'de or 'dae:, Dhih 'jeh, 'an zela a :gwluhuh', :mor a se-' dih 'bili:, a se 'nynuu: :nyene' gweh, :yee' a 'se 'ba 'de Nyorsoa-a' nyor⧾ wlu 'ken :korn-eh 'zorn pa.

⁴Nyor :or ya-a or-a' 'jeh ya, :ka 'yu-yu: :daa or :ne-a, or-: 'dhu nyor :klaba'-' 'de nyor⧾ :on :ne-a 'de Nyorsoa-a' nyor⧾ wlu 'ken :korn-eh 'zorn 'klu-'.

⁵:Yee' nyor :or kpon-a 'yu-yu dih, 'de 'an 'nyne 'di, :ka :yor :daa or :ne-a, :yee' nyor :dao', 'mor-: 'o or kpon dih.

⁶Jorwor: nyor-beh-nyor-beh: :or mu-eh :no, 'de 'nynuu: :nyene' :daa :on po-a 'an dhih dhih 'jeh-', on 'ye-a' 'o :gwie: 'jeh 'i 'wluh, 'de on 'ye-a' :gwie-zon kpa, :yee' eh mu 'yi dih :nmor 'do nyor :dao', sobu' :klaba' 'ye 'o or :gwlii' :san-dih-eh:, 'de or 'ye 'o yobo'-a' :wloo' :po-eh:, 'de or 'ye 'meh.

⁷'Chlo dha yao 'zorn-a' klehkpeh bo, 'do deh⧾ :dhulu' :en no-eh, 'de nyor⧾-a no-a deh⧾-zon⧾. Deh⧾ :daa, en :korn en 'ye 'de yi. Jorwor: 'chlo 'do nyor :dao', en mu-a-' :yi-dih: bo.

⁸:Yee' :mor eh 'dhu, :an-a' son-: :eh beh :an-a' buh-: no-eh, 'de :on 'ye deh-zon no, :yee' chehn-uh 'o, :on 'ye-uh' 'kwla po. Eh :nmor-: 'yi :on 'ye :nea:, 'de mor :on 'ye :klor, 'de :on 'ye 'de Nyorsoa 'bli yai' mu, :eh :zi 'o 'ble son⧾ 'sororn'-: buh⧾ 'sororn'-: 'de :on 'ye 'de 'kmo :sie: neh-' :po-eh:.

⁹'De :mor :an-a' 'yli-eh no-eh, 'de :on 'ye deh-zon no, :yee' za-eh 'de, :on 'ye-eh' 'kwla po. Eh :nmor-: 'yi :on 'ye 'yli-eh :due' 'ble, 'de :on 'ye 'de Nyorsoa 'bli yai' mu, :eh :zi 'o :on 'ye 'yli 'sororn' 'ble, 'de :on 'ye 'de 'ku 'bli-neh-' :po-eh:.

¹⁰A 'dhu a-a' 'jeh :dhororn', a :ne-' 'nynuu: :daa an-a' nyor :due' :vlehn. Deh no-eh, 'an zela a :gwluhuh' :ka 'enjor-nyor:⧾ :on :ne-a 'de Nyorsoa 'bli yai', :on :korn-a 'de on bo, :an 'dhu-uh-a 'yli-eh bo, mo-: :an pobo 'On-ba: :or :ne-a 'de yai' or-a' 'yuba: ya, ti-a' klehkpeh bo. [

¹¹:Yee' :Yusu' 'dae:, 'Yu an 'da-dih-a Nyor-kpalu-a' 'yu yi-: 'de, or 'ye nyor⧾ :on 'ma-a 'puh-dih:.]

¹²:Yee' :Yusu'-a kpa or-a' wlu 'dlu bo, or 'dae:, :Kaa a-a' :porluh⧾ no eh-a' 'ye-a' :eh? :Mor eh 'dhu, nyor-kpalu :due' 'ble 'blae'⧾-a' :kehehn' :due', 'de :due' 'ye 'o 'wluh, eh 'ye 'ma. :Mor eh :ne :ao', :yee' or :se 'o 'blae'⧾ :dao' :en :korn-a :kwlaa :meheh' :nyieh 'yor :ne-a :meheh' :nyieh 'do tluh ken :sie: i, 'de or 'ye :yeh :eh 'ma-a 'bhorn 'da mu :e?

¹³:Yee' :mor or 'ye-eh, dhih 'jeh, 'an zela a :gwluhuh', 'mona-a' :yor or 'kpa-a 'do eh bo, eh :zi 'o :kwlaa :meheh' :nyieh 'yor :meheh' :nyieh :dao' :en se-a 'ma-' 'weh.

¹⁴'Ka-: 'o :kpeheh: a :Baa' :or :ne-a 'de yai', or-a' dhih :ne. Or :se-' 'bhorn 'nynuu: :nyene' :daa :sloror', an-a' nyor :due'-beh 'ye 'ma.

¹⁵:Yee' :mor eh 'dhu, :an-a' 'de-di' no :on deh-zon 'bhun, :yee' zela-or deh-zon: or no-a, eh-a' dhih or :gwluhuh'. Jorwor: :an-a' :no-dih-eh: 'o nyor⧾ 'nyne-', or-: mor-: a :ne 'sororn' gbai. :Mor or :to :on :dou'⧾ bo, :yee' :on ya-or 'o :dhehehn-gwie 'i 'weh.

¹⁶Jorwor: :mor or se :an-a' wlu :dou'⧾ bo :to, :yee' kpa nyor :due', nyor⧾ 'sororn', 'de on 'ye :an-a' dhih-a' klehkpeh bo zela-nyor⧾ no, :ka Nyorsoa-a' 'chlee-deh 'da-a.

¹⁷:Yee' :mor eh 'dhu, :mor or se nyor⧾ :dao', an-a' wlu :dou'⧾ bo :to, :yee' zela: dhih :daa 'chore-nyor⧾ :gwluhuh'. :Yee' :mor eh 'dhu, :mor or se 'chore-nyor:⧾ :sloror' :dou'⧾ bo :to, :yee' or :ne 'de a 'nyne-' 'suh, or 'ye :dou' :dhe 'dlu 'bhun-nyor no. :Yee' :ka nyor⧾-a no-a se Nyorsoa yubo-nyor⧾-: 'dekorn: nyor⧾ nyor⧾-a za-dih-a 'taa-deh⧾ bo, an-a' dhih-: :yee' 'ka :wor :on 'ye or-a' dhih no.

¹⁸Dhih 'jeh, 'an zela a :gwluhuh', deh-beh: a se-a 'ken dih 'worn-dih: dha yao 'zorn, eh :se-' ken dih 'worn-dih-eh: i 'de Nyorsoa 'bli yai'. 'De deh-beh: a :za-a wlu 'ken dha yao 'zorn, eh mu wlu 'ken :za-eh: :ke 'de Nyorsoa 'bli yai'.

¹⁹'De 'an zela a :gwluhuh' :neheh', :mor eh 'dhu a-a' nyor⧾ 'sororn' 'worn-dih: deh-beh-a' dhih ken dih dha yao 'zorn, 'de on 'ye-eh' 'On-ba: :or :ne-a 'de yai' 'yba-dih:, :yee' or mu-eh :no 'do on bo.

²⁰Deh no-eh, :dha-beh: nyor⧾ 'sororn', nyor⧾ taan, on :gweh-dih:-a :dha :due', 'de 'an 'nyne 'di, 'do :wor 'on :ne 'do on 'nyne-'.

²¹:Yee' :Piteh' yi 'o :Yusu' bo, 'de or dhele-or dih, or 'dae:, :Gwlor :baa', :mor eh 'dhu 'an 'de-di' :taa 'on deh-zon 'bhun no 'do ti-a' klehkpeh bo, :yee' kpor⧾ dhie 'on 'ye en-' dhih bo 'ma-dih: :eh? Kpor⧾ :meheh' 'sorn :e?

²²'De :Yusu' :wlu 'de or bo, or 'dae:, 'An zela: :on :gwluhuh', eh :se kpor⧾ :meheh' 'sorn, jorwor: kpor⧾-a' :kwlaa :meheh' 'sorn-a' 'dlu⧾ kpor⧾ :meheh' 'sorn.

²³'Do eh-a' dha, Nyorsoa-a' nyor⧾ wlu 'ken :korn-eh gweh 'keen :due'-a' deh, :or 'bhorn-a :or 'ye-eh' yubo: :ka or-a'a: 'bhoi-nynuu-a no-a 'wlii: or 'nyi-uh'-a, en-' plo-a'.

²⁴:Yee' :yeh or 'dhu-eh glu, :yee' on ya-or 'yu :due' :or 'ble-a or-a' 'sebla-wlii-a' zlo :zloo: pa 'o :pebeh'-',

²⁵jorwor: or se 'wlii 'ble or 'ye or-a' kpa :za. 'Do eh-a' dha, 'keen 'nyi or-a'a: nyor⧾ 'tele' on 'ye-or' plo, or-: or-a'a: 'nynor-: or-a'a: 'nynuu-: 'dekorn: or-a'a: :kororn-deh⧾-a' klehkpeh-: 'de kpa :dao', or-a' dhih 'ye :jla.

²⁶'De 'bhoi-yu: :dao', or 'jli dih 'do 'keen ybei', or bale-or, or 'dae:, :On :korn 'gen. Kpon :an-a' :porluh dih 'do 'on bo. 'An mu :an-a'a: kpa :dao' or-a' klehkpeh :za.

²⁷:Yeh or-a'a: nyor :klaba' 'ye-a deh :dao', :yee' or 'ye :wehlih: 'do or bo, 'de or 'tali: kpa :dao' or-a' dhih dih. 'De or 'tali-or dih, or mu.

²⁸:Yee' :yeh 'bhoi-yu: :dao', or 'si-a 'zorn, 'de or 'ye-a or 'be 'bhoi-yu :due' :or 'ble-a or-a'a: kpa :ke :en no-a 'wlii-kpor-bei, :yee' or kpon-or :bhluun' 'worn dih, or 'dae:, :Za 'an-a: kpa :on 'ble-a.

²⁹'De or 'be :dao', or 'jli dih 'do or ybei', 'de or bale-or, or 'dae:, :On :korn 'gen, kpon :an-a' :porluh dih 'do 'on bo. 'An mu :an-a'a: kpa :dao' :za.

³⁰Jorwor: or :se-' 'worn :gbor :gbor, 'de or po-or :kasue 'di, or 'ye 'de :ne, or 'ye kpa :dao' :za.

³¹:Yeh or 'bei' 'bhoi-nynuu: :noo' 'ye-a deh :eh :no-eh, :yee' an-a' :porluh⧾ 'kpa-: 'zorn 'gabaa, 'de on mu 'de an-a'a: nyor :klaba' bo, 'de on po-or kuna' 'do deh⧾-a' klehkpeh :en :no-eh bo.

³²:Yeh or-a'a: nyor :klaba' 'worn-ih'-a, :yee' or 'da-or', 'de or 'dae:, :Mor 'bhoi-yu: :daa, :or :korn-a :porluh: :nyni-a worn. 'On 'tali: :an-a'a: kpa-a' klehkpeh-: dih, deh no-eh, :on bale: 'on 'weh.

³³:On :korn :on 'ye :on 'be-a' :wehlih 'ye, :ka 'on no-a :an-a' :wehlih-a' 'ye-a' :ke.

³⁴:Yee' or-a'a: nyor :klaba' 'kpa-' 'chehn, 'de or 'nyi nyor⧾ 'tele', on 'ye-or' :kasue 'di po, 'de on 'ye-or' 'kle 'ye-dih: :chio'lo:, 'de or 'ye kpa :dao' or-a' klehkpeh :za.

³⁵'De :Yusu' 'dae:, 'Ka-: 'o :ke, 'On-ba: :or :ne-a 'de yai', or mu a-a' klehkpeh-a' dhih :no :ke, :mor eh 'dhu, a se deh⧾-zon:⧾ a-a' 'de-di'-boi' no-a 'do a 'bhun, en-' dhih bo 'ma-dih: 'do a-a' :porluh⧾-a' klehkpeh bo.