Read Eastern Krahn Matio' 19 Bible Online

Matio' 19 - Eastern Krahn bible

Matio' 19

¹:Yee' :yeh :Yusu' jla-a 'do deh⧾ :daa or za-a-' bo, :yee' or 'wluh 'o :Galali'i-bluhba ken 'weh, 'de or mu 'de :Judi'a-bluhba-a' 'for ken, :or :ne-a 'de 'Jorle-ni-a' 'yluh-a' 'kwla 'wluh-dih: 'da.

²:Yeh or 'si-a 'o dih, :yee' nyor⧾ :doru', mo-: zi 'o or klei', 'de or 'puh-dih: puhba-nyor:⧾ :on :ne-a 'de on 'klu-' 'de mor.

³:Yee' :Falasi'i-nyor⧾-a' nyor⧾ :noo', mo-: yi 'de or bo, :on yi or wlu 'worn dih 'bhorn-dih: 'da, 'de on dhele-or dih, on 'da, Eh :ne 'o :a-a'a: 'tele'-a' :gwie 'i 'weh :e, nyor 'ye or-a'a: 'nynor 'kwla :za, 'do deh-beh: or mu-a :no bo :e?

⁴'De or dhele-uh dih, or 'da, A :se-' Nyorsoa-a' 'chlee-deh zlo deh eh :za-a-', a :se-eh' 'worn :e? :Ka :eh 'wluh-a 'de eh-a' glu 'dhu 'da, Nyorsoa :or no-a deh⧾-a' klehkpeh-a' noo-nyor, or no 'nynor-: 'dekorn: nyor-kpalu-:.

⁵Nyorsoa-a' 'jeh :dao', or-: :wlu, or 'dae:, Eh-: :korn dhih, 'de 'nynor-: 'dekorn: nyor-kpalu-: an mu an-a'a: 'cheh dih 'tali:, 'de on 'ye :dha :due' 'ti. :Yee' mo-: :ne-a 'sororn', an mu nyor :due' :no.

⁶:Yee' on se 'sororn' :ne :dele' ka, jorwor: on no nyor :due'. 'Do eh-a' dha, deh Nyorsoa po-a :dha :due', nyor se :korn or 'ye-eh' 'i zela:.

⁷'De on dhele-or dih, on 'dae:, :Yee' :eh :korn dhih 'da, 'de :Mose' 'worn-dih-eh ken dih, nyor 'ye or-a'a: 'nynor 'kwla :za-chlee-deh 'nyi, 'de or 'ye-or' 'kwla :za :eh?

⁸'De or 'da, A-a' deh :torne-eh :kma 'i, eh-: :korn dhih 'de :Mose' 'worn-dih-eh ken dih, a 'ye a-a'a: 'nynor⧾ 'kwla :za. Jorwor: eh :se :ao' :ne :dee', :eh 'wluh-a 'de ti Nyorsoa :no-dih:-a deh⧾-a' klehkpeh bo.

⁹:Yee' 'an zela a :gwluhuh', nyor-beh-nyor-beh: :or mu-a or-a'a: 'nynor 'kwla :za, :mor eh 'dhu 'nynor se 'nyne :zaan' no 'do or bo, 'de or 'ye 'nynor :noror' :korn, :yee' or no 'nyne :zaan'.

¹⁰'De or-a'a: bo :na-nyor⧾ :wlu 'de or bo, on 'dae:, :Yee' :mor eh :ne :ao' 'do nyor-kpalu-: 'dekorn: 'nynor-kpao'-: 'nyne-', :yee' 'bli 'ti-dih-deh: :daa, nyor⧾ se :korn on 'ye-eh' no.

¹¹'De or zela-uh :gwluhuh', or 'dae:, Eh se nyor⧾-a' klehkpeh, mo-: :on 'beh-dih: wlu :daa dih kpon-a' :deh. Jorwor: nyor⧾-a' :yuh Nyorsoa 'nyi-eh.

¹²Nyor⧾ :noo'-a' :no-dih: 'nynor-deh-', deh no-eh, on 'wluh-dih: an-a' neh 'weh. 'De nyor⧾ :noo' no-eh 'de on 'bei' 'meh gbor-' dih. 'De :noo' se 'bli 'ti-dih: 'do Nyorsoa-a' nyor⧾ wlu 'ken :korn-eh-a' dhih. 'Nyi nyor :or 'beh-dih:-a :or 'ye-a' deh :daa dih kpon, :yee' or kpon-eh dih.

¹³:Yee' nyor⧾ :noo', mo-: :ya 'de :Yusu' bo 'nynuu: :nyene', or 'ye-uh son⧾ ken dih tba, 'de or 'ye 'de Nyorsoa bo :wlu, an-a' dhih. Jorwor: or-a'a: bo :na-nyor⧾ kan-uh-: 'i.

¹⁴'De :Yusu' 'dae:, A 'nyi 'nynuu: :nyene' yi 'noror 'on bo. A 'bor an-a' 'yi :kan-eh. Deh no-eh, :ka 'nynuu: :nyene' :ne-a, nyor⧾ :on :ne :ao', mo-: Nyorsoa-a mu wlu 'ken :korn.

¹⁵'De or tba an-a' :due' :due' son⧾ ken dih, 'de or 'wluh 'o on bo, or mu.

¹⁶:Yee' nyor-kpalu :due', or-: yi 'o :Yusu' bo, or 'dae:, Nyor⧾ deh :torne-nyor:, deh 'jeh neh-a' :yeheh 'on 'ye no, 'de 'on 'ye 'kmo :sie: :febeh' 'ble :eh?

¹⁷'De :Yusu' dhele-or dih, or 'dae:, :Eh :korn dhih :an dhele 'on dih, 'do deh 'jeh neh :no-eh-a' dhih bo :eh? Nyorsoa :due', or-: 'dhu nyor 'jeh-' 'klein'. :Yee' :mor eh 'dhu :on :taa 'kmo :sie: :febeh' 'bhorn, :yee' dhe 'o :Mose'-a' 'tele' dih.

¹⁸'De or 'dae:, 'Tele' :yeheh :eh? 'De :Yusu' 'dae:, Nyor-a' 'dba-:-' nyor, nyor-a' :no-' 'nyne :zaan', nyor-a' 'yli-:-', nyor-a' 'dhu-dih:-' nyor⧾ dhih ken dih,

¹⁹'ye :on 'de-: 'dekorn: :on :baa'-: deh-', :yee' :ybeh nyor⧾ :on :ne 'ti-a :dha :due', :ka :on no-a :an-a' 'jeh-a' :ybeh-a'.

²⁰:Yeh or 'da :ao', :yee' 'yu :gbolo' :dao', or 'da, 'On dhe 'o 'tele'⧾ :daa, en-' klehkpeh-: dih. :Eh :sie: 'o :neheh' 'on 'ye no :eh?

²¹'De :Yusu' 'dae:, :Mor :an 'bhorn :on 'ye 'yi 'sleh-nyor: 'jeh nor no, :yee' mu. Deh⧾-a' klehkpeh :on :korn-a, :on 'ye-ih plo, 'de :on 'ye 'wlii: :an mu-a 'ye-:, :on 'ye-ih nyor⧾ :on se-a deh-a' :za-da 'ble 'nyi. :Mor :on no-eh, :yee' :an mu bhaan-deh⧾ 'ble-: 'de Nyorsoa 'bli yai'. :Mor :on no :ao', :yee' 'yle, :on 'ye 'o 'on klei' zi.

²²:Yee' :yeh 'yu :gbolo' :dao', or 'worn-a deh :daa, :yee' or mu-', or 'wluh 'o :dha :Yusu' :ne-a 'weh. 'De or-a' :porluh 'kpa 'zorn. Deh no-eh, or 'ble :kororn-deh:⧾ :dhulu'.

²³:Yee' :Yusu' :wlu-' 'de or-a'a: bo :na-nyor⧾ bo, or 'dae:, Dhih 'jeh, 'an zela a :gwluhuh', eh mu 'i :kma 'do bhaan-nyor bo, 'de or 'ye 'de Nyorsoa-a' nyor⧾ wlu 'ken :korn-eh 'zorn pa.

²⁴'An zela a :gwluhuh' :neheh', eh :kma 'i, 'do bhaan-nyor bo, or 'ye 'de Nyorsoa-a' nyor⧾ wlu 'ken :korn-eh 'zorn pa, :eh :zi 'o :kpuan' ken :soo'o 'ye 'de 'mehno-a' 'bie' 'di :yi-dih:.

²⁵:Yee' :yeh or-a'a: bo :na-nyor⧾ 'worn-a deh or :za-a-', :yee' an-a' :porluh⧾ 'ma-' 'gabaa, 'de on dhele-or dih, on 'dae:, :Yee' :mor eh :ne :ao', :yee' :or 'beh-dih: :or 'ye 'puh :naa :eh?

²⁶Jorwor: :Yusu' pobo-uh-: ya, or 'da, Nyor se deh :daa eh-a' no-a' 'beh-dih:. Jorwor: Nyorsoa :mloror', or 'beh-dih: deh⧾-a' klehkpeh-a' no-a' 'weh.

²⁷:Yeh :Yusu' 'da :ao', :yee' :Piteh' :wlu-', or 'da, :Gbee'e:. Deh⧾-a' klehkpeh :wor :a 'tali: dih, 'de jorwor: :a zi 'o :on klei'. Deh :a mu 'ye-: :naa :eh?

²⁸'De :Yusu' 'da, Dhih 'jeh, 'an zela a :gwluhuh', ti 'bluhba: :dele'-a mu-a 'de :yi, 'de 'yu an 'da-dih-a Nyor-kpalu-a' 'yu-a mu-a 'o or-a'a: dhih-a' 'i 'beh :kpala' ken dih :dhe, :yee' a :mor :or zi-a 'o 'on klei', a mu 'keen :kpala'⧾-a' :bhue: 'yor 'sororn' ken dih dhele: :ke, 'de a 'ye 'cheh-dlu⧾-a' :bhue: 'yor 'sororn' :on no-a 'Ezlea-nyor⧾ wlu 'ken :korn.

²⁹:Yee' nyor⧾-a' klehkpeh :on 'tali:-a an-a'a: 'gbu⧾-: 'de-di'-boi'-: 'de-: :baa'-: 'nynuu-: 'dekorn: an-a'a: gle⧾-: dih, 'do 'an 'nyne-a' dhih bo, :yee' an mu-ih, en-' :kehehn' :kehehn' 'ye-:, 'de an mu 'kmo :sie: :febeh' 'ye-:.

³⁰Jorwor: nyor⧾ :dhulu' :a 'da-dih-a nyor⧾ :klaba'⧾ :naa, mo-: :an mu 'zeehn :no 'de ybei'. :Yee' :yuh :a 'da-dih-a nyor⧾ 'zeehn :naa, an-a' 'jeh :dao', mo-: :an mu nyor⧾ :klaba'⧾ :no 'de ybei'.