Read Eastern Krahn Matio' 2 Bible Online

Matio' 2 - Eastern Krahn bible

Matio' 2

¹:Yee' :yeh :Yusu' 'wluh-a 'de :gwlor an 'da-dih-a 'Behble'hehn 'de :Judi'a-bluhba ken, ti :Hehlo' no-a 'keen 'do 'bluhba: :dao' ken, 'do :wor :toror' :korn-nyor:⧾ :on 'chean'-a 'chuh :dhlaen, mo-: yi :Julu'slehn, on 'wluh-dih: 'de 'yluh-a' 'kwla 'wluh-dih: 'da,

²on dhele: nyor⧾ dih, on 'dae:, Dha 'yu :bleheh'eh: :or 'wluh-a :or no-a 'keen 'do :Jueh'-nyor⧾ bo, or :ne :eh? :A 'ye or-a' 'chuh :dhlaen-eh 'de 'yluh-a' 'kwla 'wluh-dih: 'da. Eh-a' dhih, :a 'yle :a 'ye-or' :weheh' :za.

³:Yee' :yeh 'Keen :Hehlo' 'worn-a dhih :daa, :yee' or-: 'dekorn: nyor⧾-a' klehkpeh :on :ne-a :Julu'slehn-: an-a' :porluh⧾ :gba ya.

⁴'De or 'da Nyorsoa-a' 'slaa: :za-nyor:⧾ :klaba'⧾-a' klehkpeh-: 'dekorn: nyor⧾ 'tele' :torne-nyor⧾-:. :Yeh on 'kpa-a :dha :due', :yee' or dhele-uh-: dih, or 'dae:, Dha Nyorsoa-a' 'taan'-yu :korn or 'ye 'wluh-dih: :eh?

⁵'De on 'da, 'De 'Behble'hehn: 'o, or :korn or 'ye 'wluh-dih: 'de :Judi'a-bluhba ken. Deh :daa, eh-: 'o, Nyorsoa-a' wele-eh: :po-nyor 'chle, or 'dae:,

⁶Jorwor: :mor 'Behble'hehn: :daa :or :ne-a 'de :Judi'a-bluhba ken, :on :se :gwlor-yu: klehkpeh klehkpeh, 'de nyor⧾ wlu 'ken :korn :gwlor⧾ :klaba'⧾ :daa 'nyne bo. Deh no-eh, 'de :on 'di, 'do :wor nyor⧾ :na-dih-nyor-a mu 'wluh-:, or 'ye 'Ezlea-nyor⧾ 'yli-eh bo 'dhu, :on no-a 'an-a: nyor⧾.

⁷:Yee' :Hehlo' 'da :toror' :korn-nyor:⧾ :dao' 'weh, 'de 'slan :pa ka 'di, or 'ye-uh' dih dhele: ti :yihih :eh 'chuh :dhlaen-eh: :dao', eh 'wluh-dih-uh-a 'i.

⁸'De or dbo-uh 'Behble'hehn, or 'dae:, A mu, a 'ye 'yu :bleheh'eh: :dao' dih 'bhorn deh 'jeh. :Yee' :mor a 'ye-or, :yee' a 'yle, 'de a 'ye 'on :gwluhuh' zela:, 'de 'on 'ye-or' :weheh' :za 'da mu :ke.

⁹:Yee' :yeh on 'worn-a 'keen-a' wlu, :yee' on 'kpa 'i :gwie:, :yee' 'chuh :dhlaen-eh-a' 'jeh :dao', on 'ye-a :dee', :eh 'wluh-a 'de 'yluh-a' 'kwla 'wluh-dih: 'da, eh-: on 'ye :neheh'. :Yee' eh-: mu 'de on ybei' :chio'lo:, 'de eh 'ti-dih: 'do :dha 'yu :bleh-dih:-a 'i.

¹⁰:Yeh on 'ye-eh, :yee' 'mona 'yi-dih-uh-: dih.

¹¹:Yeh on pa-a 'de 'gbu :dao' 'di, :yee' on 'ye 'yu :bleheh'eh 'weh 'do or 'de :Mehle' :gwlii', 'de on bla 'koor-dlu⧾ 'yi glu, on :za or-a' :weheh'. 'De on kan-dih: an-a'a: bhaan-borlor'⧾ 'i, on 'nyi-or 'nyii'-deh⧾, :en 'dhu-a 'goo-: :korn deh⧾ :mor nyor⧾ po-a 'yli, :en po-a 'no 'jeh no, an 'da-dih-a 'flehnkensehn-: 'dekorn: :pofi'orn: an 'da-dih-a 'mina-:.

¹²'De Nyorsoa 'dhu-uh 'slen 'de 'nyinor-', or 'dae:, A-a' :mu-dih:-' 'noror 'Keen :Hehlo' bo deka o. 'De on :mu-dih: :gwie: 'sluh bo, on mu on 'bli.

¹³:Yee' :yeh on mu-a, :yee' :Gwlor :baa'-a' 'enjor :due', or-: :yi-dih: 'Joseh 'dlu bo 'de 'nyinor-', 'de or 'dae:, :Sorn-', 'duo: 'yu-yu-: :korn or 'de-: a 'ye ple, a 'ye 'Iye-bluhba ken mu. 'Do :wor a 'ye dih :dhe :chio'lo:, 'de jorwor: 'on 'ye a 'da. Deh no-eh, 'Keen :Hehlo'-a mu 'yu-yu: :daa 'kwla⧾-' dih 'bhorn-:, or 'ye-or' 'dba.

¹⁴'De 'Joseh :sorn-' 'mano-'. Or 'duo: 'yu-: :korn or 'de-:-'. 'De on 'kpa 'Iye-bluhba: :gwie ken.

¹⁵'Do :wor on :dhe dih :chio'lo:, 'de 'Keen :Hehlo' 'meh. :Yee' deh :Gwlor :baa'-a' wlu :za-a-' see, :eh :yi-dih:-a or-a' wele-eh: :po-nyor-', eh 'kpa dhih 'jeh-' 'weh, :eh 'dhu-a, 'De 'Iye-bluhba ken, 'do :wor 'on 'da-dih: 'an-a: 'Yu, or 'ye 'de 'wluh.

¹⁶:Yee' :yeh 'Keen :Hehlo' yubo-eh 'i, :ka :toror' :korn-nyor:⧾ :dao', on :bo-dih-or dih, :yee' 'chehn 'dba-or', 'de or 'nyi nyor⧾ 'tele', on 'ye nyor⧾-kpalu⧾-nynuu-a' klehkpeh, :eh 'wluh-a zon⧾ 'sororn' bo, :eh yi-a 'bluhbor, 'dba, 'de 'Behble'hehn-: 'dekorn: :gwlor⧾ :nyene'-a' klehkpeh :en :ne-a 'Behble'hehn 'de dih-:. 'De on no-eh. Deh :korn-a dhih :Hehlo' no-eh, :toror' :korn-nyor⧾ zela-or :gwluhuh' 'weh, ti 'chuh :dhlaen-eh 'wluh-dih-uh-a 'i :zai', 'do zon⧾ 'sororn' :en zi-a 'di.

¹⁷:Yee' Nyorsoa-a' wlu 'kpa-' dhih 'jeh, :ka or-a' wele-eh: :po-nyor: :Jehlimaya' no-a eh-a' :za-a' see, or no-a,

¹⁸'Viin'-wlu: mo-: 'worn-eh: 'de 'Wlema-gwlor. :Wlechor'-a 'vin-' or-a'a: 'nynuu-a' dhih, 'de or :se-' 'bhorn, nyor 'ye-or' :porluh 'di dih dhe. Deh no-eh, on 'meh-', on :se-' 'ye-eh: i :neheh'.

¹⁹:Yee' :yeh 'Keen :Hehlo' 'meh-a, :yee' :Gwlor :baa'-a' 'enjor :due', or-: :yi-dih: 'Joseh 'dlu bo 'de 'nyinor-', ti or :ne-a 'de 'Iye-bluhba ken,

²⁰or 'dae:, :Sorn-', 'duo: 'yu-yu-: :korn or 'de-: a 'ye 'de 'Ezlea-bluhba ken de mu. Deh no-eh, nyor⧾ :an 'bhorn-a 'yu-a' 'dba-a' :dee', on 'meh-'.

²¹'De 'Joseh :sorn-', or 'duo: 'yu-yu-: :korn or 'de-:-'. 'De on mu 'Ezlea-bluhba ken de.

²²:Yee' 'Joseh 'worn-ih' :ka 'Akele'ya :sie:-a 'o or :baa' 'Keen :Hehlo'-a' kpala' 'i 'de :Judi'a. :Yeh or 'worn-ih'-a, :yee' :fano-a: no-or, or 'ye 'de mu. :Yee' Nyorsoa 'dhu-or 'slen 'de 'nyinor-', 'de or mu 'de :Galali'i-bluhba ken.

²³Or 'ti 'o :gwlor an 'da-dih-a 'Nazla. :Yee' :Gwlor :baa'-a' wlu 'kpa-' dhih 'jeh :ka or-a' wele-eh: :po-nyor⧾ no-a eh-a' :za-a' see, on no-a, An mu-or 'Nazla-yu 'da-dih:.