Read Eastern Krahn Matio' 20 Bible Online

Matio' 20 - Eastern Krahn bible

Matio' 20

¹:Yee' :Yusu' :wlu-', or 'dae:, Nyorsoa-a' nyor⧾ wlu 'ken :korn-eh gweh :ka 'yu :due' :or 'ble-a gle, 'de :or :sorn-a-' zorn bo-mlai', 'de :or mu-a :koan: :no-nyor:⧾ 'bhorn 'da, or 'ye-a' geli' po, 'de on 'ye-a' 'de or 'bli 'gle mu, on 'ye-a' :koan no.

²:Yeh or 'ye-a nyor⧾, :yee' or 'worn-dih-eh ken dih 'weh, or 'ye-uh' geli' :za, 'do deh on :korn on 'ye-a' 'ye, 'do 'we-eh :due' bo, :yee' or dbo-uh 'de or 'bli 'gle 'weh.

³:Yee' :yeh 'yluh-a yi-a 'i :kma 'da, :yee' or mu-' :neheh', :yee' or 'ye nyor⧾ :noo', mo-: :nyna dih 'do 'doror', mo-: se :koan :korn :on 'ye no.

⁴'De or zela-uh :gwluhuh', or 'dae:, A mu 'de 'on 'bli 'gle :ke, a 'ye :koan no. :Yee' 'an mu a geli' :za-dih-deh: :eh :korn-a 'de a bo 'nyi-:.

⁵'De on mu. :Yee' :yeh eh no-a 'yluh-gbao', 'de eh no-a 'gwie-yluh-gbao' :neheh', :yee' or no deh or no-a 'weh :neheh' :dele' ka.

⁶:Yee' :yeh eh yi-a 'gwie-yluh-peheh'eh bo, :yee' or mu-', 'de or 'ye nyor⧾ :noo', mo-: :nyna dih, 'de or dhele-uh dih, or 'dae:, :Eh :korn dhih, 'de a :nyna dih :nynaa: dha mor, 'zean' 'de glu-a gor, 'de a :se-' deh no :eh?

⁷'De on 'dae:, Nyor se :ne :or 'ye :a geli' po. 'De or 'dae:, A mu 'de 'on 'bli 'gle, a 'ye :koan no :ke. 'De on mu.

⁸:Yee' :yeh glu-a yi-a gor 'da, :yee' 'yu :dao' :or :korn-a gle, :yee' or :wlu-' 'de 'yu or po-a 'o :koan: :no-nyor⧾ 'dlu bo 'weh, or 'da, 'Da :koan: :no-nyor⧾, 'de :on 'ye-uh' geli' :za, 'do an-a' :koan on no-a bo. Tba 'de :yuh :on 'bor-dih:-a de bo dih :zai', 'de :on 'ye :zai' no ken :yeh-dih:.

⁹:Yee' :yeh :yuh 'dhu-a :koan glu :eh 'wluh-a 'gwie-yluh-peheh'eh bo, :yee' an-a' :due' :due' 'ye 'wlii: nyor :due' :korn :or 'ye-a' 'ye, 'do 'we-eh :due' 'di 'weh.

¹⁰'Do eh-a' dha, :yeh :yuh :on 'dhu-a :koan glu :zai', on yi-a 'o an-a'a: geli' :za-dih-deh, :yee' :mor on :taa 'ye :dee', :yee' on 'da, an mu deh :dhulu' 'ye-: :eh 'ye 'o on 'bei'-' :zi. Jorwor: an-a' klehkpeh 'ye deh :due' 'tene' :kpeen:.

¹¹:Yee' :yeh on 'ye-a an-a'a: 'wlii, :yee' an jeh gle :korn-nyor-: 'bli,

¹²an no, :A :mor no-a :koan :noo:, 'de 'yluh 'kpa-a :a 'dlu :kpaa:, :eh 'wluh-a zorn bo 'bli, :eh :yeh-dih:-a 'gwie-yluh bo ken. :Yee' :yuh :daa :on 'bor-dih:-a :koan-' de, 'de :on :no-dih:-a 'yluh-buh :due'-' :koan-' gbai, mo-: :ne :a 'ye geli' :za-dih-deh :due'.

¹³Jorwor: or zela: an-a' nyor :due' :gwluhuh', or 'dae:, 'An 'yu, 'on :se-' deh-zon no 'do :on bo. Eh :se deh :eh :korn-a dhih :on 'worn-dih-a ken dih, :mor :on no-a :koan 'do 'we-eh :due' 'di, 'on 'ye-a eh-a' 'wlii-eh :on 'nyi :e?

¹⁴'Duo: :an-a'a: geli' :za-dih-deh-', :on 'ye mu. 'An 'bhorn 'on 'ye :yuh :on 'bor-dih:-a :koan-' de, deh :korn-a 'be 'on 'nyi-a :on, 'nyi.

¹⁵'On se 'kpih 'ble, 'on 'ye deh 'an 'bhorn-a 'on 'ye-a 'an-a: 'wlii-eh-' :no-dih:, 'on 'ye-eh-' :no-dih: :e? :Ae' :an no :gwlehehn' 'do 'an :porluh-a' worn :nmor-eh: :eh no-eh 'de 'on se-a kwa dih :kmu bo?

¹⁶'De :Yusu' 'dae:, 'Do deh :ne-a :due' 'di, :yuh :a 'da-dih-a nyor⧾ 'zeehn :naa, mo-: :an mu nyor⧾ :klaba'⧾ :no 'de ybei'. :Yee' :yuh :a 'da-dih-a nyor⧾ :klaba'⧾ :naa, an-a' 'jeh :dao', mo-: :an mu 'zeehn :no 'de ybei'.

¹⁷:Yee' :yeh :Yusu'-a mu-a :Julu'slehn, :yee' or po or-a'a: bo :na-nyor:⧾ :on :korn-a :bhue: 'yor :ne-a 'sororn' :dha :due', 'de or :wlu 'de on bo, 'do :gwie 'i, or 'dae:,

¹⁸A :gbee'e:. :A mu :Julu'slehn :naa. 'Do :wor 'yu an 'da-dih-a Nyor-kpalu-a' 'yu-a mu :plo-dih-eh, 'de Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: bo. :Yee' nyor⧾ :dao', an mu-or wlu 'ken :chehn, or 'ye 'meh,

¹⁹'de on 'ye-or' nyor⧾ :on :se-a :Jueh'-nyor⧾ 'kwla :za-dih:, 'de on 'ye-or :goba'-dhih ken dih 'wluh-dih:, on 'ye-or' bla, 'de on 'ye-or' 'o tu 'i :kor-dih:. Jorwor: 'do 'we-eh-a' taan neh 'di, Nyorsoa-a mu-or 'de nma-dih-deh 'di :za.

²⁰:Yee' 'Jeen-: 'dekorn: :Jororn'-: :on no-a :Zehbehli'-a'a: 'nynuu, on 'de, or-: :ne on yi 'de :Yusu' bo, 'de or 'jli dih 'do or 'zorn, or dhele-or dih, or 'ye deh no 'do or bo.

²¹'De :Yusu' dhele-or dih, or 'da, Deh :an 'bhorn :eh? 'De 'nynor 'da, Po wlu :dhama'-' 'noror 'on bo. 'Nyi 'an-a: nyor⧾-kpalu⧾-nynuu 'sororn' :daa, an-a' nyor :due' 'ye 'de :an-a' :dila-son bo dih :dhe, 'de :due' 'ye 'de :an-a' kona-son bo dih :dhe, ti :an mu-a nyor⧾ wlu 'ken :korn.

²²Jorwor: :Yusu' 'dae:, Deh a dhele-a dih, a se-eh yubo:. 'Kle 'ye-eh-a' 'korbuh 'an mu-a 'di 'na-dih:, a 'beh-dih: an-a' 'di 'na-dih-eh 'weh :e? 'De on 'da, :A 'beh-dih-eh'.

²³'De or 'dae:, A mu 'an-a: 'korbuh 'di 'na-dih:, jorwor: 'do 'an :dila-son-: 'dekorn: 'an kona-son-: en-' bo dih :dhe-deh: :dao', eh :se 'mor-:, 'an-a' 'nyi-eh nyor⧾. Jorwor: 'On-ba:, or-: po 'for⧾ :dao' 'kpa, 'do nyor⧾ or gan-a bo, on 'ye 'de eh bo dih :dhe.

²⁴:Yee' :yeh or-a'a: bo :na-nyor⧾ :bhue: :dao', on 'worn-ih'-a, :yee' on 'kpa-dih: 'de-di'-boi' 'sororn' :dao'-' 'chehn.

²⁵Jorwor: :Yusu' 'da an-a' klehkpeh 'do or bo, or 'dae:, A yubo-eh', nyor⧾ :on se-a Nyorsoa yubo:, an-a' nyor⧾ wlu 'ken :korn-nyor⧾-a kpa-dih-uh-a 'kpih.

²⁶Eh se :korn, eh 'ye :ao' :ne, 'noror a 'klu-', jorwor: nyor :or 'bhorn-a nyor :klaba'-deh 'noror a 'klu-', :yee' or-: :korn :or 'ye a-a'a: 'bhoi-yu no.

²⁷:Yee' :mor a-a' nyor :taa 'bhorn or 'ye 'o a 'dlu :ne, :yee' or :korn or 'ye a-a'a: 'ge-yu no,

²⁸:ka 'yu an 'da-dih-a Nyor-kpalu-a' 'yu :sloror', or no-a, or se-a 'de yi or 'ye-a' :tabehyie po, jorwor: or yi-: 'de, or 'ye :gwlor-nyor⧾-a' 'bhoi-yu no, 'de or 'ye or-a' :febeh' 'kwla :za, or 'ye 'meh, 'do nyor⧾ :dhulu'-a' zelie-eh bo.

²⁹:Yee' :yeh :Yusu'-: 'dekorn: or-a'a: bo :na-nyor⧾-: an 'wluh-a :Jehliko'o, :yee' nyor⧾ :doru', mo-: zi 'o or klei'.

³⁰:Yee' 'doror'-nyor⧾ 'sororn', mo-: :dhe dih 'do :gwie: worn 'i. :Yeh on 'worn-ih'-a :ka :Yusu'-a zi-a, :yee' an po 'geh⧾, an no, :Gwlor :baa', :Debe'-a' 'yu, 'ye :a-a' :wehlih.

³¹:Yeh an po-a 'geh⧾, 'de an wele-a :Yusu', :yee' nyor⧾ :doru' :on :ne-a 'o, an po-uh 'borboa' 'i, an no, A no 'dhuan. :Yee' jorwor: on 'kpa 'de de dih, an po 'geh⧾, 'de an no, :Gwlor :baa', :Debe'-a' 'yu, 'ye :a-a' :wehlih.

³²:Yeh on 'da :ao', :yee' :Yusu' :nyna dih, 'de or 'da-uh, or dhele-uh dih, or 'dae:, Deh a 'bhorn 'on 'ye no 'do a bo :eh?

³³'De on 'da, :Gwlor :baa', :a 'bhorn :a 'ye dih 'ye o.

³⁴:Yee' an-a' :wehlih-a: no :Yusu', 'de or 'tuh an-a' 'yli dih. :Yee' 'do :dha :due' :dao', an 'ye-: dih, 'de on zi 'o or klei'.