Read Eastern Krahn Matio' 22 Bible Online

Matio' 22 - Eastern Krahn bible

Matio' 22

¹:Yee' :Yusu' :wlu-' 'de on bo 'de 'dlan⧾ 'di :neheh', or 'dae:,

²Nyorsoa-a' nyor⧾ wlu 'ken :korn-eh gweh :ka 'keen :due', :or 'dhu-a 'nynor-a' nyina: :ya-gor 'do or-a'a: 'yu-nyor-kpalu bo.

³'De or dbo or-a'a: 'bhoi-nynuu on 'ye nyor⧾ or 'da-a, 'da 'da mu, on 'ye gor-' yi. Jorwor: nyor⧾ :dao', on 'da on :se 'de :mu i.

⁴'De or dbo 'bhoi-nynuu: :noo' :neheh', or 'dae:, A zela: nyor⧾ :dao' 'on 'da-a :gwluhuh', a 'da, A :gbee'e:. 'On gweh dii-deh⧾ 'i. 'On 'dba 'an-a: :blii'⧾-a' gblor⧾-: 'dekorn: 'an-a: :blii'⧾-a' 'nynuu: 'jeh nor-: 'weh. Deh⧾-a' klehkpeh :po-eh:-' 'kpa. :Yee' a yi 'do 'an-a: 'yu-a' 'nynor-a' nyina: :ya-gor-'.

⁵Jorwor: nyor⧾ or dbo-a wlu bo dih, an-a' :dou'⧾-a' deh-beh-deh-beh:, me-: se 'de or bo :ne, 'de on mu. An-a' nyor :due' mu 'de or 'bli 'gle, 'de :due' mu 'de or-a'a: deh⧾ :plo-deh bo.

⁶'De :yuh :on :sie:-a 'o, on kpon 'bhoi-nynuu: :dao', on no-uh dhih-', 'de on 'dba-uh.

⁷:Yee' :yeh 'keen 'worn-ih'-a, :yee' 'chehn 'dba-or'. 'De or dbo or-a'a: sorye', 'de on 'dba :nyor⧾ 'dba-nyor:⧾ :dao', on po an-a'a: gwlor 'yli.

⁸'De or :wlu 'de or-a'a: 'bhoi-nynuu bo, or 'dae:, 'Nynor-a' nyina: :ya-gor-a' dii-deh⧾ :gweh 'i, jorwor: nyor⧾ 'on dbo-a wlu bo, on se-eh 'i :bleh-dih:, on 'ye 'de yi.

⁹:Yee' eh-a' dhih, a mu 'de 'kpa :gwie 'i, a 'ye nyor-beh: a mu-a 'ye-:, a 'ye-or' 'da, or 'ye gor-' yi o.

¹⁰'De 'bhoi-nynuu: :dao', on mu 'de :gwie 'i, 'de on 'gbo-dih: nyor⧾-a' klehkpeh on 'beh-dih:-a on 'ye-a' 'ye, :yuh :korn-a kplen :nmor-a 'yi dih-: 'dekorn: :yuh :korn-a kplen :nyni-a 'yi dih-:. :Yee' 'nynor-a' nyina: :ya-gor-a' 'gbu 'yi-' 'do 'duhba⧾ bo.

¹¹:Yee' 'keen :dao', or pa 'de 'gbu, or 'ye or-a'a: 'duhba⧾ 'ye. :Yeh or pa-a 'de 'gbu, :yee' or 'ye 'yu :due', or-: :se-' gor :dao', or-a' 'tiei-' pa.

¹²'De or dhele-or dih, or 'dae:, 'On 'be, :kaa :on no 'noror 'gbu :daa yi-a', 'de :on :se-' 'nynor-a' nyina: :ya-gor-a' 'tiei-' pa :eh? Jorwor: or-a' 'worn-dih: :wluu-dhih.

¹³:Yee' 'keen zela: or-a'a: 'bhoi-nynuu :gwluhuh', or 'dae:, A san or-a' son⧾-: 'dekorn: buh⧾-: a 'ye-or 'do 'zorn po 'de neh-', 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

¹⁴'De :Yusu' jla or-a' wlu 'dlu-', or 'dae:, Nyorsoa 'da nyor⧾ :dhulu', jorwor: nyor⧾-kpor-bei: :gan-eh:.

¹⁵:Yee' :Falasi'i-nyor⧾, mo-: mu 'slan-', on 'ye :Yusu' wlu 'worn dih 'bhorn-dih:.

¹⁶:Yee' on dbo 'de or bo, an-a'a: bo :na-nyor⧾-: 'dekorn: :Hehlo'-a'a: bo :na-nyor⧾-: 'de on :wlu 'de or bo, on 'dae:, Nyor⧾ deh :torne-nyor:, :a yubo-eh' :ka :an za-a 'yi 'sleh-dhih-', 'de :an torne-a nyor⧾ Nyorsoa-a' :gwie: 'jeh, 'de 'yi 'sleh ka 'di. :An-a' ple nyor-a' 'yli-eh, 'de :on se 'de eh bo :korn, :ka nyor-a' :yeh 'beh.

¹⁷:Yee' zela: :a :gwluhuh', :kaa :on no eh-a' :gwluhuh' dih :na-dih-eh :eh? Eh :ne 'o :a-a'a: 'tele'-a' :gwie 'i 'weh :e, nyor 'ye 'taa-deh⧾ :za, 'de 'Wloon-nyor⧾-a' 'keen bo :e? :Ae' :a-a' :no-eh' ke?

¹⁸Jorwor: :Yusu' yubo: 'kulu-dhih: on 'dhu-a on 'ye-a' no, 'do on :gwlii' 'weh, 'de or :wlu 'de on bo, or 'dae:, A :mor nyor⧾-a' 'yli 'ye-nyor:⧾ :daa. :Eh :korn dhih a yi 'on dih 'dhen 'da :eh?

¹⁹A :torne: 'on 'wlii-eh, nyor⧾-a za-dih-a 'taa-deh⧾, 'on 'ye-eh 'ye. 'De on :ya 'de :due' 'de or bo.

²⁰:Yeh or 'ye-eh, :yee' or dhele-uh-: dih, or 'dae:, :Or :korn 'dlu-: 'dekorn: 'nyne-: :en :ne :daa eh ken :eh?

²¹'De on 'da, 'Wloon-nyor⧾-a' 'keen :oo'. 'De or 'dae:, A 'nyi 'Wloon-nyor⧾-a' 'keen deh :eh :korn-a 'de or bo, :yee' a 'nyi Nyorsoa deh :eh :korn-a 'de or bo.

²²:Yeh on 'worn-ih'-a, :yee' an-a' :porluh⧾ 'ma-', 'de on 'tali-or dih, on mu.

²³:Yee' 'do 'we-eh: :ne-a :due' 'di, 'do :wor :Jueh'-nyor⧾-a' kpor an 'da-dih-a :Sayusi'i-nyor:⧾ :on no-a :mor nyor 'meh, :yee' or-a' :sorn-' :neheh', an-a' 'jeh :dao', mo-: mu 'de :Yusu' bo, 'de on dhele-or dih,

²⁴on 'dae:, Nyor⧾ deh :torne-nyor:, :Mose' 'da, :mor nyor se 'yu 'wluh, 'de or 'ye 'meh, :yee' or-a' dei'-yu :korn or 'ye or-a'a: 'nynor-' 'duo:, or 'ye-or' :korn, 'de or 'ye 'nynuu 'wluh 'do or-a' 'de-di' :or 'meh-a 'gor bo.

²⁵:Yee' 'de-di'-nyor⧾-kpalu⧾ :meheh' 'sorn :oo', mo-: 'ti :daa :a bo :dee', 'de :klaba' nor :korn 'nynor, 'de or 'meh, or :ne 'nynor se 'yu 'wluh, 'de or-a' dei'-yu 'duo: or-a'a: 'nynor-'.

²⁶'Ka-: 'sororn' nor-: 'dekorn: taan nor-: on no :ke. Eh-: gweh an-a' klehkpeh :ne-a :meheh' 'sorn 'zorn.

²⁷:Yeh an-a' klehkpeh, on 'meh-a, 'de on :gweh-a 'o dih, :yee' 'nynor :dao', or 'meh-' :ke.

²⁸:Yee' :ka or 'ti-a nyor⧾ :meheh' 'sorn :dao' 'bli :dee', :yee' :mor ti nyni 'o, 'de nyor⧾-a' klehkpeh :on 'meh-a, 'de on 'ye 'de 'wluh, :yee' :or :korn 'nynor or mu-' 'dhu-eh: :eh?

²⁹:Yeh on dhele:-a :Yusu' deh :daa dih, :yee' or :wlu-' 'de on bo, or 'dae:, Deh⧾ a na-dih-a :gwluhuh' dih, en se 'i 'sleh. Deh no-eh, a :se-' Nyorsoa-a' 'chlee-deh-' dih 'worn, 'de a se or-a' 'kpih yubo:.

³⁰Nyor⧾ :on 'meh-a, :mor on :sorn-', on :se-' 'bli 'ti-dih: i :neheh'. :Ka 'enjor-nyor:⧾ :on :ne-a 'de Nyorsoa 'bli yai', on :ne-a, 'ka-: an mu :ne :ke.

³¹'Do 'meh :sorn-' deh bo, a 'see-eh zlo, :ka Nyorsoa 'da-a 'de a bo :e? Or no-a,

³²'Mor 'Eble'hehn-a' Nyorsoa. 'Mor Ase'-a' Nyorsoa. 'Mor 'Jekor-a' Nyorsoa. A 'see-eh zlo :e? Nyorsoa :se 'meheh'-nyor⧾-a' Nyorsoa. Jorwor: or no 'kmo :ne-nyor⧾-a' Nyorsoa.

³³:Yee' :yeh nyor⧾ :doru' :dao', on 'worn-a deh⧾ :daa or torne-a nyor⧾, :yee' eh 'ma-dih: an-a' :porluh⧾ 'weh.

³⁴:Yee' :yeh :Falasi'i-nyor⧾ 'worn-ih'-a :ka :Yusu' no-eh, 'de :Sayusi'i-nyor⧾ se-a deh 'ble, on 'ye-a 'o :za-dih:, :yee' :Falasi'i-nyor⧾ 'kpa :dha :due',

³⁵'de an-a' nyor :due' :or no-a :Mose'-a' 'tele' yubo-nyor, or-: dhele-or deh dih, :or 'ye-or' wlu 'worn dih 'bhorn-dih:, or 'dae:,

³⁶Nyor⧾ deh :torne-nyor:. 'Tele' :yeheh :eh no 'tele'⧾-a' klehkpeh-a' 'dlu 'de :Mose'-a' 'tele'-chlee-deh 'di :eh?

³⁷'De :Yusu' 'da, :Ybeh :an-a' :Gwlor :baa' Nyorsoa-', 'do :an-a' :porluh⧾-a' klehkpeh-: 'dekorn: :an-a' :febeh'-a' klehkpeh-: bo.

³⁸Eh-: 'o :eh 'dhu 'tele'⧾-a' klehkpeh, en-' 'dlu-', 'de eh-: no 'tele' :eh 'kpa-a deh ken 'gabaa.

³⁹'Tele'⧾-a' 'sororn' :neh :eh 'kpa-a deh ken :neheh', :eh gweh-a :zai' neh, eh-: 'dhu, :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.

⁴⁰:Mose'-a' 'tele'⧾-a' klehkpeh-: 'dekorn: Nyorsoa-a' wele-eh: :po-nyor⧾-a' nyor⧾ deh :torne-eh-a' klehkpeh-: 'tele'⧾ 'sororn' :daa, me-: en tba ken dih.

⁴¹:Yee' :ka :Falasi'i-nyor⧾-a 'kpa-a :dha :due', :yee' :Yusu' dhele-uh-: dih,

⁴²or 'dae:, :Kaa a no Nyorsoa-a' 'taan'-yu-deh: :daa, eh-a' 'ye-a' :eh? :Or :korn 'yu :oo', or 'dhu-eh:-' :eh? 'De on 'dae:, :Debe' 'di-a' 'yu :oo'.

⁴³'De or dhele-uh dih, or 'dae:, :Yee' :eh :korn dhih 'de Nyorsoa-a' :Zulu no-eh, 'de :Debe'-a' 'jeh 'yor-eh 'da-dih-or :Gwlor :baa' :eh? Or no-a,

⁴⁴:Gwlor :baa' :wlu-' 'de 'an :Gwlor :baa' bo, or 'da, :Dhe 'o 'an :dila-son bo dih :chio'lo:, 'de 'on 'ye nyor⧾ :on 'nyeh-a :on-' ya :ya, 'de :on 'ye-uh' ken dih :na.

⁴⁵:Mor :Debe' 'da-dih 'yu-a' 'jeh :daa :Gwlor :baa', :yee' :kaa or 'ye or-a'a: 'yu-' 'dhu-eh no :eh?

⁴⁶:Yeh :Yusu' 'da :ao', :yee' an-a' nyor se or-a' :gwluhuh' zela-eh 'beh-dih:, 'de :eh 'wluh-a 'o 'we-eh: :dao' 'di, eh se nyor :korn, :or 'ye-a' :gwluhuh' :ku, :or 'ye-or' deh dih dhele: :neheh'.