Read Eastern Krahn Matio' 23 Bible Online

Matio' 23 - Eastern Krahn bible

Matio' 23

¹:Yee' :Yusu' :wlu-' 'de nyor⧾ :doru' :dao'-: 'dekorn: or-a'a: bo :na-nyor⧾-: bo, or 'dae:,

²Nyor⧾ 'tele' :torne-nyor⧾-: 'dekorn: :Falasi'i-nyor⧾-: mo-: 'ble 'kpih on 'ye :Mose'-a' 'tele' nyor⧾ :torne:.

³Eh-a' dhih, a dhe 'o an-a' 'tele' dih, :yee' deh⧾ an zela a :gwluhuh' a 'ye-a' no, a no-ih. Jorwor: a-a' :zi 'o an-a' noo-deh⧾ klei'. Deh no-eh, deh⧾ an torne-a nyor⧾, an-a' no-ih.

⁴An san-dih 'o kwa :ku-gbeh:⧾, :en :korn-a kpa-a' :kma-a 'i. En-' 'jeh :dao', me-: an po 'o nyor⧾ ken, jorwor: an-a' 'jeh, an-a' 'worn, an-a' kpa :jii-eh :due' yai', on 'ye nyor⧾ bo 'kpa, on 'ye-ih' kpa.

⁵Deh⧾-a' klehkpeh an no-a, an no-ih' 'de :gwlor-nyor⧾ 'ye-uh' ya pobo:. Nyorsoa-a' wlu, mo-: on 'chle 'do deh ken. :Yee' deh :dao', eh-: on 'beh-dih: 'i, 'de an san-dih-eh 'o on 'yuba⧾ 'i-: 'dekorn: 'do on son⧾ 'i-:. 'De 'wla⧾ :dhorno'⧾ on pa-', en-' 'voma'e :tehn-'.

⁶On :ybeh-' 'do :dha nyor⧾ :klaba'⧾-a dhe-a dih 'do gor-' dih :dhe :deh. 'De on :ybeh kpala'⧾ 'jeh :ne, :en :dhe-dih-eh 'for 'i, 'de 'di :gweh-dih-sla⧾ 'zorn dih-a' ken :dhe :deh.

⁷On :ybeh-' nyor⧾ 'ye-uh' wlu bo po, 'do 'doror', 'do deh-' 'ye ka 'di, 'de nyor⧾ 'ye-uh' nyor⧾ deh :torne-nyor-nyne 'da-dih:.

⁸Jorwor: a :mor :mloror', a se :korn nyor⧾ 'ye a nyor⧾ deh :torne-nyor 'da-dih:. Deh no-eh, a 'ble nyor⧾ deh :torne-nyor :due' gbai, 'de a-a' klehkpeh, a :mor 'de-di'-boi' :oo'.

⁹'De a-a' 'da-dih:-' nyor, a :baa', dha yao 'zorn. Deh no-eh, a 'ble :Baa' :due' 'i-a' :due' gbai, :or :ne-a 'de yai'.

¹⁰Nyor-a' 'da-dih:-' a, nyor :klaba'. Deh no-eh, a 'ble nyor :klaba' :due' gbai, or-: 'dhu Nyorsoa-a' 'taan'-yu-'.

¹¹Nyor :or 'dhu-a :klaba'-' 'de a 'klu-', :yee' or-: :korn :or 'ye a-a'a: 'bhoi-yu no.

¹²Deh no-eh, nyor-beh: :or 'beh-dih:-a or-a' 'jeh 'i, or-: Nyorsoa-a mu ya :ya. :Yee' nyor-beh: :or :ya-a or-a' 'jeh ya, or-: Nyorsoa-a mu ya-' 'duo:.

¹³'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a po 'o Nyorsoa-a' nyor⧾ wlu 'ken :korn-eh-a' :kpaa' 'weh, 'do nyor⧾ bo. A-a' 'jeh 'yor-eh, a-a' 'worn-dih:, 'de eh 'zorn :pa-dhih. 'De mor a-a' 'nyi nyor⧾ :an 'bhorn-eh dih, :gwie, on 'ye-eh 'zorn pa. [

¹⁴'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a za :dhoba: 'nynor⧾ 'gbu⧾ 'kwa dih, 'de :mor a 'ye nyor⧾-a' 'yli, :yee' a :gwle 'o Nyorsoa bo :wlu 'da. 'Do eh-a' dha, :mor zabe: :zi-eh-a' ti nyni 'o, a :mor Nyorsoa-a mu 'kle 'ye-eh: 'dlu :po 'gabaa, eh 'ye 'o :zi.]

¹⁵'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a yi-dih 'de yobo' ken-: 'dekorn: 'bluhba⧾-a' klehkpeh ken-: a mu deh⧾-a' klehkpeh-' dih, a 'ye-eh' no, 'de nyor :due' gbai 'ye 'o a klei' zi. :Yee' :mor a 'ye-or, :yee' a no-eh', 'de or no 'kulu-nyor, :yee' or :zi 'o a-uh' 'weh, 'do kpor⧾ 'sororn' 'di, 'do 'ku 'bli :mu-eh bo.

¹⁶'Chlo 'do a bo, a :mor 'doror'-nyor:⧾, :an na-dih-a nyor⧾. A 'da :mor nyor :zlehn-dih: Nyorsoa-a' 'sla ken, :yee' eh :se deh. Jorwor: :mor or :zlehn-dih: 'goo: :or :ne-a 'de Nyorsoa-a' 'sla 'di ken, :yee' or :korn or 'ye 'o or-a' :zlehn-dih-wlu: :dao' dih dhe.

¹⁷A :mor :bobo-nyor:⧾ :daa :or 'dor-a. :Yeheh :eh 'kpa deh ken :eh? 'Goo: :e? :Ae' Nyorsoa-a' 'sla :or no-eh 'de 'goo :ne-a gban 'i?

¹⁸'De a za-eh' 'weh :neheh', a 'da, :Mor nyor :zlehn-dih: 'slaa ken :za-dih-deh ken, :yee' eh :se deh. Jorwor: :mor or :zlehn-dih: 'nyii'-deh: :eh :ne-a 'o 'slaa ken :za-dih-deh ken, :yee' or :korn or 'ye 'o or-a' :zlehn-dih-wlu: :dao' dih dhe.

¹⁹A :mor 'doror'-nyor:⧾ :daa. :Yeheh :eh 'kpa deh ken :eh? 'Nyii'-deh: :e? :Ae' 'slaa ken :za-dih-deh: :eh no-eh 'de 'nyii'-deh :ne-a gban 'i?

²⁰Eh-a' dhih, nyor :or :zlehn-dih:-a 'slaa ken :za-dih-deh ken, :yee' or :zlehn-dih: 'slaa ken :za-dih-deh-: 'dekorn: deh⧾-a' klehkpeh :en :ne-a 'o eh ken-: 'weh.

²¹'De nyor :or :zlehn-dih:-a Nyorsoa-a' 'sla ken, :yee' or :zlehn-dih: Nyorsoa-a' 'sla-: 'dekorn: Nyorsoa :or 'ti-a 'de or 'di-: 'weh.

²²Nyor :or :zlehn-dih:-a 'de Nyorsoa 'bli yai' ken, :yee' or :zlehn-dih: Nyorsoa-a' 'keen :kpala'-: 'dekorn: Nyorsoa :or dhe-or ken-: 'weh.

²³'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a 'nyi Nyorsoa a-a'a: 'dhuu'-deh:⧾ :en :nmor-dih:-a 'soma' worn, en-' :bhue: ne 'weh. Jorwor: a bla-dih deh⧾ 'jeh :en 'kpa-a deh ken worn, :en 'dhu-a 'tele'⧾-a' ji-buh⧾-', :en no-a 'yi 'sleh-deh⧾-: nyor⧾-a' :wehlih 'ye-eh-: 'dekorn: :dhehehn-kplen-:. Deh⧾ :daa, me-: a :korn a 'ye no, 'de mor a se :korn a 'ye :yih a no-a :dee' see, worn :bla-dih: :ke.

²⁴A :mor 'doror'-nyor:⧾ :an na-dih-a nyor⧾. A 'kple waan-deh⧾-' 'weh, 'de a-a'a: 'naa'-ni bo, jorwor: :kpuan' ken :soo'o:, or-: a mla.

²⁵'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a worlor 'de a-a'a: 'di 'na-dih-korbuh⧾-: 'dekorn: a-a'a: 'di :di-dih-deh⧾-: ken dih. Jorwor: :vlehehn' 'yi 'de en 'di 'weh, :en 'dhu-a deh⧾-a' klehkpeh-a' 'klan :korn-eh-: 'dekorn: se a-a' 'jeh 'yor-eh-a' yau-a' 'bhororn'-deh⧾-a' 'yi :kan-eh 'beh-dih:-:.

²⁶A :mor :Falasi'i-nyor:⧾ :daa, :on 'dor-a. A worlor: 'de a-a'a: 'di 'na-dih-korbuh⧾-: 'dekorn: 'di :di-dih-deh⧾-: 'di dih :zai', :yee' 'de en ken-a mu :vlehehn'-' :gweh :ke.

²⁷'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a gweh nma-dih-deh:⧾, :en :ma-eh, 'de on :po-a 'ko, :en :nmor-a 'yi dih 'noror ken ka, 'de en 'di 'yi-dih: 'meheh'-nyor⧾-a' 'kpa⧾-: 'dekorn: 'kpan-' :nyni-deh:⧾ 'doror: 'dor-:.

²⁸'Do :ka :ne-a :due' 'di, a gweh 'yi 'sleh-nyor:⧾, a :nmor 'de :gwlor-nyor⧾ 'yli-e-: dih, jorwor: 'de a 'di 'yi-dih:-' dih, nyor⧾-a' 'yli 'ye-eh-: 'dekorn: 'kulu-kplen-:.

²⁹'Chlo 'do a bo, a :mor nyor⧾ 'tele' :torne-nyor⧾-: 'dekorn: :Falasi'i-nyor⧾-:. A no nyor⧾-a' 'yli 'ye-nyor:⧾. Deh no-eh, a ma nma-dih-deh:⧾ 'jeh, 'do Nyorsoa-a' wele-eh: :po-nyor⧾ bo, 'de a :nmor-dih: 'yi 'sleh-nyor⧾-a'a: nma-dih-deh⧾ 'yi dih.

³⁰'De a 'da, :Mor eh 'dhu, :a :ne 'kmo :dee', ti :a :bai'-a' :bai' :ne-dih:-a 'kmo, :yee' Nyorsoa-a' wele-eh: :po-nyor⧾-a' 'dbaa'-deh: :daa :dee', :a :se-uh' bo 'kpa-: i.

³¹:Mor a 'da, a no 'nynuu-a' 'nynuu 'do nyor⧾ :on 'dba-a Nyorsoa-a' wele-eh: :po-nyor⧾ bo, :mor a 'da :ao', :yee' a :kpon-dih: a-a' 'jeh dhih.

³²:Yee' a mu 'dlu bo, deh⧾-zon:⧾ a :bai'-a' :bai' 'dhu-a glu, a 'ye-ih' jla.

³³A :mor sane-zon⧾-nynuu: :daa, :kaa a mu 'kwla 'kpa-eh :no, 'de Nyorsoa-a' zabe: :zi-eh: :daa, eh :ne-' a kpon, 'de a :ne 'de 'ku 'bli mu :eh?

³⁴'An mu a wele-eh: :po-nyor⧾-: :toror' :korn-nyor⧾-: 'dekorn: nyor⧾ 'tele' :torne-nyor:⧾ 'jeh-: bo :dbo. A mu an-a' :noo' 'dba-:. 'De on 'ye 'o :noo' 'do tu 'i :kor-dih:. 'De on 'ye :noo' bla, 'do a-a' 'di :gweh-dih-sla⧾ 'zorn, 'de a mu-uh blaa-tu⧾ 'de :ple-dih:, 'wluh gwlor 'di, mu gwlor 'di.

³⁵'Do eh-a' dha, 'yi 'sleh-nyor⧾-a' klehkpeh :on 'dba-eh dha yao 'zorn, 'do a 'dlu, 'do :wor an-a' nyomor-a mu :po-eh:, :eh 'wluh-a 'de 'Ebo: :or se-a deh-zon-' :ne, or-a' nyomor bo, 'de :eh :yeh-dih:-a 'Zehkorwlaya' :or 'dhu-a 'Balaka'ya-a'a: 'yu-' ken, a :bai'-a' :bai' 'dba-dih:-a 'o Nyorsoa-a' 'sla-: 'dekorn: 'slaa ken :za-dih-deh-: 'nyne bo.

³⁶Dhih 'jeh, 'an zela a :gwluhuh', en-' klehkpeh :daa, en mu 'o :kana-nyor:⧾ :daa 'dlu :po-eh:.

³⁷:Yee' :Yusu' :wlu-', or 'dae:, A :mor :Julu'slehn-nyor:⧾ :daa, a :mor 'dba Nyorsoa-a' wele-eh: :po-nyor⧾, 'de :or tba-dih :yuh Nyorsoa dbo-a 'de a bo sobu'⧾ dih, on 'ye 'meh. 'De mor 'do ti :dhulu' 'di, 'an 'bhorn 'on 'ye a-a' klehkpeh :dha :due' po, 'do 'on bo, :eh gweh-a :ka :gbano: :soon' :vlu-a an-a'a: 'nynuu ken. Jorwor: a-a' 'worn-dih-eh.

³⁸Eh-a' dhih, a :to :dou'⧾, a-a'a: Nyorsoa-a' 'sla-a mu a kwa 'bor-dih-eh:.

³⁹:Yee' 'an zela a :gwluhuh', a :se-' 'on 'ye-: i :neheh', eh 'ye ti a mu :ao', :Bhorlie' 'do nyor :dao' bo, :or yi-a 'de, 'de :Gwlor :baa'-a' 'nyne 'di, ken :yeh-dih:.