Read Eastern Krahn Matio' 25 Bible Online

Matio' 25 - Eastern Krahn bible

Matio' 25

¹Ti 'yu an 'da-dih-a Nyor-kpalu-a 'yu-a mu-a 'de :ya, :yee' Nyorsoa-a' nyor⧾ wlu 'ken :korn-eh mu 'nynor⧾-kpao'⧾-nynuu :bhue-a' deh :gweh, :on se-a nyor⧾-kpalu⧾-dhih yubo:, :on 'duo:-a an-a'a: 'nape⧾-', 'de :on mu-a 'yu :or :korn-a 'nynor an ya-a nyina, 'yi 'ya-dih: 'da.

²'Nynor⧾-kpao'⧾ :dao', an-a' :mm', mo-: :bo 'di dih, 'de an-a' :mm' :florn :gwluhuh' dih.

³:Yee' :yuh :bo-a 'di dih, on 'duo: an-a'a: 'nape⧾ 'weh, jorwor: on :se-' :jase'-ni: :nee' kpa.

⁴Jorwor: :yuh :on :florn-a :gwluhuh' dih, :yeh an mu-a, :yee' on kpa :jase'-ni: :nee' 'de :zolae 'di, me-: on 'ble-dih: an-a'a: 'nape⧾ bo.

⁵'Yu :daa, or :se-' 'dhobo:, or :se 'de yi. :Yee' an 'zen-dih-', 'de on 'kpa 'nyinor-'.

⁶:Yee' :yeh eh no-a dholo-' zuee, :yee' nyor po 'geh, or 'dae:, A :gbee'e:. :Goba'-yu :wor :dhe dih. A yi 'noror 'zorn, a 'ye-or' 'yi 'ya-dih:.

⁷:Yee' 'nynor⧾-kpao'⧾-nynuu-a' klehkpeh :dao', on 'wluh-' 'nyinor:, 'de on po an-a'a: 'nape⧾ 'kpa, or 'ye wan.

⁸'De :yuh :on :bo-a 'di dih, on :wlu 'de :gwluhuh' dih :florn-no bo, on 'dae:, :A-a'a: :jase'-ni: a 'ble-a, a 'nyi en-' deh⧾-bei :a-uh. Deh no-eh, :a-a'a: 'nape⧾-a yi 'mo 'da.

⁹Jorwor: :gwluhuh' dih :florn-nynor⧾-kpao'⧾ :dao', on 'dae:, 'Kei:. Deh no-eh, eh gweh, en :se-' 'i :dhie: i, 'do a mor-: 'dekorn: :a mor-: bo. Jorwor: a mu 'de :jase'-ni: :plo-nyor⧾ bo, a 'ye a-a' 'jeh-a'a: :jase'-ni dhen. 'De on mu.

¹⁰Jorwor: :yeh an mu-a :jase'-ni: :dhen 'da, :yee' :goba'-yu 'si-: dih 'noror on 'de. :Yee' 'nynor⧾-kpao'⧾-nynuu-a' :yuh :on :ne-a buh⧾ ken, mo-: :ne or pa 'de 'nynor nyina: :kpa-gor-', 'de :kpaa' :po-eh: 'o.

¹¹:Yee' :yeh ti-kpor :zi-dih:-a 'o ken dih, :yee' :yuh :dao', on yi-: 'de :ke, on 'dae:, Nyor :klaba', Nyor :klaba', :za :a :kpaa' 'i.

¹²Jorwor: or :wlu-' 'de on bo, or 'dae:, Dhih 'jeh, 'an zela a :gwluhuh', 'on se a yubo:.

¹³'De :Yusu' 'dae:, :Yee' eh-a' dhih, a 'dhu-eh 'yli-eh bo. Deh no-eh, a se 'we-eh-: 'dekorn: ti-: yubo:, :en 'yu an 'da-dih-a Nyor-kpalu-a' 'yu-a mu-a 'de :ya.

¹⁴:Yee' :Yusu' :wlu-' :neheh', or 'dae:, Nyorsoa-a' nyor⧾ wlu 'ken :korn-eh mu nyor-kpalu :due' :gweh, :or yi-a 'duhba-' :mu 'da, 'de :or 'da-a or-a'a: 'bhoi-nynuu 'do or bo, 'de :or sie-a or-a'a: :kororn-deh⧾ 'de on 'kwa.

¹⁵Or 'nyi :due' 'sebla-wlii-a' 'wlu :mm', 'de or 'nyi :noror' 'sebla-wlii-a' 'wlu 'sororn', 'de or 'nyi :noror' 'sebla-wlii-a' 'wlu :due'. An-a' klehkpeh, or 'nyi-uh deh⧾ :ka an-a' dhih no-a' :ne-a'. 'De or 'kpa :gwie 'i, or mu.

¹⁶:Yee' 'do :dha :due' :dao', :yor :or 'ye-a 'sebla-wlii-a' 'wlu :mm' :dao', or 'bili-ih-'-: dih, 'de or 'ye 'sebla-wlii-a' 'wlu :mm' :dele' ka, 'do en ken.

¹⁷:Yee' 'ka-: :yor :or 'ye-a 'sebla-wlii-a' 'wlu 'sororn', or no :ke, 'de or 'ye 'sebla-wlii-a' 'wlu 'sororn' :dele' ka.

¹⁸Jorwor: :yor :or 'ye-a 'sebla-wlii-a' 'wlu :due', or mu, or 'blu 'bie' 'do glu, 'do :wor or 'zile: or-a'a: nyor :klaba'-a'a: 'wlii.

¹⁹:Yee' :yeh ti :dhorno'⧾ :zi-dih:-a 'o ken dih, :yee' 'bhoi-nynuu: :dao', an-a'a: nyor :klaba' yi-: de, 'de or 'da-uh, or 'ye 'wlii: or :sie-dih-uh-a zlo.

²⁰'De 'yu :yor :or 'ye-a 'sebla-wlii-a' 'wlu :mm', or :ya 'de 'sebla-wlii-a' 'wlu :mm' :noo', or 'dae:, Nyor :klaba', :on 'nyi 'on 'sebla-wlii-a' 'wlu :mm'. :Gbee'e: 'On 'ye 'sebla-wlii-a' 'wlu :mm' :noo', 'do en ken.

²¹:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, :On no deh 'jeh, :mor 'an-a: 'bhoi-yu: 'jeh :oo', :on no :dhehehn-nyor:. :Ka :on no-a :dhehehn-nyor 'do deh-yu-a' 'yli-eh bo 'dhu-eh, :yee' eh-: :korn dhih, 'an mu deh⧾ :dhulu' 'de :on 'kwa :po. 'Yle, mor-: 'dekorn: 'mor-: :a 'ye :dha :due' 'kpa, 'de 'mona: ka 'di.

²²'De :yor :or 'ye-a 'sebla-wlii-a' 'wlu 'sororn', or 'yle :ke, or 'dae:, Nyor :klaba', :on 'nyi 'on 'sebla-wlii-a' 'wlu 'sororn'. :Gbee'e:. 'On 'ye 'sebla-wlii-a' 'wlu 'sororn' :noo', 'do en ken.

²³:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, :On no deh 'jeh, :mor 'an-a: 'bhoi-yu: 'jeh :oo', :on no :dhehehn-nyor:. :Ka :on no-a :dhehehn-nyor 'do deh-yu-a' 'yli-eh bo 'dhu-eh, :yee' eh-: :korn dhih, 'an mu deh⧾ :dhulu' 'de :on 'kwa :po. 'Yle, mor-: 'dekorn: 'mor-: :a 'ye :dha :due' 'kpa, 'de 'mona: ka 'di.

²⁴'De :yor :or 'ye-a 'sebla-wlii-a' 'wlu :due', or 'yle :ke, or 'dae:, Nyor :klaba', 'on yubo-eh', :an-a' deh :kma 'i. 'Do :dha :on se-a deh 'dhu-dih:, 'do :wor :an 'kpan-dih-eh. Deh⧾-yor: :on se-a dih gboba:, or-: :an 'gola dih.

²⁵'Do eh-a' dha, 'an ple :an-a' :fano 'weh. Eh-: :korn dhih, 'on mu, 'on 'zile: :an-a'a: 'wlii: 'de glu. :Gbee'e:. :An-a' deh :on :sie-dih:-a 'on, eh-: :dhe dih.

²⁶:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, :Mor 'bhoi-yu: :daa, :or :korn-a :porluh: :nyni-a worn, 'de :or no-a kpobo, :on yubo-eh', :dha 'on se-a deh 'dhu-dih:, 'do :wor 'an 'kpan-dih-eh, 'de deh⧾-yor: 'on se-a dih gboba:, or-: 'an 'gola dih.

²⁷'Do eh-a' dha, :on :korn :on 'ye 'an-a: 'wlii 'de 'wlii dih :dhe-gbu 'zorn kpa :dee', :yee' :mor 'on yi de, :yee' 'an mu 'an-a: 'wlii-: 'dekorn: deh :eh 'kpa-a 'o en ken-: 'ye.

²⁸'De or :wlu 'de or-a'a: 'bhoi-nynuu: :noo' bo, or 'dae:, A za-or 'sebla-wlii-a' :kehehn' :due' :dao' 'kwa. :Yee' a 'nyi-ih :yor :or 'ye-a 'o 'sebla-wlii-a' 'wlu :bhue ken.

²⁹Deh no-eh, nyor :or 'ye-a 'o deh⧾ :dhulu', or-a'a: deh⧾ :dhulu' or 'ye-a 'o, en mu ken 'kpa-:, 'de or 'ye :doru' 'ble. Jorwor: nyor :or se-a 'o deh 'ye, or-a'a: deh-yu-a' 'jeh or 'ble-a, eh mu-or 'kwa :za-eh:.

³⁰:Yee' se deh-' 'dhu-eh-bhoi-yu: :dao', a po-or 'do 'zorn 'de neh-', 'do :dha 'vin-a'-: 'dekorn: 'nyne 'i :di-dih-eh-: en mu-a :ne.

³¹:Yee' :Yusu' :wlu-' :neheh', or 'dae:, :Mor 'yu an 'da-dih-a Nyor-kpalu-a' 'yu, or 'yle 'de or-a' dhih-a' 'i 'beh-a' 'di, 'de 'enjor-nyor⧾-a' klehkpeh :ne or 'ye 'de yi, :yee' or mu dih :dhe, 'do or-a'a: dhih-a' 'i 'beh :kpala' ken.

³²:Yee' 'dawor'⧾-dlu⧾-a' klehkpeh :en :ne-a dha 'bluhba ken, en mu 'o or ybei' :gweh-dih:. :Yee' or mu-ih 'dlu⧾-kpor⧾ 'sororn' :za, :eh gweh-a :ka 'blae'⧾-a' 'yli-eh bo 'dhu-nyor-a zela-a 'blae'⧾-: 'dekorn: 'gbalor⧾-: dih.

³³Or mu 'blae'⧾ :dila-son bo :po, 'de or 'ye 'gbalor⧾ kona-son bo po.

³⁴:Yee' 'ka-: 'Keen-a mu :aa 'da-:, 'de nyor⧾ :on :ne-a 'de or-a' :dila-son bo, A 'yle, a :mor 'On-ba po-a :bhorlie' bo, a 'yle, Nyorsoa-a' nyor⧾ wlu 'ken :korn-eh-a fuo a ken see, :eh 'wluh-a 'de ti Nyorsoa :no-dih:-a 'bluhba, a 'ye-eh' 'ye.

³⁵Deh no-eh, ti 'moeh-a no-a 'on, :yee' a 'nyi 'on dii-deh:⧾. Ti 'ni 'na-ton-a no-a 'on, :yee' a 'nyi 'on 'ni, 'de 'on 'na. Ti 'on no-a 'duhba-yu, :yee' a :ko-dih: 'on 'gbu.

³⁶Ti 'on :chehn-a wluh bo, :yee' a 'nyi 'on paa-deh:⧾. Ti 'an puhba-a, :yee' a yi 'on 'nyinor-' :za 'da piee. Ti 'on :ne-a :kasue 'di, :yee' a yi 'de 'on bo 'weh.

³⁷:Yee' 'yi 'sleh-nyor:⧾ :dao', an mu :ao', :Gwlor :baa', ti :yihih :eh 'moeh no :on, 'de :a 'nyi :on dii-deh⧾ :eh? Ti :yihih :eh 'ni 'na-ton-a no :on, 'de :a 'nyi :on 'ni :on 'ye 'na :eh?

³⁸Ti :yihih :eh :a 'ye :on, 'de :on :no-dih: 'duhba-yu, 'de :a :ko-dih: :on 'gbu :eh? 'De mor, ti :yihih :eh :a 'ye :on, 'de :on :chehn wluh bo, 'de :a 'nyi :on paa-deh⧾ :eh?

³⁹Ti :yihih :eh :a 'ye :on, 'de :an puhba, 'de mor :on :ne :kasue 'di, 'de :a :yi-dih: 'de :on bo :eh?

⁴⁰:Yeh on 'da :ao', :yee' 'Keen-a mu-uh :gwluhuh' zela:, or 'ye :ao', Dhih 'jeh, 'an zela a :gwluhuh', deh⧾ :daa, en-' deh-beh: a no-a, 'do 'de-di'-boi' :daa :on :korn-a 'de 'on bo, :mor a no deh, 'do an-a' 'zeehn: :nor, :or se-a deh ken 'kpa bo, :yee' 'mor-: 'o, a no-eh 'bhun.

⁴¹:Yee' 'Keen-a mu :yuh :on :ne-a 'de or-a' kona-son bo :gwluhuh' zela:, or 'ye :ao', A :mor nyor⧾ :daa. Nyorsoa po a 'chlo bo 'weh. A 'wluh :daa 'on bo, a 'ye mu, 'de 'kmo :sie: neh-', :eh :po-eh 'kpa :dee' see, 'do 'ku-: 'dekorn: an-a'a: :weheh' :za-deh⧾-: bo.

⁴²Deh no-eh, ti 'moeh-a no-a 'on, a :se-' 'on deh-beh 'nyi 'on 'ye di, ti 'ni 'na-ton-a no-a 'on, a :se-' 'on 'ni-bei-a' 'jeh 'nyi, 'on 'ye 'na.

⁴³Ti 'on no-a 'duhba-yu, a :se-' 'on 'gbu :ko-dih:. Ti 'on :chehn-a wluh bo, a :se-' 'on paa-deh⧾ 'nyi. Ti 'an puhba-a, 'de mor 'on :ne-a :kasue 'di, a :se 'de 'on bo yi.

⁴⁴:Yeh or 'da :ao', :yee' an mu-or dih dhele:, an mu :ao', :Gwlor :baa', ti :yihih :eh :a 'ye-dih: :on, 'de 'moeh-: 'ni 'na-ton-: en no :on. Ti :yihih :eh :a 'ye-dih: :on, :on :no-dih: 'duhba-yu, 'de mor :on :chehn wluh bo, 'de mor :an puhba, 'de mor :on :ne :kasue 'di, 'de :a :se-' :on bo 'kpa :eh?

⁴⁵:Yee' 'Keen-a mu :wlu 'de on bo, or mu :ao', Dhih 'jeh, 'an zela a :gwluhuh', deh⧾ :daa, :mor a se en-' deh-beh no, 'do 'an-a: 'bhoi-nynuu-a' 'zeehn: :nor, :or se-a deh ken 'kpa bo, :yee' 'mor-: 'o, a :se-eh' 'bhun no.

⁴⁶:Yee' nyor⧾ :daa, an mu :mu, 'de on 'ye 'kle 'ye-eh: 'dlu :po-eh: :eh se-a 'dlu-' :jla 'da :korn, jorwor: 'yi 'sleh-nyor:⧾, mo-: :an mu 'kmo :sie: :febeh' 'ye-: 'de Nyorsoa 'bli yai'.